Девојката на коосновачот на „Асос“, Квентин Грифитс, кој почина под необјаснети околности во Тајланд, изјави дека не може да поверува дека би се самоубил. Грифитс, 58, еден од основачите на онлајн модниот гигант, почина на 9 февруари откако падна од 18-ти кат од својот стан во Патаја, одморалиште јужно од Бангкок. Полицијата ја третира неговата смрт како самоубиство, пишува Дејли Меил.

Службите за итни случаи го пронајдоа телото на милионерот на земја под балконот. Според полицискиот извештај, Грифитс бил сам во станот, а собата била заклучена одвнатре. Не се пронајдени знаци на провала, а обдукцијата не пронашла докази за насилна смрт.

Неговата 26-годишна девојка, Џом Типанонгсри, изрази неверување поради трагичниот настан.

„Едноставно не можам да поверувам дека би направил нешто такво“, изјави козметичарката за „Д сан“.

„Никој од неговите најблиски не помислил дека ќе си го одземе животот бидејќи никој не забележал никакви предупредувачки знаци. Јас лично никогаш не го видов да зема антидепресиви или други лекови.“

Таа додаде дека е скршена, во целосен шок и дека плаче секој ден од неговата смрт. Двојката ја започнала својата врска по распадот на вториот брак на Грифитс.

Трагедијата се случила во време на правен спор со неговата поранешна сопруга, 43-годишната Тајланѓанка Плој Крингсинтанакун. Таа го обвини за измама од 500.000 фунти, тврдејќи дека продал земјиште и акции во компанија што ја воделе заедно. Крингсинтанакун рече дека таа нема никаква врска со неговата смрт, што се случило само неколку дена пред нивното закажано судско рочиште.

Грифитс наводно бил уапсен на аеродромот Суварнабхуми во Бангкок во јануари минатата година и испрашуван поради наводи дека фалсификувал документи за продажба на имот без нејзино знаење. Тој ги негирал обвиненијата и бил ослободен по испрашувањето, а истрагата сè уште била во тек во времето на неговата смрт.

Крингсинтанакун изјави дека не била во контакт со својот поранешен сопруг четири години и осум месеци, откако открила дека тој ѝ бил неверен. За неговата смрт дознала од адвокат.

Извор близок до семејството изјавил дека неговата смрт е „вистинска мистерија“. „Беше користен терминот „сомнителни околности“, но сè уште не знаеме што се случило“, рече изворот.

Во 2000 година, Грифитс го основал Asos со Ник Робертсон и Ендру Реган, кој прераснал во глобален моден гигант вреден 3 милијарди фунти. Тој ја напуштил компанијата, чии креации ги носеле принцезата од Велс и Мишел Обама, во 2005 година. Подоцна заработил 15 милиони фунти со продажба на акции во 2010 година, со дополнителни приходи во 2013 година.

Тој ги тужел своите сметководители во BDO, тврдејќи дека му згрешиле за повеќе од 4 милиони фунти данок од продажбата на акции во Asos и Achica, уште еден онлајн трговец на мало што го ко-основал. Таткото на три деца се преселил во Тајланд околу 2007 година. Откако се развел од првата сопруга, се оженил со Тајланѓанка со која имал син и ќерка. Двојката се разделила пред неколку години.

Од Асос велат: „Жал ни е што слушнавме за смртта на Квентин, еден од нашите основачи. Тој одигра важна улога во самите почетоци на Асос и засекогаш сме благодарни за неговиот придонес. Нашите мисли се со неговото семејство и пријателите.“

Портпаролот на британското Министерство за надворешни работи изјавил за Дејли Меил: „Го поддржуваме семејството на британскиот државјанин кој почина во Тајланд и сме во контакт со локалните власти.“

Помошникот на претседателот на Русија, Јуриј Ушаков, денеска изјави дека Русија е запознаена со плановите на Франција и Велика Британија да ѝ обезбедат на Украина нуклеарно оружје или технологија за производство на такво оружје.

„Американците, секако, ќе бидат информирани за сè, но тие веќе знаат. Во моментов ова се коментира на сите канали. Ние ќе им го кажеме тоа конкретно“, изјави Ушаков за телевизискиот канал „Росија 1“ и додаде дека плановите на Франција и Велика Британија да ѝ обезбедат на Украина нуклеарно оружје или технологија за негово производство ќе влијаат врз ставот на Русија за решавањето на украинскиот конфликт, пренесуваат „Интерфакс“ и „Танјуг“.

Претходно денеска, заменик-претседателот на Советот за безбедност на Руската Федерација, Дмитриј Медведев, на својот профил на „Икс“ објави дека употребата на руско нуклеарно оружје против цели во Украина, како и нуклеарни удари врз Велика Британија и Франција, би биле легални и оправдани доколку Лондон и Париз му предадат нуклеарна технологија на Киев.

Иран е блиску до склучување договор со Кина за набавка на противбродски крстосувачки ракети CM-302, во момент кога САД распоредуваат значителни поморски сили во близина на иранскиот брег, објави „Ројтерс“, повикувајќи се на шест извори запознаени со преговорите.

Според извештајот, договорот е речиси финализиран, но датумот на испорака сè уште не е утврден. Станува збор за супeрсонични ракети со дострел од околу 290 километри, дизајнирани да избегнуваат бродска одбрана со лет на мала висина и голема брзина.

Експерти за вооружување оценуваат дека нивното воведување би ги засилило иранските напаѓачки способности и би претставувало сериозна закана за американските поморски сили во регионот. Поранешен израелски разузнавач изјавил дека таквата способност „целосно би ги променила правилата на игра“.

Преговорите со Кина започнале пред две години, но се забрзале по минатогодишниот конфликт меѓу Израел и Иран, наведуваат изворите. Во меѓувреме, САД распоредуваат носачи на авиони, вклучително и USS Abraham Lincoln и USS Gerald R. Ford, во близина на Иран.

Кинеското Министерство за надворешни работи соопштило дека не е запознаено со преговорите за продажба на ракети, додека Белата куќа не дала директен коментар. Американскиот претседател, Доналд Трамп, му дал рок на Иран за договор околу нуклеарната програма, во спротивно се заканил со „драстични мерки“.