Рускиот претседател, Владимир Путин, не планира да разговара со чешката влада за влошувањето на руско-чешките односи, изјави портпаролот на Кремљ, Дмитриј Песков, пренесува ТАСС.

„Нема такви планови“, рече Песков, одговарајќи на поставеното прашање на таа тема.

Москва смета дека потегот на Прага за протерување руски дипломати е штетен за билатералните односи.

„Дефинитивно ги сметаме постапките на Прага неразумни и штетни за билатералните односи. Веруваме дека во овој вид политика нема здрав разум. Се чини дека се работи за обид за копирање на ‘Големиот брат’ во странство со преземање непредвидливи и агресивни активности”, истакна тој.

Според Песков, неоснованите обвинувања на Прага се апсолутно безобразни.

Како одговор на прашањето дали Москва ги разгледала наводите на Прага дека руските државјани Александар Петров и Руслан Боширов биле вклучени во инцидентот во Врбетице, Песков рече:

„Ваквите апсурдни обвинувања не може да бидат предмет на разгледување“.

На 17 април чешката влада најави протерување на 18 вработени во руската амбасада во Прага, кои наводно биле офицери на руските разузнавачки служби. Овој потег е поврзан со новите обвинувања од Прага за експлозијата во Врбетице во 2014 година. Според извештаите, офицерите на военото разузнавање на Русија наводно биле вклучени во споменатиот инцидент.

Руското Министерство за надворешни работи изрази силен протест до Прага во врска со чекорите преземени под неосновани и далекусежни изговори, а прогласи и 20 лица вработени во амбасадата на Чешка во Москва за персона нон грата.

Портпаролката на руското Министерство за надворешни работи, Марија Захарова, ги отфрли постапките на Прага како циркус, додавајќи дека тие демонстрираат недостиг од каква било независна политика во меѓународните односи.

Претседателот на африканската држава Чад, Идрис Деби (68), почина од повреди здобиени при обиколка на трупите на фронтот во борбата против бунтовниците на северот на земјата, соопшти армијата.

Деби е убиен само еден ден откако беше прогласен за победник на неодамнешните избори на кои го освои шестиот претседателски мандат.

Вчера од неговиот кабинет беше објавено дека отишол на фронтот со цел да се приклучи на армијата во борбата против терористите, пренесува „Ројтерс“.

Засега не е јасна точната причина за смртта, но европски дипломатски извор соопшти дека тој бил убиен.

Синот на Деби, Махамат Каку, е назначен за привремен претседател од страна на преодниот совет на воени офицери, изјави портпаролот Азем Бермендао Агуна во емисија на државната телевизија.

Деби на власт дојде во 1990 година преку побуна и беше еден од лидерите со најдолг претседателски мандат во Африка.

Тој и неговата војска се сметаа за доверлив западен сојузник во бурниот регион во кој делуваат џихадистите.

Руската вселенска агенција соопшти дека сака да формира своја вселенска станица до 2025 година, по најавите дека Москва има намера да се повлече од Меѓународната вселенска станица (ISS).

Шефот на „Роскосмос“, Дмитриј Рогозин, објави дека почнала изградбата на првиот модул на новата станица, откако официјални лица предупредија дека Русија размислува да ја напушти ISS, едно од ретките подрачја на соработка меѓу Москва и западните земји. Објавата доаѓа во време на тензии во врска со обвинувања за шпионажа, групирање на сè поголем број руски и западни трупи на границите на Украина, нови санкции на Вашингтон кон Москва и влошена здравствена состојба на Алексеј Навални, главниот критичар на политиките на претседателот Владимир Путин.

„Се работи на првиот модул од новата руска орбитална станица“, рече Рогозин. Тој кажа дека руската корпорација „Енергија“ планира модулот да биде подготвен за лансирање во 2025 година.

Започната во 1998 година, Меѓународната вселеснска станица е еден од најамбициозните проекти за човечка соработка во историјата. Во неа се вклучени Русија, САД, Канада, Јапонија и Европската вселенска агенција.

Рускиот вицепремиер Јуриј Борисов неодамна изјави дека Москва размислува да ја напушти ISS од 2025 година поради застареноста на станицата. „Роскосмос“, пак, вчера објави дека одлука за напуштање на станицата сè уште не е донесена.

„Откако ќе донесеме одлука, ќе почнеме преговори со нашите партнери за формите и условите за соработка по 2024 година“, соопшти руската агенција.

Минатата година Русите го загубија монополот за испраќање астронаути на ISS од космодромот во Бајконур, Казахстан, по првата успешна мисија на американската компанија „Спејс Екс“.

Русија има славна историја на истражување на вселената, а овој месец ја одбележа 60-годишнината од првиот вселенски лет на Јуриј Гагарин.

Сепак, вселенската програма на земјата се соочува со тешкотии во последните неколку години. Рогозин објави голем број амбициозни планови, но неговата агенција сè потешко се справува со намалувањата во буџетот, а аналитичарите велат дека Путин е повеќе заинтересиран за воена технологија отколку за истражувања на вселената.