Францускиот претседател, Емануел Макрон, учествуваше на самитот „Africa Forward“ во Најроби, каде што имаше необична ситуација за време на панел-дискусија.

Додека се одржувала сесијата „Африка напред: Создавање во движење“, дел од публиката правела врева, што го прекинало излагањето на говорниците.

🇰🇪🇫🇷 🤫 FLASH

« Hey hey ! C’est un total manque de respect »

Au Kenya, E.Macron s’énerve sur scène au sommet Africa Forward pic.twitter.com/SddNUwW7y4

— Focus (@FocusinfosFr) May 11, 2026

Макрон станал од своето место, земал микрофон и остро реагирал, повикувајќи на ред и почит. Тој истакнал дека таквото однесување е „целосен недостаток на почит“ и дека, доколку учесниците сакаат разговори или други состаноци, треба да го напуштат просторот или да користат посебни сали.

По неговата реакција, добил аплауз од дел од присутните, по што се вратил на своето место и продолжил учеството на самитот.

Британскиот премиер, Кир Стармер, изјави дека нема да се повлече од функцијата, и дека ќе им докаже на своите критичари дека грешат, во време кога се соочува со зголемен притисок во сопствената Лабуристичка партија.

Тој порача дека е свесен за незадоволството и во партијата и кај јавноста, но дека нема намера да предизвика нова политичка криза во Обединетото Кралство. Стармер истакна дека неговата влада мора да направи порадикални промени поради долгогодишна економска стагнација и социјални тензии.

Во говорот во Лондон, тој најави подобрување на односите со Европската унија, подобри можности за вработување на младите и план за национализација на компанијата „Бритиш стил“.

Стармер се соочува со внатрепартиски притисок по слаби локални изборни резултати и појава на иницијативи за негова замена од дел од пратениците.

Опозицијата и дел од партијата го обвинуваат дека е премногу внимателен и дека не успева да ги исполни предизборните ветувања за економија, здравство и миграции.

Дополнително, политичката неизвесност во земјата влијае и врз финансиските пазари, зголемувајќи ги трошоците за државно задолжување.

И покрај тоа, Стармер порача дека ќе остане на функцијата и дека ќе работи на враќање на довербата, додека дел од неговите сопартијци бараат временска рамка за негово повлекување.

Фото: Depositphotos

Пентагон објави огромна архива на претходно доверливи документи за неидентификувани летечки објекти (НЛО), вклучувајќи децениски описи на видувања пријавени од цивили на Земјата и астронаути. Овие документи, кои опфаќаат повеќе децении, се декласифицирани и објавени на интернет по налог на американскиот претседател Доналд Трамп, кој претходно оваа година ја најави нивната објава „со оглед на огромниот интерес“.

Соединетите Држави во последниве години доживуваат повторен пораст на јавниот интерес за вонземски живот. Конгресот во 2022 година ги одржа првите сослушувања за НЛО по 50 години, а војската вети поголема транспарентност на оваа тема. Вкупно 162 досиеја се достапни на новата интернет страница на Министерството за одбрана, а најавено е дека наскоро ќе бидат објавени уште материјали. Објавата доаѓа откако и поранешниот претседател Барак Обама поттикна интерес со изјавата дека вонземјаните се „реални, но не сум ги видел“, иако подоцна појасни дека статистички постои голема веројатност за живот некаде на друго место, но дека тој не видел докази за тоа за време на неговиот мандат, пренесува „24 часа“.

Астронаутите на Аполо опишувале блесоци на светлина

Архивата содржи досега доверливи транскрипти од разговори на астронаутите од мисиите Аполо 11, Аполо 12 и Аполо 17, кои слетаа на Месечината во шеесеттите и седумдесеттите години на минатиот век. Баз Олдрин, славниот астронаут на мисијата Аполо 11, во интервју од 1969 година, кое сега е објавено, изјави дека за време на патувањето кон Месечината забележал неколку необјасниви појави.

– Набљудував нешто што изгледаше како многу светол извор на светлина, што привремено го припишавме на можен ласер – рече тој.

Транскриптите покажуваат дека астронаутот на мисијата Аполо 12, Алан Бин, кој одеше по Месечината во 1969 година, изјавил дека видел честички и блесоци на светлина како „пловат низ вселената“. Се чинело, според него, како да „излегуваат од Месечината“. Двајцата астронаути на мисијата Аполо 17 во 1972 година, исто така, известиле за треперливи светла.

– Изгледа како Четврти јули! – рече астронаутот Џек Шмит, додавајќи сепак дека светлината би можела да биде одраз од парчиња мраз.

Во друг објавен документ, аудио снимка од вселенскиот лет Џемини 7 од 1965 година, забележан е разговор на астронаутот Френк Боман со контролата на Земјата. Тој ја известува контролната соба на НАСА за видување на неидентификуван објект, опишувајќи „чудовиште“ и „милијарди ситни честички“ лево од вселенското летало.

Воени видувања и нерешени случаи

Меѓу објавените извештаи се наоѓаат десетици индивидуални сведоштва за видувања на неидентификувани аномални појави (UAP). Во едно досие стои дека маж во 1957 година му рекол на ФБИ дека бил сведок на излегување на големо кружно возило од земјата. Тука се и понови интервјуа од 2023 година во кои американски граѓани зборуваат за метални објекти кои лебдат во воздухот и се материјализираат среде силна светлина.

Архивата вклучува и видео записи кои ги снимиле американските вооружени сили на Блискиот Исток во 2022 година. Снимките од Ирак, Сирија и Обединетите Арапски Емирати прикажуваат она што страницата на Пентагон го опишува како „неидентификувана и неразјаснета аномална појава“. На една снимка од 2022 година од неоткриена локација на Блискиот Исток се гледа овален објект како го преминува екранот, што во придружниот извештај е означено како „потенцијален проект за проектил“.

Новите материјали содржат и извештаи на пилоти за триаголен и метален UAP над Средоземното Море, како и за светлечки објект „во облик на фудбалска топка“ кој нечујно се движел низ забранет воздушен простор во близина на Јапонија. Пентагон призна дека многу од објавените досиеја се однесуваат на „нерешени случаи“ во кои владата не можела дефинитивно да ја утврди природата на набљудуваните појави.

Поделени реакции: „Добар почеток“ или одвлекување на вниманието?

Републиканскиот застапник од Тенеси, Тим Бурчет, кој и претходно се залагаше за поголема транспарентност на владата за НЛО, ја поздрави објавата на досиејата, нарекувајќи ја „многу добар почеток“ во објава на мрежата Х. Републиканката Ана Паулина Луна, застапничка од Флорида, исто така се залага за транспарентност по ова прашање и ја нарече објавата „огромен прв чекор во вистинската насока“.

Меѓутоа, поранешната застапничка Марџори Тејлор Грин, некогашна сојузничка на Трамп, изјави дека објавата го одвлекува вниманието од поитните проблеми со кои се соочуваат Американците, како што се растот на цените и војната во Иран.

„Доста ми е од пропагандата ’погледнете го сјајниот предмет’“, напиша Грин на Х.

Што значи објавата за уфолозите?

Објавата на документите со нетрпение ја очекуваше заедницата на уфолози. Истражувачите и ентузијастите веруваат дека ова е чекор кон поголема транспарентност и одговори за тоа што се случува „таму горе“.

„Додека претходните администрации не успеаја да бидат транспарентни по ова прашање, благодарение на овие нови документи и видео записи, јавноста може да создаде сопствено мислење: ’НО ШТО СЕ СЛУЧУВА?’“, напиша Доналд Трамп на „Трут соушал“ по објавата на документите. „Забавувајте се и уживајте!“

Џон Ерик Еге, регионален директор на MUFON за Тексас, рече дека е „заинтригиран“.

– Мислам дека тоа е чекор во вистинската насока. Не мислам дека се обидуваат нешто да скријат, но информациите што ги објавуваат се работи кои ги знаеме веќе долго време. Нема нови детали. Нема цврсти докази дека имаат тела или дека воспоставиле контакт, но се надевам дека одиме во вистинската насока – рече Еге.

И покрај откривањето на доверливи воени информации и сведоштва, објавената архива не содржи никакви револуционерни откритија ниту потврда за постоење на вонземски живот. Сепак, таа претставува најновото и најјасно признание на американската влада дека истражувала видувања на неидентификувани објекти.