Свет
Привремениот перуански претседател поднесе оставка по смртта на двајца демонстранти
Привремениот претседател на Перу, Мануел Мерињо, најави оставка по помалку од една недела на функцијата откако на протестите во главниот град Лима за поддршка на неговиот контроверзен отповикан претходник две лица загинаа, а десетици се повредени, пренесува РТ.
„Поднесувам неотповиклива оставка“, рече Мерињо во телевизиското обраќање, додавајќи дека е време за мир и единство во земјата.
Повикот за негово итно разрешување беше поддржан од сите партии во Конгресот на Перу. Пратениците предупредија дека ќе почнат процедури за импичмент ако Мерињо се обиде да ја задржи власта.
Претходно во неделата, повеќе од половина од министрите во новиот кабинет ги напуштија своите позиции како реакција на избувнувањето на насилството.
El país no permitirá que la muerte de estos valerosos jóvenes quede impune.(2/2)
— Martín Vizcarra (@MartinVizcarraC) November 15, 2020
Мерињо, кој претходно беше претседател на Конгресот, стана привремен лидер на Перу откако пратениците минатиот понеделник гласаа за смена на претседателот Мартин Визкара од функцијата поради обвинувањата за корупција, што тој ги негира.
Но, јавноста остана незадоволна од смената и стотици демонстранти се собраа во центарот на Лима во саботата.
Протестот започна мирно, но беше проследен со судири, по што народниот правобранител на Перу ја обвини полицијата за злоупотреба на сила и фрлање солзавец без оправдување.
Две лица беа убиени откако се здобија со прострелни рани во немирите. Повеќе од 60 други побарале хоспитализација поради повреди или вдишување солзавец.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Аналитичари: Русија напредува во Украина со најбрзо темпо од почетокот на војната
Руските сили напредуваат во Украина со своето најбрзо темпо од првите денови на инвазијата, заземајќи површина од половина од поголемиот Лондон минатиот месец, велат аналитичарите и воените блогери.
Војната влегува во она што некои руски и западни официјални лица велат дека може да биде најопасна фаза, откако руските сили постигнаа некои од нивните најголеми територијални придобивки и САД му дозволија на Киев да возврати со американски ракети.
„Русија постави нови неделни и месечни рекорди во големината на окупираната територија во Украина“, објави независната руска новинска агенција.
Руската војска минатата недела окупираше речиси 235 квадратни километри во Украина, што е неделен рекорд за 2024 година, се вели во извештајот.
Руските сили зазедоа 600 квадратни километри во ноември, се додава, цитирајќи податоци од DeepState, група тесно поврзана со украинската војска која ги проучува борбените снимки и обезбедува мапи на бојното поле.
Русија започна побрзо да напредува во источна Украина во јули, токму кога украинските сили зазедоа дел од нејзиниот западен регион Курск. Оттогаш, рускиот напредок е забрзан, според достапните карти.
Руските сили се движат во градот Курахово, отскочна штица кон логистичкиот центар Покровск во Доњецк, и ја искористуваат ранливоста на трупите на Киев долж линијата на фронтот, велат аналитичарите.
„Руските сили неодамна напредуваа со значително побрзо темпо отколку во цела 2023 година“, велат во извештајот аналитичарите на Институтот за проучување на војната со седиште во Вашингтон.
Генералштабот на украинските вооружени сили објави во својот извештај од понеделникот дека таа вечер се воделе 45 битки со различен интензитет долж Кураховскиот дел од фронтот.
Во извештајот на Институтот за проучување на војната и проруски воени блогери се вели дека руските трупи се во Курахово. Во понеделникот, DeepState на својата апликација за пораки Телеграм објави дека руските сили се во близина на Курахово.
„Напредокот на руските сили во југоисточна Украина во голема мера е резултат на откривање и тактичко искористување на ранливостите на украинските линии“, велат аналитичарите на Институтот во нивниот извештај.
Русија вели дека ќе ги постигне сите свои цели во Украина без оглед на тоа што вели или прави Западот.
Украинскиот претседател Володимир Зеленски изјави дека верува оти главните цели на рускиот претседател Владимир Путин се да го окупира целиот Донбас, кој ги опфаќа регионите Доњецк и Луганск, и да ги протера украинските војници од регионот Курск, чии делови ги контролираат од август.
Европа
Хорор во Австрија: Србин избодел девојка со кујнски нож, крвавата жена истрчала по помош, тој продолжил да се сече
25-годишниот Србин кој наводно ја избодел пет пати со кујнски нож својата девојка (22) во Линц-Ебелсберг, ќе одговара за обид за убиство, јавуваат австриските медиуми.
Драматични беа сцените што се случија на крајот на август во Линц-Ебелсберг. 25-годишен Србин, наводно, ја избодел својата девојка пет пати со кујнски нож од 20 сантиметри. Жената се спасила влегувајќи во куќа, облеана во крв, пренесува Кронен Цајтунг.
Девојката (22) преживеала благодарение на итна операција, а мажот оттогаш е во притвор. Меѓутоа, сега против него е покренато обвинение. Човекот ќе се брани од обвинението за обид за убиство, како што потврди Улрике Брајтенедер, портпаролка на јавното обвинителство во Линц.
Доколку биде прогласен за виновен, му се заканува затворска казна од 10 до 20 години. Датумот на судење се уште не е одреден, бидејќи има рок за жалба од две недели. Судењето, според тоа, најверојатно ќе се одржи дури следната година.
Свет
Повеќе од 30 китови се насукаа на брегот во Нов Зеланд, повеќето беа спасени
Група од повеќе од 30 пилоти китови се спасени откако се насукаа на плажата Руакака, во близина на Вангареи, во северен Нов Зеланд, јавува Би-би-си.
Одделот за заштита на природата (DOC) соопшти дека повеќето од китовите биле вратени во морето и испливале, но три возрасни китови и еден млад кит умреле. Во текот на ноќта не е забележано повторно насукување.
Акцијата за спасување ја водеше локалната маорска група Патухаракеке, на која им се придружија властите и другите граѓани.
Насуканите китови се природен феномен кој сè уште е необјаснет, а Нов Зеланд има една од највисоките стапки на вакви настани во светот.
Членовите на групата Патухаракеке останаа на плажата во текот на ноќта за да се погрижат спасените китови повторно да не се насукаат.