Земјите-членки на ЕУ се согласија да ги ублажат ограничувањата за патувања во текот на летото, а целосно вакцинираните туристи од ЕУ ќе бидат ослободени од карантин, додека списокот на европски региони од кои е безбедно да се патува ќе биде проширен, велат дипломатите.

Амбасадорите од 27. земји-членки на ЕУ го одобрија модифицираниот предлог на Европската комисија луѓето кои ја примиле последната доза на вакцина пред 14 дена или повеќе, да немаат ограничувања за патување во друга европска земја, изјавија тројца европски дипломати.

Ограничувањата за другите патници треба да се засноваат на епидемиолошката состојба во земјата од која патуваат.

Ревидираните упатства беа усвоени во време кога ЕУ воведува сертификати со кои се потврдува дали патникот е вакциниран или има стекнато имунитет по болест од Ковид, или тест негативен за коронавирус.

Системот треба да биде подготвен за имплементација на 1 јули, иако некои земји, воведоа сертификати порано.

Европскиот блок ќе ги олабави ограничувањата на зоните обележани со различни бои.

„Зелените“ региони сега треба да имаат помалку од 25 случаи на 100.000 жители за 14 дена, а учеството на позитивните тестови е под 4 проценти.

Земјите-членки на ЕУ исто така ќе можат да ја повлечат „сопирачката за итни случаи“ и да забранат влез на сите патници од регион каде што има зголемување на заразната варијанта на болеста.

Претседателката на Европската комисија, Урсула фон дер Лајен, и претседателот на Европскиот совет, Чарлс Мишел, бараат да се спроведе истрага за потеклото на коронавирусот.

Целта, како што велат, е да се открие вистината за почетокот на пандемијата.

„Светот треба да знае што се случи за да извлечеме поуки. Ние ќе ги поддржиме сите напори да обезбедиме транспарентност и да ја откриеме вистината“, рече Мишел на прес-конференција.

Претседателката на Комисијата изјави дека треба да знаеме како точно настанала оваа страшна глобална пандемија. Урсула фон дер Лајен посочи на фактот дека многу се научи од финансиската криза во 2008 година.

„Имајќи предвид дека Европската Унија добро ја анализираше кризата и ги разви соодветните алатки, ние мора брзо да реагираме во сегашната здравствена криза. Сега треба да го сториме истото и да осигураме дека оваа криза нема да се повтори“, рече Лајен.

Како што додаде, сега е клучно да им се даде на истражителите целосен пристап до сите информации, кои се важни за утврдување на потеклото на пандемијата.

Францускиот претседател Емануел Макрон денес изјави дека насилството е некомпатибилно со демократијата и дека, без оглед на вчерашниот инцидент, тој ќе продолжи да комуницира директно со граѓаните во јавност.

Откако вчера граѓанин му удри шлаканица за време на посетата на југоисточниот дел на Франција, Макрон изјави дека го разбира незадоволството на граѓаните, но дека насилството е целосно неприфатливо во демократска држава.

“Го разбирам гневот на граѓаните. Го прифаќам фактот дека постои гнев што граѓаните мора легитимно да го изразат. Јас сум во редовен контакт со луѓе кои изразуваат лутина и вознемиреност за одредени одлуки, и секогаш сум тука за да го слушнам тоа и понекогаш можам да одговори на прашања, но понекогаш и не. Сепак, насилството е целосно неприфатливо, особено во демократијата “, рече францускиот претседател, пренесуваат медиумите во таа земја.

Тој додаде дека и покрај инцидентот, сепак ќе биде среќен да разговара со граѓаните во јавност.

“Ќе продолжам да одам насекаде. Не смееме да попуштиме на насилство, а особено на насилство врз јавни службеници. Не треба да трошиме премногу време на ова”, рече Макрон.