Горниот дом на рускиот парламент изгласа претседателските избори во Русија да бидат на 17 март 2024 година. Одлуката беше донесена едногласно со 162 гласа во Советот на Федерацијата.

„Со оваа одлука всушност ја започнуваме изборната кампања“, изјави Валентина Матвиенко, претседател на Советот на Федерацијата.

Таа додаде дека за прв пат на изборите ќе гласаат жителите на делови од украинските региони Доњецк, Луганск, Запорожје и Херсон, кои беа припоени од Русија.

„Со заеднички избор на претседател на земјата, целосно ја споделуваме одговорноста и судбината на нашата татковина“, рече Матвиенко.

Претседателот Владимир Путин се уште официјално не ја објавил својата намера да се кандидира за нов шестгодишен претседателски мандат.

Право на глас во Русија имаат околу 110 милиони луѓе, но обично 70-80 милиони излегуваат на гласање.

Толпа луѓе се собраа на еден од најомилените плоштади во Киев за да ја видат главната новогодишна елка во Украина осветлена за Свети Никола според новиот календар со кој Божиќ се слави на 25 декември.

Со оглед дека нивната војска е вклучена во 21-месечна војна против Русија, ова е првпат многу Украинци да го одбележат празникот според новиот календар – одобрен од главната православна црква во земјата за да се дистанцира од практиката во Русија.

„И во овие тешки времиња имаме можност да дојдеме да го видиме нашето божиќно дрвце во центарот на нашиот главен град“, изјави 29-годишната Олесија Пољарош.

„Можеби не за да славиме, туку да го почувствуваме божиќниот дух и покрај се, за да го одбележиме во нашата земја“, додаде таа.

Повеќето Украинци се православни христијани, а главната црква во земјата се согласи на почетокот на оваа година да отстапи од јулијанскиот календар – кој го слави Божиќ на 7 јануари.

Градоначалникот на Киев, Виталиј Кличко, симболично ги запали светилките на дрвото, велејќи дека тоа е финансирано од приватни донации за да се овозможи доделување на јавни пари за војската.

Утрово имало пукање во училиште во Брјанската област, Русија, потврдија оперативните служби за руската државна новинска агенција Тасс.

„Ученичка од осмо одделение, девојче, донела огнено оружје во училиште од кое пукала неколку пати“, рекол изворот.

„Според првичните информации, еден од учениците внесол огнено оружје во зградата на Гимназијата и испукал неколку истрели, при што се повредени пет лица. После тоа девојчето се самоубило. Од здобиените рани починало едно лице“, соопшти регионалното Министерство за внатрешни работи.

Се претпоставува дека ученичката го зела оружјето на нејзиниот татко.

A female student in the Russian city of Bryansk brought a firearm into the classroom & discharged it several times, media outlets have reported.#Bryansk #Russia #Breaking
TASS reported the shooter was an 8th grader, which would put her in her early teens. According to RIA… pic.twitter.com/D3XBFbUczJ

— ⚡️🌎 World News 🌐⚡️ (@ferozwala) December 7, 2023

Лекарите потврдија дека две жртви се во средно тешка состојба.

„Едно дете е примено, има повреди на рамото и коленото, состојбата е со средна сериозност. Даваме прва помош и најверојатно ќе биде пренесено во детска болница“, соопштија од градската болница во Брјанск.

Од Регионалната детска болница известија дека е примено уште едно повредено дете со рана на левото рамо. „Има 14 години, има прострелна рана. Состојбата е средно тешка, хоспитализиран е“, рекол изворот.

На местото на настанот работат полицијата и итната помош. Се истражуваат околностите на инцидентот. Градската управа извести дека две лица загинале, а четворица се повредени, но објавата подоцна била избришана.