Најмалку 220.000 домови денеска останаа без електрична енергија во југозападна Франција кога силен ветер со брзина и до 140 километри на час предизвика големи проблеми, но без посериозни штети.

Според првичните податоци на итните служби, четири лица се повредени кога дрвја паднале врз нивните возила, од кои три полесно во Нова Аквитанија.

Дождот и ветрот во текот на ноќта достигнале кулминација на атлантскиот брег со јачина од 143 километри на час во местото Милау.

За време на најлошиот дел од ноќта, 400.000 домови останале без струја, соопшти компанијата за дистрибуција на електрична енергија „Енедис“.

Од 14 департмани на југозападот од земјата, кои вчера прогласија портокалов аларм, тој и натаму е во сила во осум од нив, главно поради ветер и излевање на реките, соопштија службите.

Од кабинетот на германската канцеларка, Ангела Меркел, му ја честитаа победата на изборите на британскиот премиер Борис Џонсон.

„Честитки до Борис Џонсон за сјајната победа. Се радувам што ќе соработувам со вас за пријателство и силна соработка меѓу нашите народи“, твитуваше портпаролката на Ангела Меркел.

Другите членови на партијата на канцеларката беа помалку ентузијасти, пренесува „Ројтерс“.

Пратеникот Норберт Ротген изјави дека Британците ја донеле одлуката и дека нивниот избор треба да биде прифатен.

„Со победата на Џонсон, брегзитот стана неизбежен“, рече Ротген.

Чешката полиција обвини 58 лица за помагање меѓународна криминална група при шверц на големи количини кокаин и хероин во вредност од 90 милиони долари во Австралија и Нов Зеланд.

Криминалната група функционирала на четири континенти, а во Чешка регрутирала курири за транспорт на дрога вредна 2,1 милијарди чешки круни од земји што биле во близина на местото на производство, соопшти полицијата.

Чешката полиција ја спроведе операцијата во соработка со колеги од САД и Австралија.

Четворица курири се уапсени во Австралија и веќе се осудени на казна затвор меѓу седум и девет години, пренесе „Ројтерс“.