Австрија е една од 17. европски земји што добиле дози од серијата вакцини на „Астра зенека“, чија употреба беше запрена од страна на властите во оваа држава додека истражуваат случај на смрт и болест по нејзината употреба, изјави висок здравствен службеник.

49-годишна медицинска сестра во Цветл, град северозападно од Виена, починала од сериозно нарушување со згрутчување на крвта по приемот на вакцината.

Друга медицинска сестра, исто така од Цветл, која има 35 години и добила доза од истата серија, АBV 5300, развила белодробна емболија и сега закрепнува.

„Ги информиравме сите европски колеги во европската мрежа бидејќи серијата, со речиси еден милион дози, е испратена во 17 европски земји“, рече на прес-конференција Криста Виртхумер-Хохе, шефица на надзорното тело на пазарот за лекови при австриската агенција за јавно здравје АГЕС.

„Комитетот за процена на ризици при Европската агенција за лекови (ПРАЦ), кој ја надгледува безбедноста на лековите, расправаше за случајот во понеделникот“, соопшти Виртхумер-Хохе, која е и на чело на управниот одбор на Агенцијата.

Таа не прецизира за кои земји станува збор ниту, пак, дали и какви чекори се преземени. „Астра зенека“ соопшти дека е во контакт со австриските власти и дека целосно ќе ја поддржи истрагата.

Англиско-шведската компанија соопшти дека сите серии биле предмет на строга и ригорозна контрола на квалитетот и дека нема потврдено никакви сериозни несакани дејства поврзани со вакцините.

Ќе биде спроведена аутопсија врз телото на починатата медицинска сестра, а Виртхумер-Хохе рече дека очекува резултати следната недела.

Регулаторите на Европската Унија ја одобрија вакцината кон крајот на јануари велејќи дека е ефикасна и безбедна за употреба, а Светската здравствена организација ја стави на списокот за итна употреба кон средината на февруари.