Возот во Јапонија се движел со брзина од 280 километри на час со отворени врати од Сендаи кон Токио, но никој од патниците не бил повреден, изјави железничкиот оператор.

Проблемот го предизвикал чистачот кој заборавил да го исклучи уредот со кој се регулира отворањето и затворањето на вратите.

Возот принудно запрел во тунелот во Шибата, откако било забележано дека вратата на деветтиот вагон е отворена. Патувањето продолжи по проверката, 15 минути подоцна, јавува новинската агенција Кјодо.

Во возот шинкансен имало околу 340 патници, но никој не стоел кај вратата.

Тој пристигна на својата крајна дестинација со задоцнување од 19 минути. Поради овој проблем било одложено тргнувањето на седум возови, а 3.300 патници го почувствуваа ова нарушување во сообраќајот.

Администрацијата на САД на претседателот Доналд Трамп најави нова законска одредба која им овозможува на имиграциските власти да ги задржат семејствата на мигрантите во притворските центри на неодредено време, додека судот разгледува дали да им даде азил во САД.

Според претходната одлука, властите можеа да ги задржат семејствата на мигрантите најмногу 20 дена, пренесува „Ројтерс“.

Во новиот обид да се укине постојниот закон за имиграција, Трамп им рече на новинарите дека неговата администрација сериозно сака да му стави крај на правото на државјанство за децата родени како не-државјани во САД.

На 15 јули администрацијата воведе правило со кое им се забранува на скоро сите имигранти да аплицираат за азил на јужната граница, а на 12 август, одредба со која им се одзема визата на оние кои не заработуваат доволно пари.

Неколку жалби се поднесени против овие одлуки во САД.

Косовскиот министер за надворешни работи, Беџет Пацоли по средбата помеѓу српскиот претседател Александар Вучиќ и американскиот државен секретар Мајк Помпео, оцени дека американскиот дипломат го охрабрил Белград за продолжување на преговорите со Приштина, со цел да се дојде до сеопфатен договор на нормализирање на односите, кој според него, би резултирал со меѓусебно признавање.

Пацоли вели дека Помпео нагласил оти Србија треба да избегнува провокации што го попречуваат процесот на нормализација и да се ангажира во духот на компромис и флексибилност, неопходни за постигнување договор.

Пацоли му заблагодари на Помпео за неговиот принципиелен став за поддршка на Косово.