Водач на шестчлената група, која вчера беше уапсена за 324 килограми кокаин во Солун, е 40-годишниот Живко Бакиќ, поранешен фудбалер на Црвена звезда, објави српски Блиц.

Покрај него, уапсени се: А.М., Н.П., С.Ш., М.С. и С.С., поради постоење на основано сомнение дека сториле кривични дела здружение за извршување на кривични дела во врска со кривичното дело на неовластено производство и пуштање во промет наркотични дроги.

Осомничените се обвинети за формирање организирана криминална група во Јужна Америка, Западна Европа, Република Грција и Република Србија во 2020 и 2021 година со цел купување и пренесување на поголема количина на наркотична дрога кокаин преку океански бродови од Јужна Америка на територијата на Западна Европа и Република Србија заради пуштање во оптек и прибавување голема противправна имотна корист, пишува српски Блиц.

И дека во наведениот временски период оваа организирана криминална група купила, пренела и задржала на продажба 324 килограми наркотична дрога кокаин, од Еквадор до пристаништето во Солун во Грција, каде наведената наркотична дрога била запленета од грчката полиција.

Осомничените се приведени во полиција, по што со кривична пријава ќе бидат изведени во јавното обвинителство за организиран криминал, објавија српските медиуми.

Шпанската национална полиција, со помош на Европол, уапси 27 лица за перење на повеќе од 65 милиони евра профит од трговија со дрога.

Криминалната мрежа била составена од албански и кинески државјани кои се занимавале со производство и трговија со дрога, како и со перење пари, се наведува во соопштението на Европол.

Мрежата оперирала преку нелегално правно лице преку кое вршела трансфери и прикрила големи суми пари од продажба на дрога, со кои се финансирале нови криминални операции.

При претрес на имотот на уапсените запленети се луксузни часовници и накит во вредност од над 400.000 евра, како и автомобили, телефони и 615.000 евра во кеш.

Истражителите веруваат дека криминалната мрежа испрала повеќе од 65 милиони евра за помалку од една година, од мај 2020 до март 2021 година.

Две лица загинаа, а две се повредени во пукање во паб во градот Сандвикен, на истокот на Шведска.

Полицијата верува дека само едно лице било цел и дека пукањето е поврзано со банда.

Истрагата е во тек, а засега никој не е уапсен, пренесуваат медиумите во регионот.

Осомничениот дошол во ресторанот со автомобил, влегол и почнал да пука.

Според полицијата, загинале двајца мажи на возраст од 20 и 70 години, а повредени се една жена на 20-годишна возраст и еден маж на возраст од приближно 45 години.

Шведска во последните години беше погодена од бран престрелки, кои се засилија во последните месеци.