Свет
Поради мајмун, цела Шри Ланка остана без струја, рече министерот за енергетика

Владата на Шри Ланка обвини мајмун за прекинот на струјата во земјата, пишува „Телеграф“.
Според министерот за енергетика, Кумара Јајакоди, прекинот на електричната енергија се случил кога мајмун влегол во електраната „Панадура“, јужно од Коломбо, и дошол во контакт со мрежен трансформатор.
Пoради прекинот на снабдувањето, милиони луѓе се без струја со часови, а тоа предизвикa проблеми и во болниците, станиците за третман на водата и железничкиот систем.
„Мајмунот удри во далновод во електраната, што предизвика моментна нерамнотежа во системот“, изјави Јајакоди за новинарите.
Чувар од електраната „Панадура“ изјави дека слушнал силна експлозија, проследена со облак од чад, што се издигал од централата. Мајмунот починал на местото на настанот, додаде тој.
Многумина беа принудени да се потпрат на генераторите откога почна прекинот на електричната енергија, вчера околу 11 часот по локално време. На жителите им беше препорачано да ги исклучат своите соларни системи и да штедат вода додека не се врати струјата.
Иако напојувањето постепено се обновува, официјални лица рекоа дека ќе бидат потребни уште околу четири дена ситуацијата целосно да се стабилизира.
„Здравствените установи и постројките за прочистување на водата се наш приоритет“, соопшти ЦЕБ. Министерството за енергетика и ЦЕБ и се извинија на јавноста за непријатностите предизвикани од прекинот на електричната енергија.
Додека властите работеа на санација на проблемот, многу жители на Шри Ланка повлекуваа паралели со легендарната приказна за Хануман, богот на мајмуните од хиндуистичката митологија, кој го запали островот со запалената опашка.
Социјалните мрежи беа преплавени со мемиња и сатирични објави, а некои сугерираат дека Хануман се вратил за да ја потсети Шри Ланка на нејзината влошена инфраструктура.
Инцидентот повторно предизвика критики за застарената електрична мрежа во земјата, при што инженерите предупредуваат дека системот е толку кревок што дури и најмалиот прекин може да доведе до катастрофален дефект.
Поведена е истрага за да се утврди точната причина за прекинот на електричната енергија, а жителите веруваат дека владата треба да даде приоритет на модернизацијата на мрежата наместо да ги обвинува злобните мајмуни.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Франција прогласи високо ниво на тревога за птичји грип

Француските власти го зголемија нивото на тревога за птичји грип од средно на високо барајќи од живинарските фарми во целата земја да ја чуваат живината во затворен простор предупредувајќи дека Европа се соочува со сезонска епидемија на болеста.
„Уредбата со која се наредува зголемување на нивото на тревога од средно на високо е издадена по докази за инфекција кај дивите птици преселници во Европа, вклучително и Франција, и потврдени епидемии на неколку живинарски фарми“, соопшти француското Министерство за земјоделство, според „Ројтерс“.
Во соопштението на француското Министерство за земјоделство беше потврдено дека досега се откриени две епидемии на птичји грип на француските живинарски фарми и три кај домашните одгледувачи.
Првиот случај на птичји грип беше откриен кон средината на октомври на фарма за фазани и еребици на север од Франција.
Високо патогениот птичји грип е сезонска болест што ја шират птиците преселници, која често ги принудува одгледувачите од целиот свет да уништат десетици милиони птици за размножување.
Фото: принтскрин
Свет
Кина го тестира најбрзиот воз во светот

Најбрзиот воз во светот, CR450, почна серија тест-возења на брзата железница во Кина достигнувајќи брзина од 453 километри на час за време на едно возење.
Серијата возови CR450, дизајнирана за максимална тест-брзина од 450 километри на час и комерцијална брзина од 400 километри на час, моментно е во процес на квалификациски тестови на брзата линија што го поврзува источниот град Шангај со западниот град Ченгду, објави „Наука и технологија дејли“, објави „Синхуа“.
Брзиот воз достигнува забрзување од 350 километри на час за четири минути и 40 секунди.
Во споредба со претходниот модел CR400, моделот CR450 има подолг и поаеродинамичен нос, понизок покрив за 20 сантиметри и 50 тони помала тежина, што го намалува аеродинамичниот отпор за 22 процента.
Фото: принтскрин
Свет
Москва: Средбата Лавров – Рубио не е ниту закажана за да може да биде одложена

Средбата меѓу рускиот министер за надворешни работи Сергеј Лавров и американскиот државен секретар Марко Рубио бара подготовка, објави државната новинска агенција РИА повикувајќи се на рускиот заменик-министер за надворешни работи, Сергеј Рјабков. Очекуваната средба меѓу Рубио и Лавров се смета за клучен подготвителен чекор за вториот самит меѓу американскиот претседател Доналд Трамп и рускиот претседател Владимир Путин оваа година во Унгарија.
Висок руски дипломат изјави дека е прерано да се зборува за времето на можна средба на министрите за надворешни работи на Русија и САД, објави РИА.
„Москва работи на она што го разговараа рускиот министер за надворешни работи, Сергеј Лавров, и американскиот државен секретар, Марко Рубио“, изјави рускиот заменик-министер за надворешни работи, Сергеј Рјабков.
Лавров и Рубио вчераа разговараа на телефон. Рјабков рече дека прашањето за нивната средба не е конкретно споменато. Руското Министерство за надворешни работи, реагирајќи на веста дека средбата на шефовите на дипломатиите на САД и Русија е одложена, рече дека не може да се одложи нешто за што не е договорено.