Членовите на Европскиот парламент (ЕП) усвоија резолуција во Стразбур во која се наведува дека напредокот на Србија кон ЕУ директно ќе зависи од зајакнувањето на владеењето на правото, нормализирањето на односите со Косово и усогласувањето со европската надворешна и безбедносна политика, што вклучува воведување санкции против Русија.

Резолуцијатабеше усвоена на пленарната седница на ЕП со 523 гласа „за“, 78 „против“ и 34 воздржани.

Со резолуцијата, Европскиот парламент за првпат ги повикува Србија и Косово да постигнат договор за нормализација на односите „врз основа на взаемно признавање“.

Српскиот претседател, Александар Вучиќ, изјави дека нема ни да го разгледа барањето на Европскиот парламент за Косово.

Тој кажа како Србија ќе одговори:

„Убаво, пристојно и учтиво – нема. Можеме ли да направиме нешто попристојно? Не ни паѓа на памет. Можеме ли да направиме нешто уште попристојно? Нема ни да разгледуваме”, беше јасен Вучиќ.

На прашањето дали ќе се согласи да оди на дијалог со Албин Курти, Вучиќ рече дека би сакал, но дека никој не му се јавил и дека не гледа смисла во тоа.

Премиерот на Албанија, Еди Рама денеска за холандскиот весник „Волкскрант“ изјави дека ЕУ треба да биде внимателна со Србија.

Тој посочи и дека од Белград не треба да се бара нешто што не може да го исполни.

„Србија не може брзо да се ослободи од зависноста главно од рускиот гас, но трипати гласаше против руската инвазија на Украина во Обединетите нации. Ова е уникатно и ново, никој не го очекуваше ова. Сепак, Балканот останува незаштитен круг. Војната во Украина лесно би можела да ескалира, па дури и да доведе до отворен конфликт“, рече Рама, пренесе албанската агенција АТА.

Рама го посети холандскиот премиер Руте и изјави дека долго време ја чувствува холандската блокада за добивање статус на кандидат за членство во ЕУ, но дека сега гледа големи можности за соработка.

Британскиот премиер Борис Џонсон најави дека ќе се бори да остане на власт и покрај зголемените повици да се повлече.

Позицијата на Џонсон ја разнишаа низа оставки од колеги и министри кои сметаат дека тој не е добар премиер. На неделниот распит на премиерот во парламентот пристигна со борбен став.

По оставката на повеќе од 20 функционери, некои претставници сметаат дека Џонсон не може да ги пополни тие позиции во време кога се повикува владата да одговори на растот на трошоците за живот и да ја поддржи економијата чиј раст забавува и е загрозен со рецесија. Неговата судбина би можела да биде решена најрано во среда, кога таканаречениот Комитет 1922 ќе се состане за да ги утврди правилата за гласање доверба. Портпаролот на Џонсон рече дека Џонсон верува дека ќе преживее такво гласање.

„Работата на премиерот во тешки околности е да продолжи да работи“, рече Џонсон. Претходно, тој се обиде да го покаже својот авторитет со брзо назначување на Надим Захави, популарен политичар во Конзервативната партија, кој е заслужен за брзата набавка на вакцината „Ковид-19“, за министер за финансии.

Но, настапот на Џонсон во парламентот наиде на брутален одговор, пишува Ројтерс. Тешката позиција во која се наоѓа се покажа кога некои негови колеги од власта не успеаја да се воздржат од смеење додека лидерот на опозицијата му кажа дека е лидер на „лесната бригада“.

Џонсон беше прашан за неговата оставка од тројца членови на неговата партија.

Го нападна и поранешниот министер за здравство Саџид Џавид, наведувајќи ги сите афери и гафови. „Во одреден момент треба да одлучиме дека е премногу. Тој момент е денес“, рече Џавид. Според анкетата на YouGov, 69 отсто од Британците се согласуваат со поранешниот министер.