Во предизборната кампања во Северна Каролина, американскиот претседател Доналд Трамп, меѓу другото, рекол дека тој може да биде избран за Нобеловата награда за мир. Во тој контекст тој го споменал неодамна потпишаниот договор меѓу Белград и Приштина во Вашингтон.

„Спутник“ пренесува дека Трамп изјавил дека успеал да ги запре масовните убиства што се случувале меѓу Србија и Косово веќе неколку децении.

„Сигурен сум дека ќе се квалификувам за Нобеловата награда за мир. Ние ги запираме масовните убиства меѓу Косово и Србија. Тие се убиваа со години. Tие ќе престанат да се убиваат едни со други. Јас реков: Момци, ајде да се собереме. Знаете, они го прават тоа стотина годни, под различни имиња“, рекол Трамп.

Претседателот на САД беше номиниран за Нобелова награда за мир овој месец по потпишувањето на договорот за нормализирање на економските односи меѓу Белград и Приштина.

Индија регистрира 92.605 нови случаи на коронавирус во изминатите 24 часа и за неколку недели се очекува да ги надмине САД како земја која е најтешко погодена од пандемијата.

Министерството за здравство на Индија, исто така, објави дека во последните 24 часа починале 1.133 лица со што вкупниот број на смртни случаи надмина 86.752.

Вкупниот број на заразени во Индија е над 5,4 милиони луѓе. Индија, сепак, има и најголем број на оздравени пациенти во светот, според Универзитетот Џонс Хопкинс. Стапката на опоравување е околу 80 проценти, пренесува АП.

Над 60 проценти од активните случаи се концентрирани во пет од 28 индиски држави – Махараштра, Карнатака, Андра Прадеш, Тамил Наду и Утар Прадеш.

Владата на премиерот Нарендра Моди се соочи со остри критики за справување со пандемијата поради која над милион луѓе  останале без работа.

Британците кои ќе одбијат да се самоизолираат ќе бидат казнети со 10.000 фунти, околу 13.000 американски долари.

Новото правило ги обврзува Британците да се изолираат доколку се позитивни на коронавирус или се утврди дека имале близок контакт со заразено лице. Правилото стапува на сила на 28 септември, пренесува АП.

Владата ќе им помогне на оние со пониски примања кои се соочуваат со загуба на заработката како резултат на самоизолација со еднократна исплата од 500 фунти (633 американски долари).

Конзервативната влада се очекува да воведе дополнителни ограничувања откако премиерот Борис Џонсон потврди дека Велика Британија е пред втор бран на епидемијата, следејќи го трендот во другите делови на Европа. Градоначалникот на Лондон, исто така, рече дека наскоро може да бидат потребни построги ограничувања во британската престолнина.