Во Данска на луѓето кои примиле две различни вакцини, ќе им се понуди трета доза за да им се даде статус на вакцинирани лица надвор од шенген-зоната каде што важат различни прописи.

Данското Министерство за здравство соопшти дека на луѓето кои примиле различни вакцини ќе им биде понудена трета доза по завршувањето на националната програма за вакцинација.

Причината за ова е што неколку земји надвор од ЕУ и шенген-зоната не дозволуваат влез на оние кои се вакцинирани со различни вакцини, односно не ги сметаат дека се целосно вакцинирани. Ова може да предизвика проблеми со патувањето за приближно 150.000 дански граѓани кои примиле две различни вакцини.

Вкупно 151.335 граѓани, претежно здравствени работници, првично ја примија вакцината на „астразенека“, но потоа беше отстранета од официјалната програма за вакцинација во Данска, поради загриженост за згрутчување на крвта. Потоа им беше дадена или вакцината на „Фајзер“ или на „Модерна“.

Протестантската црква во Монпелје, град на југот на Франција, за првпат се согласи да благослови истополов брак.

По граѓанската венчавка, која ја направиле Емелин Доде (33) и Ањес Кауфман (31), дошле да примат благослов во црквата Магелон во Монпелје, пренесува парискиот дневен весник „Монд“.

Протестантската црква не венчава двојки, туку само им дава благослов на сопружниците кои се венчале пред граѓанските власти.

Церемонијата пред црковниот олтар ја воделе свештеници блиски до двете жени, велејќи дека на тој ден очекуваат зборовите на љубовта, храброста, но и отфрлањето да одекнат малку погласно од вообичаеното.

„Знаеме дека се водеше тешка борба за другите пред нас. На овој начин им покажуваме чест и благодарност“, рече Ањес Кауфман.

Додека се разменувале венчалните прстени, присутни биле верници, поранешни колеги од Богословскиот факултет, парохијани, но и гости кои никогаш не влегле во протестантската црква.

„Благодарам на сите што нè поддржаа“, рече Емелин Доде.

Повеќе од 250 лица во Велика Британија и Ирска се осудени за злосторства за сексуална злоупотреба на деца, кои ги сториле додека биле на позиции на водачи меѓу извидниците или други одговорни позиции во извидничкото движење од 50-тите години на минатиот век.

Според анализата што отвора прашања во врска со заштитните активности на организацијата, многу деца биле малтретирани од некој на кој им била доверена нивната благосостојба, пишува „Гардијан“.

Пресудите во 255 случаи вклучуваат пресуди за силување, непристоен напад, воајеризам, создавање и поседување порнографски слики…

Случаите датираат од 50-тите години на минатиот век, но вклучуваат и современи примери, како Оливек Купер од Богонор Регис, кој во октомври минатата година беше затворен на шест години поради три точки за сексуален напад на две шестгодишни девојчиња, правење непристојни фотографии од деца и 13 точки за воајеризам.

Овие дела се случиле нешто повеќе од две години претходно.

Минатата година Грахам Ависон од Манчестер, откако се изјасни за виновен, беше осуден на пет години и седум месеци затвор во ноември, врз основа на четири точки за непристоен напад.

Аби Хиксон, соработник во тимот против злоупотреба на адвокатот Болт Бурдон Кемп (ББК), кој создаде интерактивна мапа на злоупотреба на извидници, рече дека Здружението на извидници треба да стори многу повеќе за да ја заштити безбедноста на своите членови од сексуални предатори и дека во моментов има показатели оти постои можност ненамерно да се олесни злоупотребата, наместо активно да се спречи тоа.

„Повеќето од нивните политики за заштита се потпираат на интегритетот на самите извиднички водачи и зависат од индивидуата која ќе избере или не да се придржува до нив. Важно е да се има предвид дека оние кои сексуално ги злоупотребуваат извидниците по својата природа се многу манипулативни, таинствени, изопачени опортунисти“, рече Хиксон, додавајќи дека мора да постои култура на транспарентност и доверба и мора да се преземат чекори на сите нивоа во организацијата за активно спречување на сексуалната злоупотреба на извидници.