Во изминатите 24 часа во Франција се регистрирани 12.845 случаи на коронавирус, соопштија денеска здравствените власти на таа земја.

Ова е првпат од 27 септември бројот на заразени со коронавирус да надмине 10.000.

Во изминатите 24 часа 63 лица починале како последица на Ковид-19, со што вкупниот број на смртни случаи во Франција достигна 31.956, пренесува агенцијата „Ројтерс“.

Досега во земјата се заразиле вкупно 563.535 лица.

Руското Министерство за надворешни работи соопшти дека борци од Сирија и Либија пристигнале во Нагорно-Карабах, регион каде четири дена трае конфликтот меѓу Ерменија и Азербејџан, во однос на спорните територии.

„Борци од илегални вооружени групи, особено од Сирија и Либија, се распоредени во зоната на конфликтот во Нагорно-Карабах, за да учествуваат во борбите“, соопшти руското министерство, додавајќи дека е крајно загрижено поради процесите што можат да ги зголемат тензиите во конфликтот и низ целиот регион.

Русија ги повика лидерите на засегнатите земји да преземат ефикасни мерки за да спречат регрутирање терористи и странски платеници во конфликтот и да ги повлечат од областа.

Ерменија ја обвини Турција, која го поддржува Азербејџан, за испраќање платеници во Карабах. Властите во Баку, пак, ги отфрлија тврдењата и возвратија со обвинување кон официјален Ереван.

Рускиот министер за надворешни работи, Сергеј Лавров, денеска им предложил на своите ерменски и азербејџански колеги Москва да биде домаќин на разговорите за сепаратистичкиот регион Нагорно-Карабах во кој од 27. септември се водат жестоки битки.

Двете земји беа дел од Советскиот Сојуз пред тој да се распадне во 1991 година. Тие веќе четири децении се во конфликт околу регионот Нагорно-Карабах, кој е меѓународно признат како дел од Азербејџан, но е под контрола на Ерменците.

Ватикан објави дека го одбил барањето на Мајк Помпео за аудиенција кај папата Франциско и го обвини државниот секретар на САД дека се обидел да ја вовлече Католичката црква во претседателските избори во САД, осудувајќи ги односите на Ватикан со Кина.

Забелешките на Ватикан уследија откако Помпео во серија објави на „Твитер“ ја обвини црквата за нарушување на нејзиниот морален авторитет преку обновувањето на договорот со Кина за назначување бискупи.

Помпео, кој денеска престојува во Рим и треба да се сретне со официјални претставници на Ватикан в четврток, уште еднаш ја осуди Кина на конференцијата за верски слободи организирана од Амбасадата на САД.

Двајцата главни дипломати во Ватикан, државниот секретар и кардинал Пјетро Паролин и надбискупот Пол Галагер, изјавија дека папата Франциско го отфрлил барањето на Помпео за средба бидејќи не сака да се состанува со политичари пред избори.

„Да, тој побара. Но, папата веќе јасно стави до знаење дека не прима политичари за време на избори. Тоа е причината“, рече Паролин.

Ватикан и Пекинг потпишаа двегодишен договор за назначување кинески бискупи. Тој договор истекува следниот месец, но треба да биде обновен.