Свет
Нема да ја ангажираме војската против протестот на камионџиите, вели канадскиот премиер Трудо

Канадската влада нема намера да испрати војска за да ja реши ситуацијата со протестот на камионџиите во Отава кои протестираат против одлуката за задолжителна вакцинација, изјави канадскиот премиер, Џастин Трудо.
„Тоа не е нешто што го разгледуваме во моментот. Не се зборува за испраќање војска“, им рече Трудо на новинарите, додавајќи дека треба да се внимава пред да се користи војската во ситуации во кои се вклучени Канаѓани.
Повеќе од 200 камиони и други возила ги блокираа патиштата, со што беше запрен сообраќајот во центарот на канадската престолнина од минатиот петок, во протест каков што досега е невиден во земјата. Организаторите најавуваат слични протести оваа недела и во други градови, како Торонто.
Шефот на полицијата во Отава, кој се соочува со критики за пасивниот одговор на полицајците во однос на протестот, во средата рече дека употребата на војската може да се земе предвид, но Трудо ја отфрли опцијата.
Некои демонстранти бараат укинување на задолжителната вакцинација за возачите на камиони кои патуваат преку меѓународните граници, додека други бараат смена на премиерот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Подољак: Преговори со Русија ќе значат само едно – дека Русија победи

Мировните преговори со Русија ќе значат вистинска загуба на Украина, Европа и демократските вредности, изјавил Михаил Подољак, шеф на кабинетот на Владимир Зеленски, пренесуваат светските агенции.
Тој ги коментирал зборовите на британскиот експерт за Украина, Тимоти Еш, дека мировните преговори меѓу Москва и Киев би можеле да продолжат оваа есен.
„Денешните преговори со Руската Федерација ќе значат само едно: дека Русија победи. Ова е забележан пораз на Украина, евидентиран пораз на Европа, на демократските вредности како такви“, изјавил Подољак, а пренесува „Комерсант“.
Според него, мировните преговори со Москва би можеле да ја „поправат цивилизираната катастрофа“, а по нивното започнување ќе следи „колапс на целиот глобален безбедносен систем“.
Украина веќе плати висока цена, што е „многу повисока од можноста за итен прекин на огнот“, заклучил Подољак.
Европа
Турција првпат назначи жена генерал

Турската армија назначи прва жена генерал, објавено е денеска во Службениот весник на оваа земја.
Како што пренесува „Anadolu Agency“, Озлем Јилмаз е унапредена во бригаден генерал од позицијата виш полковник. Сега таа ќе биде потпретседателка на Академијата за жандармерија и крајбрежната стража.
Другите унапредувања вклучуваат двајца генерал-полковници, 16 генерал-мајори и 13 бригадни генерали.
Европа
(Видео) Автомобил удрил во паб и ресторан во Вирџинија, најмалку 14 повредени

Најмалку 14 лица се повредени, од кои четворица потешко, откако возило удрило во паб и ресторан во северна Вирџинија, соопштија официјални лица.
Во несреќата во објектот „Четири судови во Ирска“, која се случила синоќа, избувнал пожар кој брзо бил изгаснат, јавуваат медиумите.
Осум лица се пренесени во болница, од кои четворица се во критична состојба, а на шестмина им била укажана помош на местото на настанот и се пуштени на слобода, соопшти полицијата на округот Арлингтон и противпожарната служба на округот.
Портпаролката на полицијата во Арлингтон, Ешли Севиџ не објавила детали за причината за несреќата, која се случила на прометниот булевар Вилсон.
Според неа, меѓу оние кои се префрлени во болница е и возачот на возилото.