Свет
Маск, Цукерберг и Гејтс разговараа за регулирање на вештачката интелигенција со конгресмени во САД

Извршниот директор на Тесла, Илон Маск, извршниот директор на Мета, Марк Цукерберг и извршниот директор на Алфабет, Сундар Пичаи, денеска се сретнаа со американски конгресмени во Капитол на затворен форум за регулирање на вештачката интелигенција.
Законодавците разгледуваат начини да ги ублажат опасностите од новата технологија, која доживеа бум во инвестициите и популарноста кај потрошувачите по објавувањето на ЧатГПТ на ОпенАИ.
„За нас е важно да имаме судија“, им рече Маск на новинарите, додавајќи дека регулаторот е потребен „за да се осигура дека компаниите преземаат активности кои се безбедни и од општ јавен интерес“.
Сенаторот од Њу Џерси, Кори Букер, ја пофали дебатата, истакнувајќи дека сите учесници се согласија „владата да има регулаторна улога“, но изработката на закони ќе биде предизвик.
Законодавците сакаат заштитни мерки против потенцијално опасни „дипфејк“ видеа, мешање во изборите и напади врз критичната инфраструктура.
„Денес започнуваме огромен, комплексен и витален потфат: градење на основата за надпартиска политика за вештачка интелигенција што Конгресот може да ја усвои“, рече лидерот на демократите во американскиот Сенат, Чак Шумер во своето воведно обраќање.
„Конгресот мора да игра улога бидејќи без Конгресот нема да ги максимизираме придобивките од вештачката интелигенција или да ги минимизираме ризиците“, додаде тој.
На состанокот, меѓу другите, беа шефот на Нвидиа, Џенсен Хуанг, првиот човек на Микрософт, Сатја Надела, ИБМ, Арвинд Кришна, поранешниот шеф на Микрософт, Бил Гејтс и други.
Шумер, кој разговараше за вештачката интелигенција со Маск во април, рече дека учесниците ќе разговараат „зошто Конгресот треба да дејствува, кои прашања да ги поставуваат и како да се изгради консензус за безбедни иновации“.
Маск и другите технолошки лидери и експерти за вештачка интелигенција повикаа во март на шестмесечна пауза во развојот на системи за вештачка интелигенција понапредни од ГПТ-4 на ОпенАИ поради потенцијалните ризици за општеството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Германија воведува гранични контроли со Полска и Чешка

Германската министерка за внатрешни работи Ненси Фезер најави воведување гранични контроли на границата со Полска и Чешка, како што пренесоа денеска германските медиуми.
„Мислам дека сега треба да бидеме прагматични и да воведеме стационарни гранични контроли на границите со Полска и Чешка“, рече Фезерво интервју за весникот „Велт ам Зонтаг“. .
Таа нагласи дека веќе има длабински контроли во пограничните области, кои ќе бидат надополнети со стационарни контроли на самата граница. Истовремено, Фезер рече дека не треба да се очекува дека воведувањето постојани гранични контроли кон Полска и Чешка ќе го реши проблемот со илегалната миграција.
„Сакаме да го намалиме бројот на бегалци кои доаѓаат во Германија“
„Ова е само еден од инструментите што треба да придонесат за намалување на бројот на бегалци кои доаѓаат во Германија“, изјави министерката.
Фезер со месеци го одбиваше барањето на опозицијата и сојузните покраини на истокот на Германија, кои се под напад на се посилниот бегалски бран кои во последно време сè почесто пристигнуваат преку Чешка и пред се Полска. Од 2015 година вакви контроли има и на германско-австриските гранични премини.
Најавата на Фезер дека сепак ќе воведе контрола кон Полска и Чешка беше поздравена од полициските синдикати, како и од демохристијанската опозиција.
Како што информираат од јавниот сервис АРД, т.н Балканската рута до Германија води преку Унгарија и понатаму Словачка, Чешка или Полска. Причините за промената на рутата се зголемената контрола на хрватската граница со Босна и Херцеговина, како и построгиот режим за регистрација на бегалците во Австрија.
„Договорот ЕУ-Турција во моментов не функционира добро“
Фезер рече дека една од причините за зголемувањето на бројот на бегалци е фактот што договорот меѓу Европската унија и Турција за спречување на заминувањето на бегалците во ЕУ „во моментов не функционира добро“.
Борбата за намалување на бројот на бегалци е главна општествено-политичка тема во Германија последниве денови, а власта и сигнализираше на опозицијата дека се залага за меѓупартиско решение на ова прашање.
Во првите осум месеци од годинава во Германија пристигнале над 200.000 бегалци, што е повеќе отколку во цела година лани, а властите стравуваат дека бројките би можеле да ги достигнат размерите на кризните години 2015 и 2016 година, кога над милиони бегалци пристигнаа во Германија, главно од Сирија.
Градовите и општините со месеци испраќаат апели до федералната влада да го запре приливот на бегалци поради преполните капацитети за прифаќање и прекршување на финансиските рамки.
Свет
Ужас во Јужна Африка: мажи им продавале на деца мафини со дрога, 90 завршија во болница

Двајца мажи се соочуваат со повеќе обвиненија за обид за убиство во Јужна Африка, откако околу 90 деца завршиле во болница по конзумирање на мафини со дрога.
Официјалните лица рекоа дека децата ги купиле мафините од уличен продавач на пат кон основното училиште Пуламадибого, северозападно од Преторија.
Голем број од нив се пренесени во болница поради гадење, болки во стомакот и повраќање, а три девојчиња се уште се во болница.
Двајца осомничени на возраст од 21 и 19 години се обвинети за убиство во обид.
Одделот за образование во провинцијата Гаутенг соопшти дека наставниците се јавиле на 911 кога забележале дека децата почнале да „се однесуваат чудно“ на часовите.
Во соопштението се наведува дека инцидентот предизвикал голема загриженост кај родителите за безбедноста на нивните деца.
Полицијата, која прави токсиколошки извештај за да потврди дали е користен канабис, вели дека на повеќе од 90 ученици им биле дадени мафините и имале „сериозни болки“.
Сите се препратени во околните здравствени установи, 87 се пуштени, а само три ученички се уште се во болница каде што ја добиваат потребната лекарска помош, соопшти Министерството за образование.
Полицијата ги именувала осомничените Офентсе Малулека (21) и Амукелани Ниулунга (19).
Тие вчера се појавија пред судот во Сошангуве и одреден им е притвор.
Свет
Украински генерал: Се пробивме кај клучна населба, продолжуваме да напредуваме

Украински генерал кој води контраофанзива долж јужниот фронт вели дека неговите сили се пробиле до клучната населба Вербова и предвидува уште поголем пробив.
„На левото крило, кај селото Вербове, имаме пробив и продолжуваме да напредуваме“, рече генералот Олександар Тарнавски за дописникот на „Си-Ен-Ен“ за време на синоќешното интервју. Но, тој призна дека напредувањето е побавно од очекуваното.
„Не оди толку брзо како што се очекуваше, не е како во филмовите од Втората светска војна“, рече тој. „Главната работа е да не ја изгубиме оваа иницијатива што ја имаме. Мора да го задржиме тоа што го имаме“.
Тврдењето на генералот е најновата индикација на украинските власти дека се постигнува напредок на јужниот фронт во војната со Русија. Украинските сили во последните недели тврдеа дека ја пробиле првата линија на руската одбрана во регионот Запорожје.
Службениците назначени од Русија во окупираниот дел на регионот Запорожје дадоа поинаква слика за борбите. Си-Ен-Ен не може да ги потврди извештаите на бојното поле од ниту една страна. Сепак, анализата на достапните видеа од отворени извори сугерира дека некои украински единици преминале важна линија на руската одбрана во близина на селото Вербове.
Долгорочната цел на Украина е да го пресече рускиот „копнен мост“ што ја поврзува територијата што ја држи на исток со анектираниот Крим.
На почетокот на септември, украинските сили рекоа дека го зазеле селото Роботин и дека се движат на исток кон селото Новопрокопивка.
Сепак, Тарнавски изјави за Си-Ен-Ен дека верува дека големиот пробив на контраофанзивата ќе биде доколку Украина успее да го ослободи Токмак, стратешкиот центар на руските сили, кој е прва и главна цел во нејзината борба на југот.
Си-Ен-Ен претходно оваа недела објави дека украинските сили се уште се на околу 20 километри од Токмак и се борат да пробијат повеќе слоеви на руската одбрана. Верувам дека ќе видиме голем напредок“, рече Тарнавски. „Мислам дека тоа ќе се случи по Токмак. Во моментов (Русите) се потпираат на длабочината на нивната одбранбена линија таму“.
„Постојат мали, но опасни групи на непријателски одбранбени сили кои во моментов се распоредени многу прецизно и компетентно“, рече тој. „Но, акциите на нашите борци ги принудуваат да се повлечат полека кога ќе се соочат со нашите напаѓачки одреди“.
Генералот призна дека за успех на контраофанзивата, украинските сили треба барем да стигнат до градот Токмак. „Тоа е минималната цел“, рече тој.
И покрај тоа што призна дека напредувањето не оди „брзо како што се очекува“, Тарнавски рече дека зимата нема да ја забави контраофанзивата. Обилните дождови наесен може да го навлажнат теренот во Украина и да го отежнат движењето на тешките возила како тенкови, но Тарнавски вели дека украинските сили се движат во мали групи, главно пеш.
„Времето може да биде сериозна пречка за време на напредувањето, но со оглед на тоа како напредуваме, главно без возила, мислам дека времето нема многу да влијае на контраофанзивата“, рече генералот во интервју за Си-Ен-Ен.
„Во овој момент ниту непријателот ниту ние не користиме големи формации, чети, баталјони или бригади. Користиме јуришни одреди, групи од 10 до 15 луѓе“, објасни тој.
Една од причините за бавниот напредок, рече генералот, е фактот што Русија успеа да извлече лекции од другите украински офанзиви.
„Русите учат доста брзо бидејќи немаат друг избор. Ако не научат, побрзо ќе бидат поразени“, објасни тој. „Не би рекол дека се прилагодуваат на нашите постапки, бидејќи и ние ја менуваме тактиката.
Тој рече дека Украина исто така се прилагодува на употребата на западната опрема, како и на западните тактики.