Компанијата „Фајзер“ привремено ќе ги намали испораките на вакцини во Европа, објави норвешкиот Институт за јавно здравје.

Испораката ќе се намалува сè додека американската компанија не го зголеми производствениот капацитет.

„Ова привремено намалување ќе влијае на сите европски земји“, се вели во соопштението на Институтот.

Тие исто така наведуваат дека следната недела очекувале да добијат 43.875 дози вакцини од „Фајзер“, но дека, најверојатно, сега ќе добијат 36.075 дози.

Од Институтот велат дека дознале нешто пред 10 часот дека испораките ќе бидат намалени, а тоа, додаваат тие, е последица на ограниченото производството во „Фајзер“, чија цел е зголемување на капацитетот на две милијарди дози вакцини годишно во споредба со сегашните 1,3 милијарди.

„Сè уште не е јасно колку време ќе биде потребно за да ’Фајзер’ повторно го достигне максималниот капацитет на производство“, рекоа од норвешкиот институт.

Бројот на лица заразени со коронавирус во Германија надмина два милиони, додека бројот на смртни случаи од последиците од оваа инфекција достигна речиси 45.000. Експертите го објавија тоа еден ден откако канцеларката Ангела Меркел побара брза реакција со цел да се спречи ширењето на коронавирусот.

Според Институтот „Роберт Кох“, бројот на нови случаи се зголемил за 22.368 на 2.000.958, пренесува „Ројтерс“.

Тоа е најмало зголемување на бројот на заразени по повеќе од два месеца, а состојбата во одделите за интензивна нега исто така е малку подобрена.

Сепак, големиот број смртни случаи, од кои денес има 1.113 лица, и загриженоста за појавата на заразни видови коронавирус ги зголемуваат стравувањата дека постојните мерки на заклучување нема да успеат.

Рекорден број смртни случаи од последиците од коронавирусот беа регистрирани во Германија вчера – 1.244, а од почетокот на пандемијата починаа речиси 45.000 луѓе, пренесува „Ројтерс“.

Германски „Билд“ вчера објави дека канцеларката Ангела Меркел размислува за воведување на најстрого заклучување поради пандемијата на коронавирус, што би значело целосно затворање на земјата.

Русија ја започнува постапката за повлекување од Договорот за отворено небо поради недостиг на напредок во врска со отстранувањето на пречките што се создадени досега и кои ја попречуваат неговата функционалност, објави руското Министерство за надворешни работи.

Како што е наведено, веднаш штом ќе завршат сите внатрешни процедури, известувањето ќе биде испратено до сите други учесници во Договорот.

САД официјално се повлекоа од Договорот за отворено небо на 22 ноември. Во таа насока, Министерството за надворешни работи на Русија објави дека Москва ќе побара цврсти гаранции од земјите кои остануваат во Договорот за отворено небо дека ќе ги исполнуваат своите обврски.

Вашингтон ги посочи „повеќекратните прекршувања од страна на Русија“ како причина за повлекување од Договорот.

Договорот за отворено небо беше потпишан во 1992 година и стана една од мерките за градење доверба во Европа по Студената војна. Тој е на сила од 2002 година и им овозможува на земјите членки отворено да собираат информации за воените сили и активности. Потписнички на договорот се 34 земји.