Свет
Кинески експерти тврдат дека коронавирусот не потекнува од Кина
Кинескиот државен весник „Пиполс дејли“ тврди, повикувајќи се на изјави на кинески експерти, дека коронавирусот не потекнува од Вухан, град во провинцијата Хубеј каде најпрво беше детектиран.
Сите достапни докази сугерираат дека вирусот, кој досега зарази повеќе од 59 милиони луѓе во 190 земји не потекнува од Вухан, тврдат кинески експерти цитирани од „Пиполс дејли“.
„Вирусот најпрво беше откриен во Вухан, но не потекнува од таму“, ркол Зенг Гуанг, поранешен главен епидемиолог во кинескиот Центар за контрола и превенција на болести (ЦДЦ) на онлајн конференција одржана 19 ноември, пренесува весникот.
Ву Зунју, главниот епидемиолог на кинескиот ЦДЦ, неодамна ја даде истата проценка, тврдејќи дека патогенот пристигнал во Кина преку пакувањата на замрзната морска храна или месо, објави „Саут Чајна Морнинг Пост“.
Според италијанско истражување објавено претходно, антитела специфични за САРС-КоВ-2 се пронајдени во примероци од крв земени од септември 2019 година до март 2020, пишува „Пиполс дејли“ со цел да ги поткрепи ваквите тврдења.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Унгарија со Трамп; „Киев да престане со политичката уцена“
Унгарија се приклучува кон Американскиот мировен комитет и, како што вели шефот на дипломатијата Питер Сијарто, сака да учествува во медијацијата не само во Газа, туку и во Украина, додека во исто време вели дека Будимпешта нема да се согласи на, како што тврди, политичка уцена од Киев.
Сијарто изјави во Вашингтон дека овој комитет може да се справи не само со ситуацијата во Газа, туку и со конфликтот во Украина, објави „МТИ“.
Унгарскиот министер истакна дека новиот светски поредок зависи од билатералните односи, меѓувладината соработка и личните контакти, и дека дипломатските напори на американскиот претседател Доналд Трамп нудат шанса за мир, споредлива со Абрахамовите договори од 2020 година што ги нормализираа односите меѓу Израел и арапските земји.
Покрај својата улога во мировните напори, Унгарија ги штити своите енергетски интереси. Сијарто ја критикуваше Украина за она што тој го тврди како обид за политичка уцена во врска со прекинот на испораките на сурова нафта преку нафтоводот „Дружба“.
Свет
„Кога го гледам овој режим и овој слеп, бесен терор, имам малку надеж“: Мерц не гледа брз крај на војната во Украина
Германскиот канцелар Фридрих Мерц оцени дека има мали шанси за брз крај на војната во Украина преку преговори.
Тој изјави за германските весници НБР и „Рајнфалц“ дека според него војната ќе заврши само кога една од двете страни ќе биде исцрпена, „или воено или економски“.
„Разумот и хуманитарните аргументи нема да го убедат рускиот претседател Владимир Путин. Тоа е горчливата вистина“, рече Мерц.
Според него, целта на европските напори е „да се спречи руската држава воено да ја продолжи војната и нејзиното финансирање“, според „Шпигел“. Мерц рече дека смета дека е практично невозможно нормалните односи со Путин некогаш да се вратат.
„Кога го гледам овој режим и овој слеп, бесен терор, имам малку надеж“, рече германскиот канцелар.
Според Мерц, руската „владејачка елита“ не може без војна во догледна иднина и мора да ја држи воената машина во функција бидејќи немаат план што друго да прават со стотици илјади војници, од кои некои се тешко трауматизирани, кога ќе се вратат од фронтот.
Регион
(Видео) Јахорина: Детето кое падна од жичарата претрпе сериозни повреди
Детето, кое вчера падна од жичарницата на планината Јахорина, е надвор од животна опасност, соопштија утрово за „БН ТВ“ од болницата во Источно Сараево.
„Детето е згрижено, претрпе фрактура на бутната коска, што е сериозна физичка повреда, и е испратено во матичната установа во Нови Сад на понатамошно лекување“, изјавија од болницата за „БН ТВ“.
Медиумите потсетуваат дека вчера се случи непријатен настан на Јахорина, кога едно дете беше оставено да виси од жичарницата, а потоа падна на земја од висина од неколку метри.
Сето ова го забележаа скијачите кои случајно се најдоа таму.
Полициската управа Источно Сараево досега не го коментирала случајот, според медиумите во регионот.
Како што изјавија од Олимпискиот центар Јахорина, наскоро ќе биде објавено соопштение во врска со овој настан.

