Свет
Подметнат пожар во домот на гувернерот на Пенсилванија: полицијата го разбуди и го евакуира

38-годишен маж е уапсен и ќе се соочи со обвинение откако наводно ја запалил официјалната резиденција на гувернерот на Пенсилванија Џош Шапиро, соопштија властите.
Коди Балмер се соочува со обвиненија за обид за убиство, тероризам, подметнување пожар и тежок напад.
Апсењето дојде неколку часа откако Шапиро, кој често се споменуваше како можен иден кандидат за Белата куќа, беше разбуден среде ноќ од властите кои тропаа на неговата врата поради пожар кој брзо се шири.
На прес-конференција, Шапиро рече дека е „очигледно емотивен“ додека раскажуваше што се случило. Тој и неговото семејство успеале да се евакуираат неповредени, но нивниот дом во главниот град Харисбург бил сериозно оштетен.
Photos of some of the damage caused by the arson at Pennsylvania Gov. Josh Shapiro's mansion https://t.co/s7VPo3x7vk pic.twitter.com/ghyqY6J1Ef
— philip lewis (@Phil_Lewis_) April 14, 2025
„Нема да дозволам да бидам затворен во окови што некој се обиде да ми ги стави со напад врз нас синоќа“, изјави Шапиро за новинарите.
Само неколку часа пред пожарот, гувернерот и неговото семејство биле дома и ја прославувале првата вечер на еврејскиот празник Пасха.
Тој додаде дека се уште не се познати мотивите на напаѓачот.
Заменик-началникот на полицијата Џорџ Бивенс изјави дека осомничениот имал импровизирана запалива направа и дека е уапсен во областа Харисбург. Властите веруваат дека Балмер ја прескокнал оградата околу резиденцијата на гувернерот и успеал да влезе во куќата, каде што запалил пожар. Истрагата се уште е во тек.
Според фотографиите од куќата, внатрешноста е речиси целосно уништена, се е покриено со црн пепел, а на изгорената маса се уште стојат неколку чинии. Властите потврдија дека пожарот, кој на крајот бил изгаснат, предизвикал „значителна штета на дел од резиденцијата“.
Властите претходно понудија награда од 10.000 долари за информација која ќе доведе до апсење на сторителите. Се уште не е познато дали дојавата довела до апсење на Балмер, кој се уште е во притвор. Џош Шапиро и неговата сопруга Лори имаат четири деца: Софија, Јона, Макс и Рубен.
Гувернерот Шапиро се сметаше за можен потпретседателски кандидат заедно со Камала Харис за време на нејзината претседателска кампања минатата година, но таа на крајот го избра гувернерот на Минесота Тим Волц.
Официјалната резиденција на гувернерот на Пенсилванија во Харисбург е изградена во 1968 година, се простира на 2.700 квадратни метри и досега била домаќин на осум гувернери.
Шапиро ја извршува функцијата гувернер од 2023 година, а пред тоа беше јавен обвинител на Пенсилванија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израел скри патнички авиони на тајна локација надвор од земјата

Израелските авиокомпании „Ел Ал“, „Аркија“ и „Израел“ ги преместија своите авиони надвор од земјата на непозната локација, како подготовка за можен ирански напад врз аеродромот „Бен Гурион“, јавува дописникот на „Скај њуз“ од Блискиот Исток.
Авионите беа транспортирани без патници, како дел од однапред подготвени безбедносни протоколи во случај на понатамошна ескалација и напади врз клучна инфраструктура.
Ноќеска Израел изврши голем воздушен напад врз повеќе цели во Иран. Според израелски воени извори, погодени се објекти поврзани со нуклеарната програма на Иран и воени локации, вклучувајќи го и клучниот комплекс за збогатување ураниум во Натанц.
Свет
Германија ја зајакнува заштитата на еврејските и израелските институции по нападот врз Иран

Германскиот канцелар Фридрих Мерц изјави дека Израел има право да го брани своето постоење, а по израелските напади врз Иран, наредил зголемена заштита на еврејските и израелските објекти во Германија.
Утрово телефонски разговараше со израелскиот премиер Бенјамин Нетанјаху и свика состанок на кабинетот за безбедност во Берлин, објави германската влада.
Мерц нагласи дека целта останува да се спречи Иран да развива нуклеарно оружје и го обвини Техеран дека продолжува да ги крши своите обврски од Договорот за неширење на нуклеарно оружје и дека претставува сериозна закана за регионот, особено за Израел.
Тој ги повика двете страни да се воздржат од потези што би можеле дополнително да го ескалираат конфликтот и да го дестабилизираат Блискиот Исток.
Синоќа Израел изврши воздушен напад врз повеќе цели во Иран како дел од операцијата „Стоечки лав“. Според израелски воени извори, погодени се објекти поврзани со нуклеарната програма на Иран и воени локации, вклучувајќи го и клучниот комплекс за збогатување на ураниум во Натанц. МААЕ потврди дека Натанц е меѓу нападнатите локации и е во контакт со иранските власти за следење на нивото на зрачење.
Израелскиот премиер Бенјамин Нетанјаху изјави дека целта на операцијата е да се „неутрализира егзистенцијална закана“, истакнувајќи дека Иран со години развива нуклеарни капацитети и отворено се заканува дека ќе го уништи Израел. Иран го затвори својот воздушен простор, а израелската војска го подигна нивото на тревога за можен одговор, вклучително и лансирање беспилотни летала и ракети од Иран и територии контролирани од проирански групи.
Свет
Како ќе одговори Иран на Израел: Пет можни сценарија

Израел го нападна Иран преку ноќ. Според израелски воени извори, погодени се објекти поврзани со нуклеарната програма на Иран и воени локации, вклучувајќи го и клучниот комплекс за збогатување ураниум во Натанц. Експлозии се слушнале и во Техеран.
Израелскиот министер за одбрана, Израел Кац, прогласи вонредна состојба низ целиот Израел. Иранците испратија околу сто дронови кон Израел, но израелската војска објави дека ги соборила сите.
Соединетите Американски Држави предупредија дека конфликтот со Иран би бил хаотичен и би можел да го вовлече целиот регион во војна, но Израел сепак одлучи да нападне.
Иако Иран е сериозно ослабен од санкциите во последните години и е сè повеќе изолиран, тој сè уште има капацитет да го дестабилизира регионот и светската економија. Како би можел Иран да одговори?
Британскиот „Тајмс“ наведе пет можни сценарија.
Сценарио 1: Иран возвраќа со ракетни напади врз американските бази и Израел
Иран поседува илјадници ракети со среден дострел способни да погодат американски бази низ целиот регион – вклучувајќи ги базите во соседен Ирак и воздухопловната база Ал-Удеид во Катар. Во 2020 година, откако во американскиот напад со беспилотни летала беше убиен иранскиот воен командант Касем Сулејмани, Иран испука ракети врз базите во кои се сместени американски трупи во Ирак.
Во тоа време немаше американски жртви бидејќи базата беше евакуирана навреме по предупредување од Иран. Денес, нападот може да биде многу поширок – таргетирајќи повеќе бази истовремено, користејќи ирански сојузници и посреднички групи во Ирак и Јемен, што би го отежнало пресретнувањето на ракетите.
Сценарио 2: Иран напаѓа нафтени полиња во регионот
Блискиот Исток произведува околу 30 проценти од светските резерви на нафта, главно во Саудиска Арабија, Обединетите Арапски Емирати и Кувајт. Во септември 2019 година, ракетен напад и напад со беспилотни летала врз саудиски нафтен објект – за кој Саудијците го обвинија Иран – го преполови производството на нафта во земјата и привремено отстрани 5 проценти од светските резерви од пазарот.
Иако Иран оттогаш се приближи до Саудиска Арабија и другите регионални сили, тој сигнализираше дека би можел да ги таргетира нафтените полиња во регионот доколку неговите нуклеарни објекти бидат нападнати. Предизвикот за Израел и Соединетите Американски Држави би бил да неутрализираат што е можно повеќе ирански ракетни батерии во првиот бран напади, за да се минимизира влијанието на потенцијалниот ирански одговор.
Сценарио 3: Иран го блокира бродскиот сообраќај во Персискиот Залив
Персискиот Залив е клучен за глобалниот транспорт на нафта – до 30 проценти од светските залихи минуваат низ Ормутскиот Проток. Конфликтот би можел да го парализира бродскиот сообраќај преку таа рута.
Поморската агенција на Велика Британија, UKMTO (Поморски трговски операции на Обединетото Кралство), веќе издаде предупредување до бродовите во регионот да бидат претпазливи. Во минатото, Иран минираше и напаѓаше бродови во областа за да изврши притисок врз земјите од Заливот и САД.
Сценарио 4: Иран директно го напаѓа Израел
Иран претходно се закани со понатамошни напади врз Израел доколку израелските сили ги нападнат неговите нуклеарни објекти. Во октомври, како одговор на израелското бомбардирање на иранските ракетни и воздушни одбранбени објекти, Иран испали бараж од ракети кон Израел.
Повеќето од овие ракети беа пресретнати од израелската воздушна одбрана со помош на САД, Велика Британија и Франција, но неколку ракети ја погодија својата цел – тие паднаа на воен аеродром каде што се сместени флота израелски борбени авиони Ф-35, само неколку стотини метри од седиштето на израелската разузнавачка агенција Мосад.
Сценарио 5: Иранските сојузници се приклучуваат на конфликтот
Хезболах, долгогодишен ирански сојузник, играше улога во одвраќањето на Израел од напади со децении, но групата е значително ослабена, како и Хамас во Газа.
Иран продолжува да има силна поддршка од Хутите во Јемен, кои редовно испукуваат ракети кон Израел, како и од вооружените групи во Ирак, кои напаѓаа и израелски и американски цели во Ирак и Сирија.