Во блиска иднина може да се направи комбинирана вакцина против грип и ковид, изјави денеска водечката британска специјалистка по вирологија, Венди Баркли.

Баркли е раководителка на одделот за заразни болести при Кралскиот колеџ во Лондон, а денеска им порача на пратениците дека најверојатното сценарио е оти ќе биде можно комбинирање на вакцината против сезонски грип со вакцината против Ковид-19, објави Си-ен-ен.

„Верувам дека в година навистина ќе видиме повеќе напредок во епидемиологијата во однос на тоа како може да се запрат новите видови на коронавирусот, односно колку бргу тие може да мутираат и да нè натераат да ги модифицираме вакцините. Исто така, ќе знаеме колку траат сегашните вакцини, па затоа ќе биде јасно и колку долго ќе биде потребно за да се направат поефикасни“, рече Баркли.

Чешка мора да ги заостри мерките за борба против пандемијата и да спречи катастрофа во болниците, рече денеска чешкиот премиер Андреј Бабиш, а Полска најави дека повторно ќе воведе строги ограничувања на североистокот на земјата.

Чешка во вторникот пријави повеќе од 15.000 нови инфекции со коронавирус, најмногу по 6 јануари, и има најбрзо ширење на инфекцијата во Европа, со стапка на нови инфекции на жител повеќе од шест пати поголема од Германија во последните две недели.

Бројот на хоспитализирани пациенти со Ковид-19, кои се наоѓаат во тешка состојба, се искачи на рекордни 1.389, така што во земјата со 10,7 милиони жители веќе алармантно се намалува бројот на слободни болнички кревети.

Некои клиники мораа да ги префрлаат пациентите во други болници, а министерот за здравство предупреди дека во следните недели нема да има повеќе места во болниците. Владата размислува да побара од Германија да ѝ помогне во грижата за некои пациенти.

Земјата пријави вкупно 1,18 милион заразени и 19.682 смртни случаја од почетокот на пандемијата.

Бабиш рече дека ситуацијата е сериозна. „Нè чекаат пеколни денови“, нагласи тој на прес-конференција.

Владата во текот на денот треба да разгледа можни нови мерки. Бабиш рече дека Министерството за здравство ќе предложи ограничувања, но не сакаше да навлегува во детали.

Отстранета е последната статуа на генералот Франциско Франко на шпанска територија, откако шпанската енклава Мелила гласаше за отстранување на споменикот подигнат на тој фашистички диктатор.

Работниците го уништија постаментот и ја одзедоа статуата што стоеше на портите на градот на северозападниот брег на Африка, пренесе Би-би-си. Само крајно десничарската партија Вокс во Мелила гласаше против нејзино отстранување.

Елена Фернандес Тревино од Собранието го опиша отстранувањето на статуата на Франк од енклавата како историски ден. Таа рече дека тоа е единствената статуа посветена на шпанскиот диктатор што е во јавната сфера во Европа.

Генералот Франко управуваше со Шпанија од 1939 година до неговата смрт во 1975 година.

Повеќе од 30.000 луѓе загинаа во Шпанската граѓанска војна, која траеше од 1936 до 1939 година, во која националистичките сили на Франко ја поразија републиканската влада.