Италијанската полиција во Реџо Калабрија во голема рација во понеделникот уапси 18 лица под сомнение за активностите поврзани со мафијата, а меѓу уапсените е и градоначалникот на Делијануова, Франческо Роси, пренесува „Локал“. Уапсени се и двајца локални бизнисмени.

Обвиненијата против осомничените членови и соработници на кланот Алваро ди Синополи вклучуваат поврзаност со мафијата, изнуда, тешка измама и измамнички трансакции со мафијашки методи и цели, пренесува „Газета дел суд“.

Роси, кој пред три години беше избран за градоначалник на Делијануова, е обвинет за злоупотреба на функцијата за нелегално доделување тендери и за дистрибуција на државните финансии на кланот.

Рацијата спроведна од Единицата за истраги на Реџо Калабрија и координирана од заменик-обвинителот Калоџеро Гаетано Пачи и заменик-обвинителот Џулија Пантано е кулминација на петгодишната истрага што почна во 2013 година. За да се соберат разузнавачките информации потребни за спроведување на апсењата, полицијата набљудувала една куќа во областа Синополи обележана како нервен центар за нелегалните активности на кланот.

Калабриската мафија Ндрангета е малку позната надвор од Италија отколку сицилијанската Коза Ностра и од неаполската Камора, но има значителен успех последниве години координирајќи се со меѓународни криминални мрежи и од 2000 година наваму стана најмоќна во Италија.

Нејзините припадници се прославија во Италија во 70-тите години со киднапирањето богати Италијанци од северот за откуп и се верува дека стојат зад озлогласеното киднапирање и осакатување на тогаш 16-годишниот Џон Пол Гети Трети, како и зад убиството на словачкиот новинар Јан Кучак во февруари годинава.