Свет
Палестинските власти тврдат: Илјада цивили загинаа на северот на Газа за три недели
Управата за цивилна одбрана на Газа објави дека најмалку 1.000 Палестинци се убиени во израелските напади врз северниот дел на Појасот Газа во последните три недели.
Портпаролот на администрацијата Махмуд Басал изјави дека најмалку 1.000 луѓе ги загубиле животите во овие напади што израелската армија ги изведува на северот на Газа.
Басал рече дека најмалку 100.000 луѓе биле изложени на блокади и напади во Џабалија, Беит Ханун и Беит Лахија, а дополнителни 100.000 биле раселени во градот Газа.
Според него, израелските сили го спречиле секој што се обидел да им достави помош на Палестинците во северниот дел на Газа. Басал го обвини Израел дека го користи отсуството на реакција од меѓународната заедница за спроведување на политиката на етничко уништување во северниот дел на Газа и апелира до меѓународните институции да дејствуваат итно за да ги спасат цивилите во регионот.
На 5 октомври израелската армија изврши интензивни воздушни напади на северот на Газа, вклучувајќи го и бегалскиот камп Џабалија, а на 6 октомври беа извршени копнени напади во тие области.
Се претпоставува дека овие акции се дел од пошироката стратегија за евакуација на Палестинците од северна Газа како подготовка за евентуалното израелско населување на областа, но овие тврдења сè уште не може со сигурност да се потврдат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Русија поднесе тужба против белгискиот депозитар „Еуроклир“ поради замрзнатиот руски имот
Руската централна банка соопшти дека поднела тужба до арбитражниот суд во Москва против белгискиот депозитар Еуроклир, поради, како што наведува, „незаконити постапки“ и плановите на Европската унија за користење на замрзнатата руска имотна маса.
Според соопштението, тужбата опфаќа надомест на штета во висина на вредноста на замрзнатата имотна маса на централната банка, како и замрзнатите хартии од вредност и изгубениот приход. Руската централна банка најави дека размислува и за постапки пред меѓународни и арбитражни судови.
Од банката наведуваат дека постапките на „Еуроклир“ ѝ нанеле штета на Русија, бидејќи ѝ било оневозможено управување со сопствените финансиски средства и хартии од вредност. „Еуроклир“ не ја коментираше директно најавената тужба, но потврди дека против компанијата во Русија веќе се поднесени повеќе од 100 тужби.
Според податоците, во Европската унија се замрзнати околу 210 милијарди евра руски средства, од кои најголемиот дел се наоѓаат на сметките на „Еуроклир“ во Белгија. ЕУ и земјите од Г7 веќе ги користат каматите од замрзнатиот имот за финансирање заем за Украина.
Европската комисија во последно време ги забрза подготовките за користење на замрзнатиот руски имот за финансиска поддршка на Украина, а конечен договор се очекува на самитот на ЕУ следната недела.
Свет
Британец тврдеше дека во самоодбрана ја убил сопругата, судот му поверува – сè се смени кога проговори детето осум години по убиството
Столар од Сари во Обединетото Кралство, Роберт Родс (52), е прогласен за виновен за убиство на својата сопруга Доун Родс, осум години откако првично бил ослободен од обвинението, објави Скај њуз.
Родс ја убил сопругата во јуни 2016 година во нивниот дом во Редхил, тврдејќи дека дејствувал во самоодбрана, по што во 2017 година бил ослободен. Случајот бил повторно отворен откако нивното дете во 2021 година дало ново сведочење, наведувајќи дека било манипулирано од таткото да лаже за настаните.
Апелациониот суд ја поништил ослободителната пресуда поради новите докази, а поротата на Крунскиот суд во Лондон сега го прогласи Родс за виновен за убиство, суровост кон дете, попречување на правдата и кривоклетство. Изрекувањето на пресудата е закажано за 16 јануари.
Свет
Белата куќа: Фластерите на рацете на Трамп не се од повреда
Портпаролката на Белата куќа, Каролин Ливит, изјави дека фластерите што во неколку наврати беа забележани на рацете на американскиот претседател Доналд Трамп не се резултат на повреда, пренесе „Унилад“.
Таа на прес-конференција објасни дека Трамп постојано се ракува со голем број луѓе додавајќи дека Овалната соба „е како Гранд централ станица“. Ливит наведе и дека претседателот секојдневно зема „аспирин“, што може да придонесе за појава на модринки.
Објаснувањето предизвика реакции и дополнителни прашања во јавноста, но од Белата куќа инсистираат дека здравјето на претседателот е добро. Лекарот на Белата куќа на 1 декември соопшти дека 79-годишниот Трамп е во одлична општа здравствена состојба по извршениот систематски преглед.

