Во Италија, во последните 24 часа се регистрирани 239 нови случаи на коронавирус, осум лица починаа и сите се од регионот Ломбардија, која во врвот на пандемијата, беше епицентар на заразата.

Тестирани се 43.269 лица, а вкупно 6.916.765 лица се тестирани од почетокот на пандемијата на коронавирус.

Во моментов, на целата територија има 12.456 позитивни лица.

Владиниот техничко-научен комитет тврди дека епидемиолошката состојба е под контрола, а само Ломбардија регистрира смртни случаи. Од граѓаните се бара да ги почитуваат мерките за заштита, да носат маски, да одржуваат физичка дистанца и мерки за лична хигиена.

Група од 59 мигранти избегала од карантин во спортска сала во Шпанија, откако било утврдено дека тие биле во контакт со лица заразени од ковид-19.

Властите објавија дека на мигрантите им бил пропишан карантин од 14 дена во спортска сала кај градот Картагена, пишува „Ла Вердад“.

Полицијата досега успеала да пронајде и да врати 15 избегани мигранти.

Тие пристигнале во Шпанија со брод минатата недела преку Медитеранот во поголема група.

Австриските власти соопштија дека еден од вработените во Владата е позитивен на Ковид-19, но тој не работел непосредно со канцеларот Себастијан Курц.

Од Владата соопштија дека сите кои работеле со лицето позитивно на коронавирусот се негативни и дека нивната работа не е загрозена.

Курц редовно се тестира за Ковид-19, пренесуваат странските агенции.

Одговорот на Австрија на пандемијата се смета за релативно успешен, а неодамна, по растот на бројот на заболени беа заострени правилата за носење маска.

Според податоците на Универзитетот Џон Хопкинс, во Австрија од почетокот на пандемијата починале 718 лица.