Свет
Претседателот на Иран: Никогаш немавме намера да го убиеме Доналд Трамп

Претседателот на Иран, Масуд Пезешкијан изјави дека земјата никогаш не планирала да го убие новоизбраниот претседател на Соединетите Американски Држави, Доналд Трамп. Тој го кажа ова за NBC News и ги демантираше тврдењата на самиот Трамп и американското Министерство за правда за време на изборната кампања, дека има заговор на иранската елита да го убие Трамп.
„Никогаш не сме се обиделе да го направиме тоа и никогаш нема да го направиме. Ова е уште една од оние шеми што Израел и други земји ја осмислуваат за да ја промовираат иранофобијата. Иран никогаш не се обидел ниту планирал да убие некого. Барем колку што знам“, рече Пезешкијан.
Запрашан дали Иран е подготвен да вети дека нема да има обид за атентат на Трамп, Пезешкијан рече дека Иран никогаш не се обидел да го стори тоа и никогаш нема да го направи. Трамп, кој победи на минатогодишните избори во САД и ќе ја преземе функцијата на 20 јануари, преживеа два обиди за атентат за време на кампањата – еден во септември додека играше голф на својот терен во Вест Палм Бич, Флорида, и друг на митингот во јули во Пенсилванија.
Инспекторите не пронајдоа докази дека Иран бил вклучен во тие обиди. Иран, исто така, претходно ги негираше тврдењата на САД за мешање во американските работи, вклучително и сајбер операциите.
Пезешкијан додаде дека Иран во принцип е отворен за дијалог со втората администрација на Трамп, но дека Америка не ги исполнила своите обврски во минатото и дека се обиделе да ја соборат иранската влада. „Ќе треба да се посветиме на обврските кои произлегуваат од разговорот и дијалогот“, рече Пезешкијан. Тој додаде дека Иран разговарал со големите сили за својата нуклеарна програма, дека ги поддржува сите обврски, но дека другата страна не ги исполнила своите ветувања и обврски.
Пезешкијан рече дека Иран не бара војна, но дека ќе биде подготвен да се брани доколку неговите нуклеарни локации бидат нападнати.
„Не се плашиме од војна, но не ја бараме ниту. Се надевам дека нема да дојде до тоа бидејќи тоа ќе биде на штета на сите актери, не само на нас“, рече тој и додаде дека противниците на Иран го обвинуваат Техеран дека се обидува да изгради бомба, но дека тоа не е вистина, пренесува Танјуг.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израел денеска ги врати телата на 15 Палестинци во Газа

Израел денеска ги врати телата на 15 Палестинци во Газа, со што вкупниот број на вратени лица се искачи на 135, соопшти денеска Министерството за здравство на Појасот управуван од Хамас.
Според договорот за прекин на огнот постигнат со посредство на американскиот претседател Доналд Трамп, Израел требаше да ги врати телата на 15 Палестинци за секој вратен починат израелски заложник, објави „Тајмс оф Израел“.
Претходно денеска, канцеларијата на израелскиот премиер Бенјамин Нетанјаху соопшти дека Хамас мора да го почитува договорот и да ги врати останките од преостанатите 18 убиени заложници кои сè уште се наоѓаат во Појасот Газа.
Израелската војска (ИДФ) претходно го информираше семејството на убиениот Елијаху Маргалит дека Хамас го вратил неговото тело во Израел синоќа.
ИДФ соопшти дека, според разузнавачките информации, Елијаху (75) бил убиен на 7 октомври 2023 година, а неговото тело подоцна било однесено во Појасот Газа од кибуцот Нир Оз.
Смртта на Елијаху Маргалит беше потврдена од израелската војска во декември 2023 година.
Свет
Милиони Американци би можеле да останат без купони за храна

Околу 42 милиони Американци би можеле да останат без купони за храна во ноември поради тековниот прекин на работата на федералната влада, предупреди министерката за земјоделство Брук Ролинс.
Програмата за дополнителна помош во исхраната (SNAP), позната и како купони за храна, е дел од клучната национална мрежа за безбедност на храната и обезбедува просечен месечен надомест од 188 долари по лице, пишува Си-Ен-Ен.
Ролинс рече дека средствата за програмата ќе бидат исцрпени во рок од две недели и ги обвини демократите за блокадата на финансирањето.
Свет
Десетици илјади евакуирани на Филипините, се приближува ураган

Десетици илјади луѓе на Филипините се евакуирани денеска од своите домови на брегот на Пацификот поради опасност од поплави во момент кога тропската бура „Феншен“ го зафати регионот, јавија светските агенции.
Бурата попладнево со брзина на ветрот до 80 км на час ја погоди општина Губат, на југоисточниот врв на главниот остров Лузон, соопшти државната метеоролошка служба.
Откако жителите беа евакуирани од крајбрежните и другите ризични области, локалните власти соопштија дека нема извештаи за сериозни штети или жртви.
„Имаше обилни дождови и силни налети на ветер, иако не толку силни“, изјави Рајан Естреладо, спасувач во Губат.
Ураганот вечер треба да помине во близина на островот Катандуанес, кој има население од 270.000 жители, со брзина на ветер до 90 км/ч. Се очекува „Феншен“ да се засили пред да стигне до копното по втор пат во централен Лузон, соопшти националната метеоролошка служба.