Италија ја разгледува можноста за ослободување до 10.000 затвореници, што е речиси 15 проценти од вкупната затворска популација, со цел да се намали пренатрупаноста, објави денес Министерството за правда. Министерството соопшти дека приближно 10.105 затвореници имаат право на алтернативни мерки, како што се домашен притвор или условна казна, објави „Ројтерс“.

Овие мерки ќе се применуваат на лица што веќе се осудени, на кои им остануваат помалку од две години од казната и кои немале сериозни дисциплински прекршоци во последните 12 месеци, објавува „Танјуг“.

Затворениците осудени за тешки кривични дела, вклучувајќи тероризам, организиран криминал, силување, трговија со луѓе и киднапирање, нема да бидат ослободени.

Според World Prison Brief, Италија се соочува со едно од највисоките нивоа на пренатрупаност во затворите во Европа, со стапка на зафатеност од 122 процента. Само Кипар, Франција и Турција имаат полоша ситуација, беше наведено.

Иако беше предложено затворениците да бидат ослободени, овој потег е политички чувствителен, па затоа Министерството за правда формира работна група, која ќе соработува со затворите и со судиите за условна слобода. Оваа комисија ќе донесува одлуки за секој поединечен случај и ќе поднесе извештај за својата работа до септември.

Иранскиот парламент објави дека земјата нема да ги продолжи нуклеарните преговори со Соединетите Американски Држави додека не се исполнат одредени предуслови, објавија државните медиуми.

„Кога САД ги користат преговорите како алатка за да го измамат Иран и да прикријат ненадеен воен напад од страна на ционистичкиот режим (Израел), разговорите не можат да се водат како порано. Потребно е да се постават предуслови, а нови преговори не можат да се водат додека не се целосно исполнети“, се вели во соопштението.

Иако предусловите не беа детално наведени, иранскиот министер за надворешни работи, Абас Арагчи, претходно истакна дека еден од условите може да биде гаранција дека нема да има понатамошни напади врз Техеран.

Минатиот месец, САД и Израел започнаа напади врз нуклеарните објекти на Иран, тврдејќи дека тие се дел од програмата за развој на нуклеарно оружје. Техеран ги отфрла овие тврдења.

Техеран и Вашингтон одржаа пет рунди индиректни разговори, со посредство на Оман, пред почетокот на 12-дневната воздушна кампања. Овие преговори заглавија поради барањето на САД, Иран да ја суспендира својата домашна програма за збогатување на ураниум.

Минатата недела, Арагчи го повтори ставот на Техеран дека нема да се согласи на нуклеарен договор што би го забранил збогатувањето на ураниум и дека Иран нема да разговара за теми што не се директно поврзани со неговата нуклеарна програма, вклучително и балистичките ракети.

Претседателот на САД, Доналд Трамп, во вторникот изјави дека не брза да преговара со Иран, бидејќи, како што рече, нивните нуклеарни капацитети сега се „уништени“. Сепак, САД, во соработка со Франција, Германија и Велика Британија, го поставија крајот на август како краен рок за постигнување договор.

Францускиот министер за надворешни работи, Жан-Ноел Баро, во вторникот потврди дека Париз, Лондон и Берлин ќе го активираат механизмот за повторно воведување санкции на ОН против Иран доколку дотогаш нема конкретен напредок кон договор, објави Ројтерс.

Како што најавуваат експертите, до 2030 година може да се случи границата на затоплување на планетата да надмине 1,5 степен, што автоматски би довело до климатски екстреми и опасност од бурата на векот.

Европа доживеа една од најсилните серии на топлотни бранови во јуни и во јули, со дневни температури над 40°C. Истражувањата покажаа дека климатските промени го зголемија бројот на смртни случаи за време на топлотниот бран на крајот на јуни, со дополнителни 1.500 смртни случаи во 12 града.

Минатата година Европа доживеа најраспространети поплави од 2013 година, со повеќе од 335 смртни случаи и 18 милијарди евра штета.

Феноменот на хидроклиматски шокови станува сè почест – наизменични фази на суша и бури предизвикуваат дестабилизација на животната средина и го зголемуваат ризикот од пожар.

Силните топлотни бранови стануваат сè почести и траат подолго, а границите на годишните времиња стануваат сè пофлуидни. Натпросечните температури во лето често беа прекинати од ненадејни бури, па на крајот на јуни и јули имаше силни грмотевици придружени со град поголем од 5 см во дијаметар. Сличен тренд продолжи и оваа година.

Поголемиот дел од Европа доживеа силен топлотен бран, а во многу земји беа поставени рекорди на температурата.

Со сегашните нивоа на емисии на јаглероден диоксид Земјата би можела да биде осудена да ја надмине симболичната граница на затоплување од 1,5 Целзиусов степен за три години. Тоа е строгото предупредување на повеќе од 60 водечки светски климатолози во нивната најнова процена на состојбата со глобалното затоплување. Речиси 200 земји се согласија да се обидат да го ограничат порастот на глобалните температури на 1,5 Целзиусов степен над нивоата од крајот на 19 век како дел од значајниот договор постигнат во 2015 година, чија цел беше да се избегнат некои од најлошите влијанија од климатските промени. Но, земјите продолжија да горат рекордни количини јаглен, нафта и гас, како и да ги сечат шумите, ставајќи ја оваа важна меѓународна цел во опасност, објавува Би-би-си.

„Сите работи се движат во погрешна насока. Досега бевме сведоци на некои невидени промени, како што се глобалното затоплување и зголемувањето на нивото на морето“, рече главниот автор на студијата, Пирс Форстер, директор на Центарот „Пристли“ за климатски иднини на Универзитетот во Лидс.

На почетокот на 2020 година научниците проценија дека човештвото може да испушти само 500 милијарди тони повеќе јаглероден диоксид (CO2), гасот најодговорен за затоплување на планетата, со 50 % шанса да го одржи затоплувањето на 1,5 Целзиусов степен. Но, до почетокот на 2025 година овој таканаречен јаглероден буџет се намалил на 130 милијарди тони, покажа нова студија. Доколку глобалните емисии на CO2 останат на сегашните нивоа од приближно 40 милијарди тони годишно, количина од 130 милијарди тони му дава на светот речиси три години додека тој јаглероден буџет не се исцрпи. Сегашната стапка на затоплување е околу 0,27 степени на деценија, што е многу побргу од сите податоци познати од геолошките записи. И ако емисиите останат толку високи, планетата е на добар пат да достигне зголемување на температурата од 1,5 °C веќе околу 2030 година.

Секое дополнително затоплување ја зголемува сериозноста на многубројни временски екстреми, како што се топењето на мразот и зголемувањето на нивото на морето. Важно е да се напомене дека намалувањето на емисиите во текот на следната деценија би можело критично да ја промени стапката на затоплување, според експертите.

Најмоќните североисточни бури – разорни и честопати смртоносни временски настани што го погодија источниот брег на Соединетите Американски Држави, носејќи со себе обилни дождови, снежни наноси и поплави, што често ги парализираат урбаните области – се влошени од ефектите од климатските промени, открива неодамна објавена студија.

Според извештајот на Си-ен-ен, овие бури, кои обично се случуваат помеѓу септември и април, се предизвикани од температурниот контраст помеѓу студените арктички воздушни маси од север и потоплите влажни струи од Атлантскиот Океан.

Таканаречената бура на векот од март 1993 година останува запаметена како една од најразорните и најскапи во историјата на мерењето.

Следната бура на векот би можела да биде уште посилна, пишува Си-ен-ен повикувајќи се на ново истражување.