Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, среде војна од целосен обем, се заедно во одбраната на она што ги прави народ – домот, семејството, традицијата и надежта за мир.

„Драги Украинци! Вечерва е многу посебна вечер – Бадник. Тоа е единствено време, исполнето со посебен дух, со своја посебна магија за секој од нас. Затоа што оваа вечер навистина е за сите нас. За сето она што ги прави Украинците тоа што се“, рече Зеленски.

Тој истакна дека Божиќ отсекогаш бил време на семејно собирање, средби и прегратки, но дека веќе четврта година трае обид тоа да им биде одземено на Украинците поради војната за независност.

„Токму тоа денес го браниме: нашата земја, нашите семејства, оној долгоочекуван чувство на мир и спокој во сопствениот дом. Кога ни е топло. Кога имаме вкусен оброк. Кога сме заедно“, истакна тој.

Зеленски наведе дека далечината не може да го раздели народот.

„Не е важно дали сме разделени или лице в лице. Украинците се заедно. И никој не може да ни го одземе тоа чувство. Токму тоа чувство ни дава надеж и ни помага да издржиме, и покрај сè“, порача тој.

Призна дека Божиќ се одбележува во исклучително тежок момент.

„За жал, не се сите вечерва дома. За жал, не сите сè уште имаат дом. И, за жал, не се сите вечерва со нас“, рече тој, додавајќи дека Русија, и покрај сè, не може да го окупира најважното – украинското срце, верата едни во други и заедништвото.

Зеленски истакна дека Украинците вечерва ќе ја чекаат првата ѕвезда на небото – во Киев, Закарпатската област, Одеса или Купјанск – каде и да се.

„Украинците вечерва се заедно, го одбележуваат Божиќ на ист датум, како едно големо семејство“, изјави тој.

Говорејќи за промените што ги донела војната, Зеленски наведе дека денес повеќе не е пресудно како е украсен домот, туку како се брани, ниту што има на трпезата, туку кој седи околу неа.

Посебно се осврна на војниците кои не можат да бидат дома.

„Важно е оние кои нè бранат сега, иако не се во близина, сепак да бидат во контакт. Да можеме да го слушнеме нивниот глас, макар за една минута, и да ја добиеме највредната порака: ‘Добро сум’“, рече Зеленски.

Тој додаде дека радоста денес доаѓа од светлината во домовите и светлината во луѓето и дека најубавиот божиќен звук е оној во кој нема дронови и проектили.

Во пресрет на Божиќ, потсети тој, Русија повторно извршила масовни напади.

Украина официјално почна да го одбележува Божиќ на 25 декември од 2023 година. Со тоа беше напуштено досегашното празнување на 7 јануари, според Јулијанскиот календар. Промената следуваше по повеќегодишен процес на оддалечување од руското религиозно и културно влијание и приближување кон европската традиција. Клучна улога во оваа одлука имаше Православната црква на Украина.

Рускиот претседател Владимир Путин е информиран за контактите со претставниците на американскиот претседател Доналд Трамп во врска со американските предлози за евентуален мировен договор во Украина, а Москва сега ќе го формулира својот став, соопшти денес Кремљ.

Портпаролот на Кремљ, Дмитриј Песков, изјави дека рускиот претставник Кирил Дмитриев го информирал Путин за неговото патување во Мајами, каде што се сретнал со претставниците на Трамп. Но, Песков одби да коментира за реакцијата на Русија на предлозите или да ја разјасни содржината на документите велејќи дека Кремљ нема да комуницира преку медиумите.

„Сите главни параметри на ставот на руската страна им се многу добро познати на нашите колеги од Соединетите Американски Држави“, изјави Песков пред новинарите. „Сега имаме намера да го формулираме нашиот став врз основа на информациите што ги доби шефот на државата и да ги продолжиме нашите контакти во многу блиска иднина преку постојните канали, кои се оперативни“, додаде тој.

Путин во последните недели изјави дека неговите услови за мир се Украина да ги предаде приближно 5.000 квадратни километри од Донбас што сè уште ги контролира, и Киев формално да се откаже од својата намера да му се приклучи на НАТО.

Кога беше прашан за документите што Дмитриев ги донесе во Москва од Мајами, Песков рече дека е несоодветно да се зборува за нив пред медиумите. Украинскиот претседател Володимир Зеленски им рече на новинарите дека украинските и американските делегации се приближиле кон финализирање на планот од 20 точки на разговорите во Мајами за време на викендот, според соопштението од неговиот кабинет денес.

Но, Зеленски исто така рече дека Украина и САД не нашле заедничка основа за барањето Украина да ги предаде деловите од Донбас што сè уште ги контролира, ниту за иднината на нуклеарната централа „Запорожје“, која ја држат руските сили.

Соединетите Американски Држави воведоа забрана за влез на пет лица поради наводна цензура на американските онлајн-платформи, соопшти американскиот Стејт департмент. Забраната се однесува на поранешниот француски комесар на ЕУ, Тиери Бретон, кој се смета за еден од архитектите на Законот за дигиталните услуги на ЕУ, закон што ги регулира онлајн-платформите.

Меѓу погодените се двајца директори на германската организација „Хејт еид“, која се бори против онлајн-злоупотребата. Стејт департментот соопшти дека забраната се однесува на Ана-Лена фон Ходенберг и Џозефин Балон, изјави заменик-државниот секретар Сара Роџерс на платформата X.

Фон Ходенберг беше наградена со германскиот федерален орден за заслуги во октомври како признание за нејзината работа против дигиталното насилство. „Хејт еид“, основана во 2018 година, се смета за прв национален советодавен центар во Германија за луѓе погодени од онлајн-малтретирање.

Две други лица именувани од Стејт департментот се Имран Ахмед, основач на Центарот за борба против дигиталната омраза во САД/Велика Британија, и Клер Мелфорд, основач на Глобалниот индекс на дезинформации со седиште во Велика Британија. Двете организации работат на борба против говорот на омраза и дезинформациите на интернет.

Балон и Фон Ходенберг ја критикуваа одлуката на САД како чин на репресија велејќи дека не се изненадени од потегот. „Тоа е чин на репресија од страна на влада што сè повеќе го игнорира владеењето на правото и се обидува да ги замолчи своите критичари со максимална сила“, изјавија тие за ДПА.

„Нема да дозволиме да бидеме заплашени од влада што ги инструментализира обвинувањата за цензура за да ги замолчи оние што се залагаат за човекови права и слобода на изразување“, се вели во соопштението.

Тие рекоа дека „Хејт еид“ ќе продолжи со својата работа со целосна посветеност и ќе биде во солидарност со другите погодени од санкциите.

Бретон исто така остро го критикува потегот на САД споредувајќи ги санкциите објавени од Стејт департментот против него и четворица други со ловот на вештерки против наводни комунисти за време на ерата на Мекарти во САД.

„До нашите американски пријатели: ‘Цензурата не е таму каде што мислите дека е’“, рече Бретон во објава на X.

Француската влада исто така остро ја осуди одлуката.

Бретон и француските претставници нагласија дека Законот за дигиталните услуги е усвоен од Европскиот парламент и од сите земји членки на ЕУ со силно демократско мнозинство за да се осигури дека интернетот нема да стане простор на беззаконие.

Францускиот министер за надворешни работи Жан-Ноел Баро ги отфрли тврдењата на американскиот државен секретар Марко Рубио, кој го опиша законот на ЕУ како „напад на странски влади врз сите американски технолошки платформи и американскиот народ“.

„Законот за дигиталнигте услуги (DSA) беше демократски усвоен во Европа за да се осигури дека она што е нелегално офлајн е нелегално и онлајн. Тој апсолутно нема никаков екстратериторијален дострел и на никаков начин не влијае на Соединетите Американски Држави“, рече Баро на X. „Народите на Европа се слободни и суверени и не може да дозволат другите да им ги наметнуваат правилата што го регулираат нивниот дигитален простор“, рече тој.

Стејт департментот ги нарече петте лица радикални активисти, кои водат „организиран напор да ги принудат американските платформи да цензурираат, демонетизираат и потиснуваат американски ставови“.

Рубио претходно напиша на X: „Предолго време идеолозите во Европа водеа организиран напор да ги принудат американските платформи да ги казнуваат американските ставови на кои се спротивставуваат“.

„Администрацијата на Трамп повеќе нема да ги толерира овие скандалозни акти на екстратериторијална цензура“, додаде Рубио.

Рубио рече дека Стејт департментот затоа воведува забрани за патување против она што тој го опиша како водечки личности во глобалниот цензурно-индустриски комплекс и дека листата може да се прошири ако другите не го променат курсот.

Рубио и други американски претставници постојано го критикуваат она што го нарекуваат онлајн-цензура во Европа. Коментарите следуваа по одлуката на Европската комисија да го казни Х, во сопственост на милијардерот Илон Маск, со 120 милиони евра поради недостиг на транспарентност.

фото/депозитфотос