Пeкинг нема намера да води ниту студена ниту жешка војна со која било земја, порача кинескиот претседател Шји Џјинпинг пред Генералното собрание на ООН во време на зголемени тензии меѓу Кина и САД.

„Ќе продолжиме да ги намалуваме разликите и ќе ги решаваме споровите со другите преку дијалог и преговори. Ние нема да работиме само за наша сопствена корист“, рече Шји во претходно снимениот говор на годишниот собир на светските лидери, кој се одржа виртуелно поради пандемијата.

Продолжените тензии меѓу САД и Кина зовриваа во времето на пандемијата и предупредуваа на желбата на Пекинг да преземе поголема мултилатерална улога и со тоа да се спротивстави на традиционалната лидерска улога на Вашингтон.

Бидејќи коронавирусот првпат се појави во Кина, Вашингтон го обвинува Пекинг за влошување на ширењето на епидемијата поради недостиг на транспарентност.

Кинескиот претседател во својот говор го повика светот да одговори на вирусот на глобално ниво и да ѝ ја препушти водечката улога на Светската здравствена организација.

Шест недели пред претседателските избори речиси 200.000 луѓе починаа од Ковид-19 во САД до денес, објави Универзитетот „Џон Хопкинс“.

Според истиот извор, од 6,9 милиони заболени до утрово, починале 200.005 луѓе, а САД се меѓу најпогодените земји од новата пандемија на коронавирусот.

„Ковид-19 ќе биде трета водечка причина за смртност во САД оваа година и ќе ги надмине несреќите, мозочните удари и Алцхајмеровата болест. Ние го потценуваме овој вирус на наша штета и на штета на оние што се погодени од нашите одлуки“, рече Том Фриден, поранешен директор на Центарот за контрола и превенција на болестите (ЦДЦ).

Пред Ковид-19 причинители на смрт се само карциномот и кардиоваскуларните заболувања.

Францускиот претседател, Емануел Макрон, побара од Русија итно да го објасни случајот за наводното труење на критичарот на Кремљ, Алексај Навални.

Тој порача дека Париз нема да дозволи да се поминат црвените линии во поглед на употребата на хемиско оружје.

„Нема да толерираме употреба на хемиско оружје во Европа, Руисја или Сирија. Ова појаснување мора да биде брзо и беспрекорно бидејќи ќе ги примениме нашите црвени линии“, истакна Макрон на Генералното собрание на ОН.

Сепак, не прецизира што точно ќе биде направено доколку Русија не даде задоволително објаснување. Кремљ негира каква било вмешаност во наводното труење на Навални.

Берлин тврди дека резултатите на три лаборатории покажуваат оти е отруен со нервен агенс „новичок“, што Москва го негира.