Украинскиот претседател, Володимир Зеленски, денеска, по повод Денот на вооружените сили, изјави дека украинските вооружени сили можат да го одбијат секој руски напад.

„Припадниците на вооружените сили на Украина ќе продолжат да ја исполнуваат својата најважна мисија – да ги бранат слободата и суверенитетот на државата од рускиот агресор“, рече Зеленски во изјавата.

„Украинската армија верува во сопствената сила и може да спречи каков било план за освојување од страна на непријателот“, додаде тој.

Русија собира големи воени сили во близина на границата со Украина, но ги отфрла обвинувањата дека подготвува офанзива.

Украина денеска ја одбележува 30-годишнината од основањето на независна армија, откако во 1991 година прогласи независност од поранешниот Советски Сојуз.

По тој повод во Киев, Лавов и Одеса на јавноста ќе ѝ бидат претставени американски воени возила „Хамви“. Во Одеса ќе се одржи свечено предавање на неодамна испорачаните патролни бродови на американската крајбрежна стража, што ќе ги зајакнат капацитетите на украинската воена морнарица.

Украина го повикува НАТО да го забрза нејзиното пристапување, но лидерите на НАТО прво бараат реформи и сузбивање на корупцијата.

Москва го предупредува Западот да не ги преминува црвените линии и да го запре ширењето на НАТО кон исток.

Новиот канцелар Карл Нехамер и новите министри во австриската влада денеска положија заклетва пред претседателот на Австрија, Александер ван дер Белен.

Поранешниот канцелар Александeр Шаленберг, кој во историските анали влегува како канцелар со најкраток мандат од 52 дена, положи заклетва како нов министер за надворешни работи.

Така Шаленберг се враќа на чело на ресорот што го водеше пред оставката на Себастијан Курц.

Освен тоа, заклетва дадоа и новиот министер за внатрешни работи – Герхард Карнер, министерот за финансии – Магнус Брунер и министерот за образование и наука – Мартин Полашек.

Заклетва даде и најмладата членка на владата – Клаудија Плаколм, која преку функцијата државен секретар во кабинетот на канцеларот ќе се занимава со проблемите на младите.

Новите членови на австриската влада нема да имаат време да се запознаат со работата, туку ќе мора веднаш да почнат со своите задолженија.

Претседателскиот кандидат на крајната десница, Ерик Земур, беше нападнат на неговиот прв предизборен митинг во Франција, пренесуваат француските медиуми.

Додека 63-годишникот се движел низ толпата кон бината, маж за момент го фатил за вратот пред да интервенираат полицајците од обезбедувањето.

Локалните медиуми јавуваат дека на Земур му бил повреден зглобот и дека лекарите му препишале девет дена одмор.

pic.twitter.com/vYFcTejzPC

— H_Russia (@H_Russia) December 5, 2021

Поранешниот новинар е познат по своите контроверзни ставови за мигрантите и за Втората светска војна.

По неколку недели шпекулации, Земур минатата недела ја објави својата кандидатура за претседателските избори во Франција во 2022 година.

Инцидентот, во кој беше нападнат Земур, е еден од неколкуте насилни судири за време на настанот одржан во неделата вечерта во конгресниот центар североисточно од Париз.

WARNING: GRAPHIC CONTENT – French far-right presidential candidate Eric Zemmour promised a ‘reconquest’ against decades of decline at his first political rally, as scuffles with anti-racism protesters broke out on its fringes https://t.co/J19m7HELcV pic.twitter.com/Hjp25UTG0P

— Reuters (@Reuters) December 6, 2021

Според локалните медиуми, на митингот присуствувале околу 10.000 луѓе. Наводно, илјадници демонстранти против екстремно десничарскиот политичар маршираа низ градот, а полицијата уапси десетици пред местото на настанот.

Земур бил нападнат додека поминувал низ толпата. Полицијата бргу го уапсила напаѓачот, а портпаролот на партијата на Земур за весникот „Фигаро“ изјавил дека планираат да поднесат правна жалба и ја пофалил храброста на Земур што одржал говор по инцидентот.

Додека го почнуваше говорот, неговите поддржувачи фрлаа столови кон демонстрантите, кои станаа облечени во маици со антирасистички пароли.

„Ако победам на овие избори, тоа нема да биде уште една ротација на власта, туку повторно освојување на најголемата земја во светот“, им порача тој на насобраните за време на говорот.