Францускиот претседател Емануел Макрон прогласи каратин од петок што ќе трае најмалку до 1 декември.

„Бранот се рашири низ цела Европа, несомнено ќе биде посилен и поубиствен од првиот“

„Вирусот циркулира со брзина што не ја предвидуваат ниту најпесимистичките прогнози“, рече Макрон на почетокот на своето обраќање. Тој рече дека сите француски региони се во црвено.

„Бранот ја зафаќа цела Европа. Дали сторивме сè како што треба? Не. Но, направивме се што можеме. Нашата стратегија, со оглед на информациите што ги имавме, беше вистинската“.

Тој рече дека Франција е преплавена од втор бран „кој несомнено ќе биде помоќен и поубиствен од првиот“. Изрази увереност дека 9000 пациенти ќе бидат на интензивна нега до средината на ноември, што би значело дека капацитетите ќе бидат речиси полни.

„Вирусот ги погодува сите генерации“, рече Макрон, нагласувајќи дека задачата е да се заштитат оние кои обезбедуваат грижа за болните.

„Треба да ја заштитиме економијата“, рече Макрон, додавајќи дека рамнотежата е важна, меѓутоа, ништо не е поважно од човечките животи.

„Франција никогаш нема да усвои стратегија на колективен имунитет. Оваа опција ќе доведе до скоро 400.000 дополнителни смртни случаи”, рече францускиот претседател.

Карантин од петок, на луѓето ќе им биде дозволено да го напуштат домот само од оправдани причини

Макрон прогласи карантин, почнувајќи од петок. Според новите мерки, на луѓето ќе им биде дозволено да ја напуштаат куќата само заради неопходни обврски, работа или од здравствени причини. Во секој од овие случаи, луѓето ќе мора да пополнат образец за да го оправдаат напуштањето.

Карантинот вклучува и забрана за собирање.

Училиштата ќе останат отворени, како и градинките.

Макрон објасни дека карантинот ќе трае најмалку до 1 декември. Тој се надева на вакцина во текот на летото, повикувајќи се на проценки на научници.

„Имам доверба во нас. Ќе се издигнеме уште еднаш и ќе бидеме обединети. Да живее Република и да живее Франција”, го заврши Макрон своето телевизиско обраќање во живо.

Најавата на Макрон за карантин доаѓа по рекордните бројки на заразени во земјата.

Италија и денес забележа рекорден број на заразени со коронавирус. Земјата регистрираше 24.991 нови случаи на коронавирус во изминатите 24 часа, а 205 лица починаа како резултат на Ковид-19, соопшти Министерството за здравство.

Ова го сруши вчерашниот црн рекорд кога беа евидентирани 21.994 нови случаи, пренесува „Ројтерс“.

Вкупно 37.905 лица починаа во Италија од коронавирус, додека досега како позитивни се регистрирани 589.766 случаи.

Северниот регион Ломбардија и натаму е најтешко погоден, со регистрирани 7.558 нови случаи во последните 24 часа, за разлика од вчерашните 5.035.

Шведска, чијашто либерална стратегија за пандемијата привлече глобално внимание, регистрираше 1.980 нови случаи на коронавирус на 27 октомври, најголем број од почетокот на пандемијата, покажуваат податоците на шведската агенција за јавно здравје.

Претходниот најголем број на новозаразени во еден ден се случи на 23 октомври, кога имаше 1.870 позитивни случаи.

Јавната здравствена служба соопшти дека највисокиот дневен број на новозаразени во текот на пролетта, веројатно, бил многу поголем, но тоа не е забележано поради недоволно тестирање во тоа време.

Шведска исто така регистрираше 9 нови смртни случаи, со што вкупниот број на смртни случаи во земјата се зголеми на 5.927.

Шведска има неколку пати поголема стапка на смртност по глава на жител од нејзините нордиски соседи, но пониска од некои поголеми европски земји како Шпанија и Велика Британија.