Германскиот министер за надворешни работи, Хајко Мас, ги осуди изјавите на турскиот претседател Реџеп Таип Ердоган упатени за неговиот француски колега Емануел Макрон.

„Личните напади на Ердоган врз Макрон се неприфатливи“, рече Мас, а пренесе „Раша тудеј“.

Министерот потврди дека Берлин е солидарен со Франција по прашањето за борбата против тероризмот и исламскиот екстремизам.

Во исто време, Мас предупреди да не се поврзуваат милиони муслимани кои го почитуваат законот и живеат во Европа со насилни екстремисти и убијци.

„Тоа би било во полза на оние кои сакаат да го поделат нашето општество. Ние нема да го прифатиме тоа”, рече Мас.

Макрон на почетокот од месецов најави сеопфатни планови за сузбивање на исламските радикали во Франција, велејќи дека исламот на глобално ниво е во криза поради подемот на фундаменталистите.

„Москва ги повикува Грција и Турција да го решат нивниот територијален спор преку политички дијалог заснован на меѓународното право“, изјави рускиот министер за надворешни работи, Сергеј Лавров. Тој изјави дека Москва се надева оти Анкара ќе ги исполни своите обврски во врска со статусот на „Аја Софија“ како здание на списокот на светското наследство на УНЕСКО.

Во интервју за грчката новинска агенција АМНА, Лавров потсети дека Русија ја потпиша поморската правна конвенција на ООН во 1982 година и дека врз основа на тој документ создава свои ставови.

„Особено членот 3 од оваа Конвенција предвидува дека секоја земја има право да воспостави сопствен територијален коридор на море широк до 12 наутички милји иако некои земји од разни причини ја прошируваат таа зона. Секој територијален спор меѓу соседните земји мора да се реши во согласност со меѓународното право“, рече Лавров, а пренесе ТАСС.

Турција неодамна го испрати својот истражувачки брод „Орук Реис“, придружуван од флота воени бродови, во водите на источен Медитеран за да спроведе сеизмичко истражување, а Грција на тој потег на Анкара одговори со зголемување на борбената готовност на нејзините поморски и воздушни сили.

Во последните 24 часа во Србија на коронавирус се тестирани 6.503 лица, од кои позитивни биле 341, а едно лице починало.

Бројот на хоспитализирани е 768 пациенти.

Според последните податоци на српското Министерство за здравство и Институтот „Батут“, на апарати за дишење се приклучени 39 пациенти во болниците низ Србија.

Вкупниот број на потврдени случаи на Ковид-19 во Србија е 39.827, а од почетокот на епидемијата биле тестирани 1.289.519 лица.