Русија ја обучила својата морнарица да гаѓа локации длабоко во Европа со проектили способни да носат нуклеарни бојни глави во потенцијален конфликт со НАТО, според тајните документи што ги виделе новинарите на „Фајненшл тајмс“ (ФТ).

Мапите на цели длабоко во Европа, како што се западниот брег на Франција и пристанишниот град Бароу-ин-Фернес во Обединетото Кралство, беа детаљно прикажани во презентацијата пред офицерите, направена пред руската инвазија на Украина, соопшти ФТ.

Истиот весник претходно пишуваше за податоци од 29 тајни руски воени досиеја, од кои се чини дека руските сили практикувале употреба на тактичко нуклеарно оружје во раните фази на конфликтот со голема светска сила.

Русите ја нагласуваат предноста од користењето нуклеарни бојни глави во раната фаза на војната

Најновите обелоденувања од истиот пакет-документи покажуваат дека Русија предвидува конфликт со Западот, кој ќе се прошири многу подалеку од нејзината непосредна граница на НАТО, и планира серија насилни напади во Западна Европа. Документите на ФТ му ги покажале западни извори.

Руските документи изработени меѓу 2008 и 2014 година вклучуваат листа на цели за ракети кои може да носат или конвенционални бојни глави или тактичко нуклеарно оружје. Руските офицери ги нагласуваат предностите од користењето нуклеарни бојни глави во рана фаза.

Презентацијата исто така укажува дека Русија ја задржала способноста да лансира нуклеарно оружје од бродови, што, според експертите, носи значителни дополнителни ризици од ескалација или несреќи.

Во документот се наведува дека „високата способност за маневрирање“ на морнарицата ѝ овозможува да изведува „изненадувачки и превентивни напади“ и „масивни ракетни напади… од разни правци“. Се додава дека нуклеарното оружје по правило е наменето за употреба во комбинација со други средства за уништување за постигнување на руските цели.

Кои се целите?

Аналитичарите што ги прегледаа документите рекоа дека тие се во согласност со процената на НАТО за заканата од ракетни напади со долг дострел од страна на руската морнарица, но и со брзината со која Русија, најверојатно, ќе прибегне кон нуклеарната опција.

Мапите, кои беа направени за презентација, а не за оперативни цели, илустрираат примерок од 32 цели на НАТО во Европа за руската поморска флота. Еве неколку примери.

• Целите на руската балтичка флота се главно во Норвешка и Германија – вклучувајќи ја поморската база во Берген, како и радарските локации и објектите на специјалните сили;
• Руската Северна флота треба да цели на одбранбено-индустриски цели, како што е бродоградилиштето за подморници во Бароу-ин-Фернес во северозападна Англија;
• Презентацијата исто така илустрира како руската доктрина би можела да се примени во можни војни во Црното Море, Каспиското Езеро…
• …и Пацификот. Сценаријата вклучуваат војни со сегашните сојузници, како што се Кина, Иран, Азербејџан и Северна Кореја.

Вилијам Алберк, поранешен функционер на НАТО, кој сега работи за тинк-тенк центарот „Стимсон“, рече дека примерокот е мал дел од „стотици, ако не и илјадници цели мапирани во Европа… вклучувајќи воени и критични инфраструктурни цели“.

„Нивниот концепт за војна е тотална војна“

Капацитетот на Русија да напаѓа во Европа значи дека цели на континентот ќе бидат загрозени доколку нејзината војска се судри со силите на НАТО во земјите од фронтот, како што се балтичките држави и Полска, велат аналитичарите и поранешните официјални лица.

„Нивниот концепт за војна е тотална војна“, вели Џефри Луис, професор на Институтот за меѓународни студии „Мидлбери“ во Монтереј, кој ја проучува контролата на оружјето.

„Тие ги гледаат овие работи (тактички нуклеарни бојни глави) како потенцијално оружје за војна“, додаде тој. „Тие ќе сакаат да ги користат и тоа многу бргу“, рече тој.

Тактичкото нуклеарно оружје, кое може да се испорача со проектили од копно или море или од авион, има помал дострел и е помалку деструктивно од поголемите стратешки оружја дизајнирани да ги таргетираат САД. Сепак, тие сè уште може да ослободат значително повеќе енергија од онаа фрлена на Нагасаки и Хирошима во 1945 година.

Путин упорно ѝ се заканува на Европа
Рускиот претседател Владимир Путин постојано им се закануваше на европските сојузници на Украина дека ќе ја спречат западната воена поддршка за Киев. „Тие треба да запомнат дека тие се мали, густо населени држави“, рече тој во мај.

Презентацијата исто така ја споменува опцијата за таканаречен демонстративен напад – активирање нуклеарно оружје во оддалечена област „за време на период на непосредна закана од агресивна војна“ пред вистински конфликт за да се заплашат западните земји. Русија никогаш не призна дека таквите напади се дел од нејзината доктрина.

Таквиот удар, се вели во досието, ќе ги покаже „достапноста и подготвеноста за употреба на прецизно нестратешко нуклеарно оружје“ и „намерата за употреба на нуклеарно оружје“.

Според пресметките на НАТО, земјите во алијансата имаат помалку од 5 отсто од капацитетот за воздушна одбрана потребен за заштита на источното крило на алијансата од сеопфатен напад од Русија. Путин во јуни рече дека Европа ќе биде „повеќе или помалку беспомошна“ против руските ракетни напади.