Свет
Подметнат пожар во домот на гувернерот на Пенсилванија: полицијата го разбуди и го евакуира

38-годишен маж е уапсен и ќе се соочи со обвинение откако наводно ја запалил официјалната резиденција на гувернерот на Пенсилванија Џош Шапиро, соопштија властите.
Коди Балмер се соочува со обвиненија за обид за убиство, тероризам, подметнување пожар и тежок напад.
Апсењето дојде неколку часа откако Шапиро, кој често се споменуваше како можен иден кандидат за Белата куќа, беше разбуден среде ноќ од властите кои тропаа на неговата врата поради пожар кој брзо се шири.
На прес-конференција, Шапиро рече дека е „очигледно емотивен“ додека раскажуваше што се случило. Тој и неговото семејство успеале да се евакуираат неповредени, но нивниот дом во главниот град Харисбург бил сериозно оштетен.
Photos of some of the damage caused by the arson at Pennsylvania Gov. Josh Shapiro's mansion https://t.co/s7VPo3x7vk pic.twitter.com/ghyqY6J1Ef
— philip lewis (@Phil_Lewis_) April 14, 2025
„Нема да дозволам да бидам затворен во окови што некој се обиде да ми ги стави со напад врз нас синоќа“, изјави Шапиро за новинарите.
Само неколку часа пред пожарот, гувернерот и неговото семејство биле дома и ја прославувале првата вечер на еврејскиот празник Пасха.
Тој додаде дека се уште не се познати мотивите на напаѓачот.
Заменик-началникот на полицијата Џорџ Бивенс изјави дека осомничениот имал импровизирана запалива направа и дека е уапсен во областа Харисбург. Властите веруваат дека Балмер ја прескокнал оградата околу резиденцијата на гувернерот и успеал да влезе во куќата, каде што запалил пожар. Истрагата се уште е во тек.
Според фотографиите од куќата, внатрешноста е речиси целосно уништена, се е покриено со црн пепел, а на изгорената маса се уште стојат неколку чинии. Властите потврдија дека пожарот, кој на крајот бил изгаснат, предизвикал „значителна штета на дел од резиденцијата“.
Властите претходно понудија награда од 10.000 долари за информација која ќе доведе до апсење на сторителите. Се уште не е познато дали дојавата довела до апсење на Балмер, кој се уште е во притвор. Џош Шапиро и неговата сопруга Лори имаат четири деца: Софија, Јона, Макс и Рубен.
Гувернерот Шапиро се сметаше за можен потпретседателски кандидат заедно со Камала Харис за време на нејзината претседателска кампања минатата година, но таа на крајот го избра гувернерот на Минесота Тим Волц.
Официјалната резиденција на гувернерот на Пенсилванија во Харисбург е изградена во 1968 година, се простира на 2.700 квадратни метри и досега била домаќин на осум гувернери.
Шапиро ја извршува функцијата гувернер од 2023 година, а пред тоа беше јавен обвинител на Пенсилванија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Иран се заканува со лансирање на „Хаибар“, Техеран најави жесток одговор

По интензивирањето на вооружениот судир меѓу Израел и Иран, иранските власти вчера испратија заканувачка порака до меѓународната заедница, најавувајќи потенцијално лансирање на ракетата „Хаибар“. Соопштението дојде со драматично предупредување: „Светот ќе биде шокиран од она што ќе го види“.
Оваа порака е реакција на ескалацијата на најжестоките судири досега меѓу двете држави, при што и двете страни – и иранските власти и израелскиот премиер Бенјамин Нетанјаху – најавија продолжување на воените дејствија. Според написот на хрватскиот портал Индекс.хр, ситуацијата се движи кон опасна нова фаза.
Што претставува „Хаибар“?
„Хаибар“ е балистичка ракета од среден дострел, именувана по историската битка за Хаибар во 7 век. Станува збор за нова генерација ракети во иранскиот арсенал, која според тврдењата од Техеран, има дострел од околу 2.000 километри – доволно за да ја погоди територијата на Израел, како и други цели во поширокиот Блиски Исток.
Иако нема официјална најава кога би можела да биде лансирана, изјавите од иранските власти јасно посочуваат дека тоа би било директен одговор на неодамнешните израелски напади, кои го таргетираа иранскиот воен капацитет и при кои загинаа високи функционери од Револуционерната гарда.
Карактеристики на „Хаибар“
Според достапните податоци, ракетата „Хаибар“ располага со следните способности:
– носи конвенционална боева глава со значително зголемена разорна моќ во споредба со претходните генерации,
– вклучува напредни системи за наведување, базирани на инерцијална навигација потпомогната со GPS, што ја зголемува нејзината прецизност,
– достигнува хиперсонична брзина во фазата на повторно влегување во атмосферата – помеѓу 12 и 15 маха (или 4 до 5 километри во секунда), што ја прави исклучително тешка за пресретнување со постоечките противракетни системи.
Иранските власти го претставуваат развојот и евентуалното лансирање на ова оружје како демонстрација на нивната технолошка и воена надмоќ, со порака дека секој напад врз нив ќе добие „силен и стратешки“ одговор.
Загриженост за поширока регионална дестабилизација
Иако Израел сè уште официјално не реагирал на иранските закани, армијата и разузнавачките служби се ставени во состојба на висока готовност. Со оглед на потенцијалниот дострел на „Хаибар“, можни цели не се само израелски градови, туку и американски воени бази во регионот.
Меѓународни аналитичари предупредуваат дека евентуално лансирање на оваа ракета може дополнително да ја разниша стабилноста во Блискиот Исток. Во време кога конфронтацијата меѓу двете земји е отворена и активна, потенцијалното користење на оружје што е речиси невозможно да се пресретне ја подигнува загриженоста и на глобално ниво.
Иако останува неизвесно дали и кога ќе се случи лансирање, самото спомнување на „Хаибар“ има моќен психолошки ефект. Во контекст на претходните напади со беспилотни летала и ракети, Иран јасно порачува дека нема намера да се повлече без одговор на израелската воена акција.
Свет
Хрватски конзул и неговата сопруга се повредени во нападот врз Тел Авив

Хрватскиот министер за надворешни работи Гордан Грлиќ Радман изјави дека разговарал со хрватскиот конзул во Тел Авив и неговата сопруга, кои беа повредени во иранскиот напад врз Израел, потврдувајќи дека нивните повреди се полесни.
„Шокиран сум од веста дека нашиот конзул и неговата сопруга се повредени во нападот врз Тел Авив. Зградата каде што живеат беше погодена. Разговарав со нив лично и за среќа, повредите се полесни и не се опасни по живот“, сподели Грлиќ Радман на Фејсбук.
„Министерството за надворешни и европски работи е во постојан контакт со амбасадата и преземаме сите мерки за да ја осигуриме нивната безбедност“, рече министерот.
Тој додадек дека најостро ги осудуваат нападите врз цивили и дипломатски објекти и повика на итна деескалација и воздржаност.
Хрватската амбасадорка во Израел, Весела Мрѓен Кораќ, потврди за хрватските медиуми дека зградата каде што живеат двајца хрватски дипломати е сериозно оштетена.
„Конзулот и неговата сопруга претрпеа полесни повреди“, рече амбасадорот.
Во раните утрински часови во петокот, израелските сили извршија напад врз Иран, таргетирајќи нуклеарни и ракетни постројки, при што загинаа повеќе од 104 лица, вклучувајќи високи воени команданти и научници, а беа ранети речиси 380.
Според извештаите, Иран одговори со балистички ракети кои погодија повеќе локации низ Израел, при што загинаа три лица, а беа ранети повеќе од 90 други.
Свет
Иран потврди: Израел ни уби уште двајца генерали

Иран потврди дека уште двајца високи воени функционери се убиени во израелските воздушни напади: генерал Голамреза Мехраби, заменик-началник на разузнавањето на Генералштабот на вооружените сили, и генерал Мехди Рабани, заменик-началник на операциите. Нивните имиња беа објавени од иранската државна телевизија, но не беше прецизирано каде загинале.
Потврдата доаѓа откако Иран веќе ја призна смртта на неколку клучни воени и политички личности во истите напади, вклучувајќи ги:
– Генерал Хосеин Салами, командант на Иранската револуционерна гарда (ИРГЦ);
– Генерал Мохамад Багери, началник на Генералштабот на вооружените сили;
– Генерал Голам Али Рашид, командант на штабот Хатам-ал Анбија;
– Генерал Амир Али Хаџизаде, началник на воздухопловниот оддел на ИРГЦ;
– Али Шамхани, поранешен секретар на Врховниот совет за национална безбедност и советник на Врховниот лидер.
Израелскиот премиер Бенјамин Нетанјаху изјави дека нападите биле насочени кон военото и научното раководство на Иран да ја запре неговата нуклеарна програма.
Нетанјаху го повика иранскиот народ да се спротивстави на сопствениот режим, велејќи дека постапките на Израел „го отвораат патот“ кон слободата.