Бројот на украински државјани на кои им е одобрен политички азил во земјите од Европската Унија достигна највисоко ниво во последните две години откога Украина ги промени правилата за излез за млади мажи, објавува порталот „Политико“.

Според податоците на гореспоменатото издание, земјите од Европската Унија издале 79.205 нови одлуки за привремена заштита на украински државјани во септември, што претставува зголемување од дури 49 проценти во споредба со август. Ова е воедно и најголемото месечно зголемување од август 2023 година.

Најголем прилив на украински баратели на азил е забележан во Полска, Германија и во Чешка.

Според извештајот, зголемувањето на бројот на барања е директно поврзано со новиот закон што стапи во сила во Украина на 28 август, кој им овозможува на млади мажи на возраст од 18 до 22 години да ја преминат државната граница. Оваа промена на правилата предизвика бран заминувања на млади Украинци, кои очигледно решиле да побараат засолниште во земјите од Европската Унија.

Фото: принтскрин

Националната компанија за аеродроми во Букурешт денес објави дека во текот на изминатата ноќ претставници на Романската аеродромска служба (RAS) забележале дека се појавил пламен под кабината на авионот на „Визер“, кој долетал од Барселона за Букурешт.

Техничкиот персонал, кој бил присутен на самото место, ја отстранил опремата за снабдување на авионот со електрична енергија за да го избегне инцидентот, објавува денес порталот „Диги 24“.

Авионот слетал на меѓународниот аеродром „Аурел Влаику“ во близина на Букурешт од Барселона во 1.18 часот, а во времето на инцидентот повеќето од 225 патници веќе го напуштиле авионот.

Од безбедносни причини капетанот одлучил да го активира лизгачкиот излез во случај на вонредна состојба, кој ниеден од патниците немал потреба да го користи.

За време на инцидентот, кој траел кратко, патниците не биле во опасност и не е предизвикана материјална штета.

Авионот бил подложен на детаљна техничка проверка, а инцидентот го истражуваат надлежните органи.

Фото: принтскрин

Началникот на Генералштабот на француските вооружени сили, генерал на воздухопловните сили Фабиен Мандон, денес изјави дека се во тек подготовките на припадниците на вооружените сили на таа земја за можна војна со Русија, за што зборуваше и во својот говор пред пратениците во францускиот парламент, кога предупреди дека армијата мора да биде подготвена за можен конфликт со Русија во рок од три или четири години.

Во интервју за „Квест Франс“, Мандон рече дека францускиот претседател Емануел Макрон го замолил да предложи опции за да се обезбеди континуирана заштита на францускиот народ и интересите на земјата, за што зборувал и во своето обраќање пред членовите на Комитетот за одбрана на францускиот парламент на 22 октомври.

„Ги споделив моите забелешки со народните претставници за да можеме да ги предвидиме (настаните) и да донесеме правилни одлуки. Ја гледам еволуцијата на Русија – во 2008 година ја нападна Грузија, во 2014 година го анектираше Крим, во 2022 година беше Украина. Русија ја смета Европа за слаба. Знам дека се реорганизира воено за да може да се вклучи во борбата против земјите од НАТО. Мора да се подготвиме за тоа“, рече Мандон.

Кога го прашале кои докази го довеле до таков заклучок, Мандон одговорил дека тоа е збир на различни индиции и разузнавачки информации.

„Оваа проценка ја делат и нашите блиски сојузници. Шефот на германската разузнавачка служба неодамна зборуваше за тоа, перцепцијата на Германија е иста како нашата, исто така и на Велика Британија. Претседателот на Здружениот штаб на вооружените сили на Соединетите Американски Држави е исто така исклучително загрижен за Русија и нејзините сè поблиски врски со различни сили – Иран, Кина и Северна Кореја. Севернокорејците се борат против Украина на нашиот континент. Русија веќе го глобализираше украинскиот конфликт“, истакна Мандон.

Тој рече дека француските сили, во подготовка за потенцијален конфликт со Русија, редовно учествуваат во вежби од голем обем во услови на многу сериозни битки со противник кој има голема моќ, како што е Русија, пренесуваат медиумите во регионот.

Мандон најави организирање на нова вежба следната година, наречена „Орион 2026“, во која ќе учествуваат вооружените сили на Франција и сојузничките земји.

Генералот изјави дека верува оти вклучувањето на целото француско општество е од суштинско значење за заштита од агресијата на друга земја.

„Шок од ваков вид бара многу повеќе од само вооружените сили, туку и поддршка од целата земја. Русија ги проучуваше нашите општества и знае дека нашата сила лежи во единството. Ако успее да нè фрагментира и подели, може да победи“, рече Мандон.

Како неколку примери за обиди за дестабилизација на француското општество, тој ги наведе лажните ковчези, кои беа поставени пред Ајфеловата кула во јуни, и свинските глави, кои беа поставени пред неколку џамии во Франција на почетокот на септември.

Фото: принтскрин