Свет
Повеќе од 70 приведени на вчерашните протести во Минск
Белоруските активисти за човекови права известија за 78 лица приведени за време на протестите синоќа, пренесува ТАСС.
„На списокот на лица кои беа уапсени во Минск на 1 септември веќе има повеќе од 70 лица. Многу од нив се ослободени, но некои ќе останат во притвор до сослушувањето пред судот, вклучително и приведените новинари“, велат од Центарот за човекови права „Весна“.
Списокот ќе продолжува да расте, додаваат активистите.
Првично беа приведени околу 10 новинари. Некои од нив се ослободени откако нивните документи биле проверени во локалната полициска станица, но 6 лица морале да останат во притвор цела ноќ (вработени во веб-страницата tut.by и новинар на новинската агенција БелаПАН). Белоруското Министерство за внатрешни работи го потврди приведувањето, додавајќи дека точниот број на приведени ќе биде објавен денеска.
Вчера во Минск и регионите на републиката се одржаа неовластени масовни протести против исходот од претседателските избори. Студентскиот протест на неколку државни универзитети стана еден од најголемите, во кој учествуваа околу 2.000 луѓе.
Претседателските избори во Белорусија се одржаа на 9 август. Според Централната изборна комисија, актуелниот претседател Александар Лукашенко победи со 80,10 отсто од гласовите.
Светлана Тихановскаја беше втора, со поддршка од 10,12 отсто. Таа одби да го признае исходот, а набргу потоа ја напушти Белорусија и отиде во соседна Литванија, каде што е во моментов. Веднаш по објавувањето на резултатите, низ цела Белорусија избувнаа масовни протести кои првично завршуваа со судири со органите на прогонот.
Досега се приведени повеќе од 6.000 лица, а протестите продолжуваат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Од строго чуван затвор во Португалија побегнаа петмина затвореници
Петмина затвореници, меѓу кои еден Британец, Аргентинец и Грузиец, како и двајца Португалци, побегнаа од строго чуваниот затвор во Вале де Жудеуш, 30 км северно од Лисабон, соопштија португалските власти.
Според португалската затворска служба, мажите на возраст од 33 до 61 година побегнале вчера во 10:00 часот со помош однадвор, користејќи скали за да ја прескокнат затворската ограда. Полицијата веднаш била испратена за да ги пронајде бегалците, соопштија властите.
Двајцата Португалци служеле казни од 25 години за дела поврзани со трговија со дрога, кражби, грабежи и киднапирања. Останатите тројца исто така биле осудени за слични кривични дела.
Затворот Вале де Жудеуш е строго обезбеден и има капацитет од 560 затвореници.
Регион
Легендарниот рокер Бора Чорба погребан со хитот “Погледај дом свој анџеле“
Легендарниот рокер, фронтмен на групата „Рибља чорба“, Бора Ѓорѓевиќ (72) денес е погребан. Семејството, колегите, но и бројни пријатели и обожаватели се собраа на Градските гробишта во Чачак за да го кажат последното збогум и да се простат од него.
Хорот на гимназијата од Чачак по црковниот обред го испеа најголемиот хит на Бора „Погледај дом свој анџеле“, а овој момент расплака многумина и тоа беше најтажната сцена од гробиштата.
Рокерот Бора Ѓорѓевиќ (72) почина во средата на 4 септември во Љубљана по тешко боледување.Легендарниот рокер ќе почива во родниот Чачак, што му беше и последна желба.
Роден е на 1 ноември 1952 година.
Свет
Вселенското летало Старлајнер на Боинг слета без екипаж
Вселенското летало Старлајнер на Боинг слета без екипаж во пустината во Ново Мексико, со што заврши тримесечната пробна мисија отежната од технички проблеми.
Вселенското летало доцна синоќа самостојно го почна своето шестчасовно патување до Земјата, а астронаутите Буч Вилмор и Сани Вилијамс, првиот екипаж што леташе со Старлајнер, останаа на Меѓународната вселенска станица (МВС).
Беше одлучено Вилмор и Вилијамс да останат на МВЦ до февруари 2025 година, бидејќи Старлајнер се врати на Земјата користејќи маневри премногу опасни за екипажот.
Леталото повторно влезе во атмосферата на Земјата околу 5 часот утрово по средноевропско време, со орбитална брзина од приближно 27.400 километри на час.
Вилмор и Вилијамс ќе продолжат да спроведуваат научни експерименти додека се во вселената, а се очекува да се вратат на Земјата во февруари 2025 година со вселенско летало на компанијата СпејкИкс.