Потпретседателот на Владата и министер за простор, градителство и државeн имот, Бранко Башиќ со претставници на Град Загреб и стручњаци од Хрватскиот центар за сеизмичко инженерство соопшти дека култниот загрепски небодер Вјесник ќе се руши поради небезбедна конструкција.

Башиќ изјави дека извештајот на стручњаците укажува на сериозни статички оштетувања и опасност од урнување поради што ќе се изработи проект за уривање, а потоа ќе следи јавна набавка и самиот процес на рушење. Славонска авенија и подвозникот остануваат затворени до отстранување на објектот.

Стручњакот Марио Урош од Центарот за сеизмичко инженерство предупреди дека конструкцијата е делумно нестабилна поради оштетувањата од пожар, пукнатини и отпаѓање на елементи. Според него, потребно е итно уривање бидејќи опасноста со текот на времето расте.

Владата најави дека ќе се утврдат роковите за рушење и дека потоа ќе се уредува просторот на поранешниот Вјесник, со можен архитектонски конкурс. Стручните служби и полицијата ќе извршат увид, но екипите нема да престојуваат подолго во објектот поради ризикот.

Украинските контранападни сили тврдат дека ги истерале руските трупи од централниот дел на Покровск, пренесе „Kиев пост“. Седмата воздушно-јуришниот корпус соопшти дека пешадиските тимови, со поддршка од дронови и артилерија, ги исчистиле клучните точки во градот, вклучувајќи ја железничката станица и централниот плоштад.

Командирот Валентин Манко изјави дека „центарот е исчистен“, но операциите за чистење продолжуваат. Според украински извори, руските сили се повлечени кон јужните квартови, каде напредокот е побавен и каде руските единици се под притисок и без можност за снабдување.

Русија во своето утринско соопштение не ги спомна директно борбите во Покровск, наведувајќи само дека одбила неколку украински напади. Украинскиот Генералштаб ги опиша борбите во овој сектор како меѓу најинтензивните на фронтот во последните 24 часа.

Дел од украинските аналитичари и извори предупредуваат на претпазливост, истакнувајќи дека битката не е завршена и дека има спротивставени информации за состојбата на терен.

Францускиот претседател Емануел Макрон во четврток ќе го претстави нов модел на доброволен воен рок, пренесе „Политико“. Проектот не предвидува враќање на задолжителното регрутирање, туку обука што ќе ги насочи доброволците кон активниот состав или резервата.

Потегот доаѓа поради растечката руска закана, а планот има широка политичка поддршка. Елисејската палата соопшти дека за реформата ќе бидат потребни законски измени и дека ажурираниот закон за воено планирање ќе биде претставен до 21 декември.

Франција има цел до 2035 година да формира резервен состав од 105.000 лица, значително повеќе од околу 44.000 во 2024 година.