Комесарот за внатрешен пазар на ЕУ, Тиери Бретон изјави дека е во ред доколку членките на Унијата сакаат да набават вакцини против коронавирусот од руско и кинеско производство.

Бретон го поздрави потегот на Австрија и Данска да соработуваат со Израел во врска со вакцините, пишува „Политико“.

„Немам страв дека тоа е насочено против кого било. Тоа е само подобрување на глобалната соработка”, рече Бретон.

Бретон е одговорен за разговори со претставници на компаниите „Астра зенека“, „Фајзер“ и „Модерна“, кои произведуваат вакцини против коронавирус.

Запрашан да даде коментар за интересот на Унгарија, Словачка, Полска и Чешка за руската вакцина „спутник В“, тој рече дека сите дози што ги добиваат тие земји се само капка во морето.

„Она што сега ни треба се дози, а не нови вакцини“, рече Бретон, додавајќи дека Унгарија примила 40.000 дози од руската вакцина и дека се потребни милиони, а земјите членки ќе добијат милиони дози вакцини со помош на ЕУ.

Молдавија е прва европска земја што доби вакцини против коронавирус од глобалната програма Ковакс, објави претседателката Маја Санду.

Таа на „Твитер“ напиша дека првата транша од 14.000 дози вакцини пристигнала во Молдавија синоќа, пренесува „Ројтерс“.

Во Молдавија имунизацијата започна пред три дена со вакцините на „Астра зенека“, донирани од Романија.

Австралија бара од Европската комисија да ја преиспита одлуката за блокирање на испораката на вакцините на „Астра зенека“ во таа земја, пренесува „Ројтерс“.

Европската комисија и Италија вчера ја блокираа испораката на речиси 250.000 дози вакцини на „Астра зенека“ во Австралија бидејќи тој производител не ги исполнил обврските од договорот со ЕУ.

„Австралија го иницира прашањето пред Европската комисија преку неколку канали и конкретно побара да се преиспита одлуката“, рече австралискиот министер за здравство, Грег Хант.

Тој рече дека Австралија веќе примила 300.000 дози вакцини на „Астра зенека“ и додаде дека процесот на вакцинација не е загрозен. Австралија почна со имунизација пред две недели со вакцинирање на медицинските работници и постарите граѓани со вакцината на „Фајзер“.