По повод Денот на Европа, високиот претставник на Европската унија (ЕУ) и потпретседател на Европската комисија, Жозеп Борел, оцени дека Европската унија не е завршен проект и дека се соочува со голем број проблеми.

Тој посочува дека овие проблеми мора да се решат, но ЕУ не е слаба. „Напротив, станува сè посилна секој ден“, вели Борел.

Тој е исто така убеден дека ЕУ е потребна повеќе од кога било, иако е изграден траен мир меѓу Европејците.

За него Европа значи повеќе пријателства и можности, заедничка борба за зелена планета. Но, тој, исто така, верува дека Европа некогаш им понудила на своите млади многу поголема економска безбедност за да станат независни.

„Мислам дека тоа е изгубено и тоа е нешто што треба да го вратиме. Убеден сум дека помладите генерации ќе знаат како да дадат нов поттик на Европа“, рече Борел.

Денес, првпат од ноември минатата година, во Србија се потврдени помалку од илјада новоинфицирани со коронавирус, објавија здравствените власти.

Во последните 24 часа направени се 9.389 тестови, а потврдени се 834 случаи, што не се случило од 2 ноември 2020 година, кога имало 802.

Починале 19 лица, а вкупниот број на смртни случаи се искачи на 6.558.

Во болница има 3.827 ковид – пациенти, од кои 137 се на апарати за дишење, објави српското Министерство за здравство.

Елон Маск откри дека има Аспергеров синдром, за време на неговото гостување во американското ТВ-шоу „Saturday Night Live“.

Тој откри дека ја има оваа состојба, што е форма на аутизам, објаснувајќи дека има потешкотии да ги натера луѓето да веруваат дека мисли на она што го зборува.

„ Одлично е да се биде домаќин на „Saturday Night Live“, и навистина го мислам тоа. Понекогаш откако ќе кажам нешто, морам да кажам дека го мислам тоа“ рече во својот воведен говор 49-годишниот извршен директор на компанијата „Тесла“, основачот на „СпејсИкс“ (SpaceX) и еден од најбогатите луѓе во светот.

Тој, како образложение, додаде дека е првиот човек на Аспергер што ја водел емисијата: „Или барем првиот што го призна тоа“ се пошегува Маск.

Се смета дека е првпат бизнисменот јавно да каже дека има состојба на аутистичен спектар.

Познато е дека на луѓето со Аспергеров синдром може да им биде потешко особено разбирањето и однесувањето на другите луѓе и да учествуваат во секојдневното – семејство, училиште, работа и социјален живот“.