Торнадото што синоќа опустоши седум села на југот oд Чешка и однесе најмалку пет човечки животи, според премиерот Андреј Бабиш, уништило или срушило околу 2.000 куќи.

Министерот за внатрешни работи, Јан Хамачек, прогласи вонредна состојба, а премиерот Бабиш ја нарече природната катастрофа – апокалипса.

„Две илјади оштетени куќи, мора да сториме сè за да им помогнеме на тие луѓе. Сам сакам да се уверам што им треба“, рече премиерот Бабиш, кој од самитот на Европската унија денес лета директно кон Јужноморавскиот регион за да ги посети најтешко погодените села.

Полицијата потврди дека пет лица загинале во невремето, а беа објавени и снимки од дрон кој ги надлетал погодените области.

„Пожарникарите веќе минаа низ најтешко погодените села“, рече гувернерот на Јужноморавскиот регион. Тој кажа дека не очекува да бидат пронајдени повеќе повредени или мртви.

Десетици повредени лица се пренесени во болниците во градот Бжецлав, јужно од Брно и во Ходонин, екипите на брзата помош и спасувачите ја пружиле потребната помош на самото место, а се проценува дека биле повредени скоро 200 лица.

Severe #tornado in Czech Republic on Thursday afternoon causing extensive damage with buildings and homes.
pic.twitter.com/BE1Csd6nlR

— Joint Cyclone Center (@JointCyclone) June 25, 2021

Во селото Хрушки, кое е едно од четирите најпогодени места, половина од куќите се претворени во урнатини, пренесуваат чешките медиуми.

Министерството за локален развој веднаш издвои околу 17 милиони евра од буџетот како помош за реконструкција, бидејќи некои куќи се толку оштетени што ќе мора да бидат урнати, а луѓето од погодените области веќе можат да сметаат на итна помош од околу 2.300 евра.

Добротворните организации на црквата и невладините хуманитарни организации започнаа со собирање помош за луѓето од селата во Јужноморавскиот регион кои останаа без покрив над главата, Чесите масовно испраќаат помош, а веќе утрово, во текот на првиот час кога започнало собирањето на помошта, 400.000 евра легнале на сметките.

Околу 75.000 домаќинства се без електрична енергија, 2.000 без гас, а неколку десетици предаватели не пренесуваат сигнали за мобилна телефонија.

Русија денеска објави за рекорден број на смртни случаи поврзани со Ковид-19 во Москва, во услови на пораст на бројот на нови инфекции, за кој, според властите, виновни се новиот делта сој на коронавирусот и бавниот напредок на програмата за вакцинација.

Работната група за коронавирус на руската влада информираше за 20.393 нови случаи на Ковид-19, од кои 7.916 во Москва, што е најголем дневен број на случаи од 24 јануари.

Така, вкупниот број на заразени лица во Русија се искачи на 5.409.088 од почетокот на пандемијата.

Исто така беше објавено дека 601 лице починале од последици поврзани со Ковид-19 во последните 24 часа, од кои 98 во главниот град, што го зголеми вкупниот број на смртни случаи во Русија на 132.064. Санкт Петербург исто така објави за 98 смртни случаи.

Пред неколку дена биле измерени неверојатни 48 Целзиусови степени во Сибир, пренесуваат светските медиуми.

На 20 јуни, два европски сателита, на арктичкиот дел од Сибир измериле температура од 118 F односно 47,7 Целзиусови степени. Станува збор за температурата на почвата, така што ова не се смета за температурен рекорд. Температурата на воздухот во таа област, во тој период била околу 30 Целзиусови степени.

И покрај тоа, ова е невообичаено висока температура за Арктичкиот круг и таквата топлина може да го забрза понатамошното топење на мразот и да ги забрза климатските промени.

Сателитите на ЕУ Коперникус Сентинел-3А и 3Б ги забележале овие високи температури за време на топлиот бран што го погоди поголемиот дел од Сибир. Овие горештини укажуваат на можност за пеколен почеток на летото, по пролетта во која во Сибир беа регистрирани стотици шумски пожари.

Многу од овие пролетни пожари беа т.н. „зомби пожари“ затоа што тие всушност се повторно активирани остатоци од шумските пожари што избувнаа претходното лето и никогаш не биле целосно изгаснати. Зомби пожарите со месеци тлеат под зимскиот снег, потхранувани со јаглерод од тресетот под ледената површина. Кога снегот се стопи на пролет, пожарите повторно се активираат.