САД, Европската Унија, Велика Британија и Канада воведоа нови санкции за белоруски физички и правни лица.

САД воведоа ограничувања за 20 физички лица и 12 ентитети, се наведува на веб-страницата на американското Министерство за финансии, пренесува „Ројтерс“.

Европската унија воведе санкции за белоруската државна авиокомпанија „Белавија“, обвинувајќи ја компанијата дека ги користи трансферите на мигранти како тактика за дестабилизација на европските земји. Новите санкции на ЕУ беа одобрени минатиот месец и стапија на сила во четвртокот, по нивното објавување во Службениот весник на ЕУ. Властите на ЕУ ставија на црната листа 17 физички лица и 11 деловни субјекти, вклучувајќи судии и високи белоруски функционери, а санкциите вклучуваат замрзнување на средствата и забрана за патување.

Санкциите против „Белавија“ значат дека компаниите од ЕУ повеќе не можат да изнајмуваат авиони на белоруските авиокомпании, изјавија претставници на ЕУ. Се уште не е познато дали „Белавија“ ќе мора да врати 17 авиони изнајмени од авиокомпании во Ирска.

„Белавија“, на која веќе и беше забрането да лета над ЕУ претходно оваа година, лета до дестинации како Египет, Јордан, Обединетите Арапски Емирати, Ерменија, Грузија, Азербејџан, Узбекистан и Казахстан.

Велика Британија воведе нови санкции за белоруски физички и правни лица и ги замрзна средствата на еден од најголемите светски производители на ѓубрива – OJSC Belaruskali.

„ Овие санкции продолжуваат да таргетираат важни извори на приходи за режимот на Александар Лукашенко и ставаат строги ограничувања на одговорните за некои од најлошите антидемократски дејствија во Белорусија“, рече британската министерка за надворешни работи Лиз Трас.

Канада воведе нови санкции за белоруски функционери и субјекти во координација со меѓународните партнери во знак на протест поради, како што соопшти, нападите врз човековите права и акти на репресија. Канадското Министерство за надворешни работи соопшти дека работи заедно со САД, Европската унија и Велика Британија.

Малезија го откри првиот случај на инфекција со омикрон кај странски студент, кој беше ставен во карантин по пристигнувањето од Јужна Африка пред две недели, изјави министерот за здравство Каири Џамалудин.

„ Студентка (19), која била асимптоматска и вакцинирана, била позитивна на Ковид-19. Таа дојде во Малезија од Јужна Африка преку Сингапур на 19 ноември и беше ставена во карантин десет дена пред да биде ослободена на 29 ноември“, рече Каири.

Пет други луѓе кои делеле возило со неа пред карантинот биле негативни.

Властите, сепак, побараа од студентката, како и од осум други блиски контакти, да подлежат на дополнително тестирање, откако беше потврдено дека нејзините претходни примероци од тестот се со новата варијанта на коронавирусот, додаде Каири.

Сè поголем број земји пријавуваат случаи на омикрон, за која Светската здравствена организација рече дека носи многу висок ризик од предизвикување инфекција.

Шефот на тимот на ОН што ги истражува злосторствата во Ирак, Кристијан Ричер, рече дека ИСИС извршила воени злосторства и злосторства против човештвото во затворот во Мосул.

Таму систематски биле убиени најмалку 1.000 муслимански затвореници, главно шиити.

Доказите собрани од масовните гробници со посмртните останки на жртвите на егзекуцијата во централниот затвор Бадуш и преживеаните покажуваат детални подготовки за напад од високи претставници на Исламска држава на 10 јуни рано наутро, изјави Ричер пред Советот за безбедност на ОН.

„ Уапсените биле однесени на локации во близина на затворот, разделени врз основа на религијата и понижени. Најмалку 1.000 претежно шиитски затвореници беа убиени“, рече тој.

Ричер рече дека анализата на дигитални, документарни и форензички докази, вклучително и документи на Исламска држава, идентификувала бројни членови на екстремистичката група, позната и како ИД или ИСИЛ, кои се одговорни за злосторствата.

Како резултат на истрагата, тој рече дека истражниот тим на ОН заклучил дека ИД извршила злосторства против човештвото со убиства, истребување, тортура, присилни исчезнувања, прогон и други нехумани дејствија во затворот Бадуш, како и воени злосторства на случајни убиства, тортура, нехумано постапување и нарушување на личното достоинство.

Борците на Исламска држава ги зазедоа ирачките градови и прогласија самопрогласен калифат над поголемиот дел од Сирија и Ирак во 2014 година.

Групата официјално беше поразена во Ирак во 2017 година, но нејзините таканаречени ќелии продолжија да напаѓаат.