Италија, европската земја што прва беше погодена од пандемијата, денес забележа рекорден број новозаразени – 15.199. Претходно, тој рекорд беше 11.705, а беше забележан минатата недела. Денеска, регистрирани се 127 смртни случаи, што е зголемување во однос на 89-те еден ден претходно, но сепак е многу помалку од просекот од 900 починати на ден колку што беше во март и април.

Бројот на заразени во овој бран во Италија е порамномерно распореден по региони, но Ломбардија повторно е најсилно погодена, особено околу најголемиот град Милано. Денеска, Италија има и рекорден број тестирани, дури 177.848.

Франција, пак, денеска шести пат во рок од 12 дена забележа повеќе од 25.000 нови инфекции.

Бројот на хоспитализирани трет ден по ред се зголемува за повеќе од 700, што укажува на тоа дека полицискиот час што неодамна беше воведен сè уште не ги дава очекуваните резултати.

Бројот на хоспитализирани првпат од почетокот на јуни е поголем од 13 илјади. Во Франција денеска се забележани 163 починати од коронавирус, со што вкупниот број достигна 34.048.

Француската влада размислува за продолжување на вонредната состојба поради пандемијата на Ковид-19 до 16 февруари в година, пренесува „Скај њуз“.

Владиниот портпарол Габриел Атал во изјава за медиумите рече дека уште неколку француски региони ќе влезат во т.н. статус на црвен аларм, што значи дека и во нив ќе се воведе полициски час, кој во моментот е во сила во најголемите француски градови.

Предложениот нов датум за крај на вонредната состојба значи дека полицискиот час, кој трае од 21 до 6 часот наутро секој ден, би можел да се продолжи.

Шест недели откако стана првата западноевропска земја што забележа 500.000 случаи на инфекција со коронавирус, Шпанија денес премина над еден милион заразени, пишува „Гардијан“.

До вечерва се регистрирани 1.005.295 случаи на инфекција со коронавирус во земјата. Минатата недела починаа 575 лица, со што вкупниот број на смрни случаи достигна 34.366.

Шпанските власти во моментот размислуваат за полициски час, а во земјата се водат политички дебати, кои се закануваат да ги загрозат досега направените напори за време на вториот бран.

Во регионот на Мадрид, кој покрива речиси една третина од сите заразени во Шпанија, постојат спорови на ниво на централна и регионална влада за тоа какви мерки треба да се преземат. Претседателката на регионот, Изабел Дијаз Ајусо, денеска вети хируршки мерки што ќе ги поврзат здравството и економијата.

„Најважно за нас е економијата повеќе да не страда“, рече таа.

Покрај епидемијата, Шпанија ја тресе и политичката криза. Во моменти кога земјата надмина милион заразени, шпанскиот Конгрес почна расправа за иницијативата за недоверба против коалициската влада предводена од социјалистите, поднесена од крајнодесничарската партија Вокс.