Украинскиот претседател Володимир Зеленски ја критикуваше средбата на американскиот и рускиот претставник во Ријад, нарекувајќи ја „разговори за Украина без Украина“.

Медиумите потсетуваат дека ниту еден украински функционер не беше поканет на преговорите.

Зеленски зборуваше на прес-конференција во турската престолнина Анкара, каде што се сретна со турскиот претседател Реџеп Таип Ердоган.

„Денеска детално разговаравме за глобалните процеси кои би можеле да доведат до крај на оваа војна“, рече Зеленски и додаде дека разгледале различни можности.

Тој нагласи дека „од суштинско значење е какви било разговори за завршување на војната да не се водат зад грбот на страните директно вклучени во неа“. За траен мир, рече тој, важно е да не се прават грешки. Сите страни мора да бидат на преговарачка маса – Америка, Европа и Украина“, заклучи Зеленски.

Зеленски најави откажување на посетата на Саудиска Арабија која беше планирана за утре.

Украинскиот лидер ова го изјави за време на заедничката прес-конференција со турскиот претседател Реџеп Таип Ердоган во Анкара, пренесува Укринформ.

„Одлуките за тоа како да се стави крај на војната во Украина не може да се донесат без Украина, ниту може да ни се наметнат одредени услови. Не бевме поканети на оваа руско-американска средба во Саудиска Арабија – тоа беше изненадување за нас, како, верувам, и за многу други.

Тврди дека за руско-американската средба дознале од медиумите.

„Ние дознавме за состанокот од медиумите. Не знам кој ќе остане таму, кој ќе замине или кој планира да оди. Искрено, не ми е ни гајле. Она што ми е важно е како нашите партнери не доживуваат. И ние сме апсолутно искрени и транспарентни. Не сакам никакви недоразбирања, поради што нема да одам во Саудиска Арабија“ изјави Зеленски одговарајќи на прашање на новинар на Укринформ.

Американскиот државен секретар Марко Рубио денеска изјави дека мирот во Украина е клучот за отворање економски можности со Русија.

По преговорите меѓу делегациите на САД и Русија за Украина во Ријад, тој рече дека дел од фокусот е да се осигура дека дипломатските претставништва можат да функционираат и да одржуваат живи дипломатски односи и дека друг елемент на состанокот е спроведувањето на мировните преговори за Украина, кои, според него, ќе вклучуваат „ангажман и консултации“ со Украина и „партнерите во Европа“.

Како трета тема, Рубио го истакна создавањето на извонредна можност, доколку овој конфликт дојде до прифатлив крај, односно да се обедини со Русите геополитички, за прашања од заеднички интерес и економски, пренесува Гардијан.

„Се надеваме дека дипломатскиот дел ќе започне доста брзо, бидејќи вклучува ангажман на нашите мисии“, изјави Рубио на прес-конференцијата на американската делегација, пренесува Танјуг.

Рубио рече дека претседателот на Соединетите Американски Држави е единствениот лидер кој може да донесе мир во Украина. Тој рече дека завршувањето на украинскиот конфликт мора да биде прифатливо за сите инволвирани страни, вклучувајќи ги Украина, Европа и Русија.

„Целта е да се обезбеди мир за Украина кој е праведен, траен, одржлив и прифатлив за сите вклучени страни“, рече тој, според Скај њуз. Рубио рече дека „останува уште многу работа“ и дека целта на денешната средба е „воспоставување линии на комуникација“ по долгиот молк меѓу Вашингтон и Москва.

Тој исто така изрази уверување дека Русија сака да постигне договор. Во денешните преговори меѓу САД и Русија за Украина, руската делегација ја сочинуваа министерот за надворешни работи Сергеј Лавров, помошникот на претседателот Јуриј Ушаков и директорот на рускиот Фонд за директни инвестиции Кирил Дмитријев, а американската делегација ја сочинуваа Рубио, советникот за национална безбедност на американскиот претседател Доналд Трамп, Мајк Волц, и американскиот специјален пратеник за Блискиот Исток, Стивенитко.

Русија сака НАТО да го повлече ветувањето од 2008 година дека еден ден ќе ѝ даде на Украина членство во воената алијанса предводена од САД, а Киев да се согласи на неутралност, изјави портпаролката на руското Министерство за надворешни работи, Марија Захарова.

Членството на Украина во НАТО е неприфатливо за Русија, рече таа.

„Треба да се нагласи дека сега не е доволно одбивањето да се прими Киев во НАТО“, рече Захарова во одговор на прашање на Ројтерс.

„Алијансата мора да го повлече ветувањето од 2008 година во Букурешт, во спротивно овој проблем ќе продолжи да ја труе атмосферата на европскиот континент“, рече таа.

Захарова додаде дека Украина мора да се врати на позицијата утврдена во нејзината декларација за суверенитет против Советскиот Сојуз во 1990 година, во која Киев рече дека ќе стане трајно неутрална земја, која нема да учествува во воени блокови или да поседува нуклеарно оружје.

„Она што Украина треба да го направи е да се врати на корените на својата државност и да го следи словото и духот на (тие) документи“, рече Захарова.

„Тоа би била најдобрата гаранција за нејзината безбедност“, рече таа, додавајќи дека ниту членството во НАТО, ниту западната интервенција „под маската на мировен контингент“ нема да ѝ дадат таква безбедност на Украина.

НАТО објави на самитот во Букурешт во април 2008 година дека и Украина и Грузија ќе се приклучат на алијансата предводена од САД, но не даде временска рамка или план за постигнување на таа цел.

Русија постојано го наведува постсоветското проширување на НАТО, а особено амбициите на Украина за членство, како причина за војната во Украина.