Претседателот на Либан, Мишел Аун, не ја отфрла можноста за надворешна вмешаност во катастрофалната експлозија во главниот град Бејрут велејќи дека истражителите вршат увид дали во инцидентот биле користени ракета или бомба, пренесува „Спутник“.

Според изјавата на Аун издадена од неговиот кабинет, истрагата за смртоносната експлозија е поделена во три фази.

„Прво, како експлозивниот материјал влегол во земјата и бил складиран… второ, дали експлозијата е резултат на небрежност или несреќа… и, трето, можност дека имало надворешно мешање“, се вели во соопштението.

Аун додаде дека го замолил францускиот претседател, Емануел Макрон, да му обезбеди на Либан воздушни фотографии за да утврди дали има докази за авиони или ракети. Тој истакна дека ако не ги добие од Париз, Бејрут ќе побара од другите земји да го сторат тоа.

Голема експлозија се случи на пристаништето во Бејрут доцна на 4 август и зафати речиси половина од главниот град. До денес бројот на загинатите порасна на 154 и повредени се речиси 5.000, од кои 120 се во критична состојба.

Според либанските власти, експлозијата била поврзана со неправилно складирање 2.750 тони амониумнитрат во пристаништето. Тридневната жалост за жртвите од трагедијата почна во средата, а во тек е и дводневна вонредна состојба во Бејрут, со можно продолжување.