Свет
Политиколог: Луѓето над 50 години полесно веруваат во дезинформациите за Украина

Дезинформациите за војната во Украина, пандемијата и другите актуелни настани претставуваат закана пред сè за постарите корисници на Ватцап, Фејсбук и другите социјални мрежи, тврди политиколог специјализиран за ширење лажни информации.
Генерацијата што не се спои со дигиталната ера е најранлива на влијанието на лажните вести, вели Јозеф Холнбургер, директор на германскиот непрофитен центар за мониторинг, анализа и стратегија, кој се занимава со теории на заговор и екстремистичка содржина.
„Постарите луѓе, кои подоцна во својот живот стапиле во контакт со платформите за пораки како Ватцап, се соочуваат со емотивно наполнета содржина за време на руската инвазија на Украина, која може да ја земаат здраво за готово“, рече Холнбургер.
„Мислам дека затоа многу образовни кампањи треба да бидат насочени кон возрасната група над 50 години“, додаде тој.
Тој смета дека официјалните лица кои сакаат да се вклучат во онлајн кампањи за дезинформација и теории на заговор треба да се фокусираат на постарите интернет-корисници.
Таканаречените „дигитални староседелци“, односно оние кои пораснале со посилни медиумски вештини, можат да разговараат со постарите членови на семејството за можните ризици од користењето интернет.
Проблемот со недостиг на медиумски компетенции не е толку изразен кај училишните деца, смета Холнбургер.
Повеќе од 60 експерти, кои учествуваа во истражувањето на Фондацијата „Водафон“ во летото 2021 година, ја потврдија оваа оценка. Тие рекоа дека постарите луѓе се речиси двојно поранливи на кампањи за дезинформации отколку адолесцентите и помладите возрасни (74 проценти наспроти 40 проценти).
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Бугарија нема да отстапи од ветото без согласност на парламентот

Го потврдивме ветувањето дека темата за Северна Македонија задолжително ќе помине преку Народното собрание, изјави портпаролката во кабинетот на премиерот Кирил Петков, Лена Бориславова по завршувањето на вонредниот коалициски состанок.
„Коалицијата ќе дејствува обединето, но оставете експертите да работат и да најдат најдобар начин да ја претстават бугарската позиција и да ја заштитат“, рече таа додавајќи дека за нив е важно да го бранат својот став.
„Ова нема да биде влада која ќе го предаде националниот интерес. Кога ќе имаме одлука и извештај на МНР кое известува за напредокот на бугарската позиција, ќе имаме предлог до Народното собрание. Во оваа фаза не сме таму“, додаде Бориславова, пренесе „Бтв.бг“.
Станислав Балабанов од Има таков народ рече дека секоја партија се согласила дека патеката по која Бугарија треба да оди е една во овој случај.
„Се надеваме во иднина на позитивни акции од Скопје“, рече Балабанов.
Европа
Кипар од 1 јуни ќе ги укине сите мерки за корона

Кипар ќе ги укине сите ограничувања за коронавирусот од 1 јуни, соопштија денеска властите во Никозија.
Нема да бидат потребни повеќе сертификати или тестови за вакцинација, а владата одлучи да ја укине обврската за носење маски за лице во сите затворени простори, освен во болниците, домовите за стари лица и другите затворени медицински установи, од 1 јуни, пренесува АП.
Европа
Кадиров: Полска може да биде следна

Лидерот на руската јужна провинција Чеченија, Рамзан Кадиров, кој е поддржан од Кремљ, објави видео во кое предупредува дека Полска би можела да биде следна по Украина, пренесува Бета.
Во видеото што го објави на својата страница на Телеграм, Кадиров рече дека Украина е „завршена работа“.
Полска, која граничи со Украина, од почетокот на руската инвазија на Украина и испраќа оружје и друга помош и досега прими милиони украински бегалци.
Кадиров потоа го повика украинскиот претседател Володимир Зеленски „конечно да се вразуми“ и да ги прифати условите понудени од рускиот претседател Владимир Путин.
Кадиров постојано ги користеше социјалните мрежи за да се пофали со наводните настапи на чеченските борци против украинските војници и да дава други непотврдени изјави за војната во Украина, пренесе „Бета“.