Полицијата вооружена со копачи и со електричен алат уништила современо уметничко дело од еден познат британски скулптор на Малдивите кога претседателот во заминување на овој туристички рај изјавил дека уметничката инсталација е навредлива за исламот, пренесува „Брејтбарт“.

Абдула Јамин нареди скулптурите да бидат уништени уште во јули, но неговата наредба не беше спроведена до петокот пред претседателските избори што ги загуби од либералниот кандидат. Серијата статуи од Џејсон де Кеирес Тејлор беа поставени во полупотопена метална коцка во јули во едно одморалиште на Малдивите, архипелаг на кој живеат 340.000 сунитски муслимани.

Исламот, официјалната религија на Малдивите, го забранува прикажувањето идоли, а делото предизвика критики од свештениците иако статуите немаат религиозни симболи или значења. Јамин во јули рече дека јавното чувство против уметничкото дело, познато како „Коралариум“, ја поттикнало неговата одлука да го уништи.

Не е јасно зошто скулптурите не беа отстранети од водите до петокот. Полицијата беше фотографирана додека ги отстрануваше од големиот и раскошен кафез во кои беа сместени.

„Бев шокирана и скршена кога дознав дека моите скулптури биле уништени од властите на Малдивите и покрај континуираните консултации и дијалог. ‘Коралариумот’ беше создаден за поврзување на луѓето со животната средина и негување на просторот за морскиот живот да напредува. Ништо друго! Малдивите сè уште се убави, со топло и пријателско население, но ова беше тажен ден за уметноста и тажен ден за животната средина“, изјави Де Каирес Тејлор.

Увозот на статуи е забранет на Малдивите. Забранети се дури и статуите на Буда и покрај долгото наследство на будизмот на островите пред исламот да доминира во архипелагот.