Генералниот секретар на НАТО, Марк Руте, предложи можно решение за спорот меѓу Соединетите Американски Држави и Данска околу Гренланд, јавува CNN, повикувајќи се на европски извори.

Според телевизиската мрежа, Руте предложил ревизија на Договорот за одбрана на Гренланд од 1951 година, со цел во документот да се вклучат јасни гаранции што би ги забраниле кинеските инвестиции на овој остров. Таквиот чекор, како што е посочено, би можел да одговори на безбедносните загрижености на Вашингтон и во исто време да ги намали тензиите со Копенхаген.

Руте верува дека измената на постојниот договор би претставувала институционална рамка што би спречила понатамошно влошување на односите меѓу САД и Данска, а воедно би го задржала постојниот систем на колективна безбедност во рамките на НАТО.

Претседателот на САД, Доналд Трамп, претходно неколку пати изјави дека Соединетите Американски Држави сакаат да го купат Гренланд, тврдејќи дека Данска не е во состојба соодветно да ја брани таа територија.

Норвешката војска објави дека илјадници граѓани ќе добијат писма во кои се наведува дека нивните домови, возила, чамци и машини може привремено да се конфискуваат во случај на војна.

Во соопштението се наведува дека писмата немаат практично влијание во мирновременски услови, освен што ги информираат сопствениците дека војската може да го преземе нивниот имот во случај на конфликт, објавува „Јуронјуз“.

„Целта на реквизициите е да се обезбеди дека, во воени услови, вооружените сили имаат пристап до ресурсите потребни за одбрана на земјата“, се наведува во соопштението на војската.

За 2026 година ќе бидат издадени околу 13.500 подготвителни барања, а секое барање важи една година.

Околу две третини од писмата планирани за 2026 година претставуваат обновување на барањата од претходните години.

„Важноста на подготвеноста за кризи и војна драматично се зголеми во последните години“, рече раководителот на воената логистичка организација, Андерс Јернберг.

Тој изјави дека Норвешка се наоѓа во најсериозна безбедносно-политичка ситуација од Втората светска војна и дека општеството мора да биде подготвено за безбедносно-политички кризи, а во најлош случај за војна, со значително зајакнување на воената и цивилната подготвеност.

Норвешка, еден од основачите на НАТО, ја зајакна својата одбрана во последните години, истакнува гореспоменатиот портал.

Норвешка дели поморска и копнена граница од 198 километри со Русија.

Американскиот претседател Доналд Трамп го повтори своето барање да ја преземе контролата врз Гренланд, автономна данска територија. Зборувајќи со новинарите во Флорида, непосредно пред да полета за Вашингтон, Трамп рече дека Данска „не може да го заштити“ островот.

„Тие се прекрасни луѓе“, рече Трамп за Данците, „но тие дури и не одат таму“. Потоа додаде: „Мораме да го имаме. Данска не може да го заштити“.

Трамп објави дека Гренланд ќе биде тема на дискусија со европските лидери на Светскиот економски форум во Давос оваа недела. Тој потврди дека патува таму утре на чело на голема американска делегација.

„Имав многу добар телефонски разговор со Марк Руте, генералниот секретар на НАТО, за Гренланд. Се согласив да се сретнам во Давос, Швајцарија. Како што им ставив до знаење на сите, Гренланд е од клучно значење за националната и глобалната безбедност. Нема враќање назад – сите се согласуваат за тоа!

Соединетите Американски Држави се убедливо најмоќната земја во светот. Голем дел од тоа е обновата на нашата војска за време на мојот прв мандат, а таа обнова продолжува со уште побрзо темпо. Ние сме единствената СИЛА што може да обезбеди МИР во целиот свет – а тоа се постигнува, едноставно, СО СИЛА!“, напиша Трамп на својот профил на Truth Social.