Турскиот претседател, Реџеп Таип Ердоган, денеска пред новинарите во Истанбул изјави дека се надева оти Франција наскоро ќе се ослободи од претседателот Емануел Макрон, опишувајќи го како „товар за таа земја“, која минува низ тешки моменти.

Односите меѓу Турција и Франција се влошија во последните месеци, најпрво поради несогласувањата во однос на политиката кон Сирија, потоа објавувањето на карикатури од пророкот Мухамед, а и по низата злосторства што следуваа поради тоа, пренесува „Ројтерс“.

Анкара и Париз разменија обвинувања и во врска со конфликтот во Нагорно-Карабах откако Франција посочи дека Турција ги помага силите на Азербејџан.

„Макрон е товар за Франција. Се надевам дека Франција ќе се ослободи од проблемот наречен Макрон што е можно поскоро“, рече турскиот претседател.

Во неколку австриски провинции денес почна масовно тестирање на населението за коронавирус.

Почетокот на тестирањето во провинциите Виена, Тирол и Форарлберг беше обележан со големи редици и ИТ-проблеми.

Во Тирол, на пример, луѓето кои имале негативен тест останале без потврда поради проблеми со компјутерскиот систем.

И во Виена, компјутерскиот систем постојано паѓал, па војската почнала да прави резервна копија на хартија.

Од најавата за масовно тестирање, властите се соочуваат со ИТ-проблеми.

Така, страницата за регистрација мораше да се отстрани од мрежата некое време, а во еден момент дојде до протекување на лични податоци на 800 лица.

Масовното тестирање се спроведува на доброволна основа и со брзи антиген-тестови.

Ако антиген-тестот е позитивен, лицето се испраќа на ПЦР-тестирање за да се потврдат резултатите.

Со масовно тестирање, австриската влада сака да го прекине синџирот на инфекција.

Компанијата „Астразенека“ и Универзитетот Оксфорд дадоа спротивставени тврдења за начинот на дозирање на нивната вакцина против коронавирус, што е редок пример на несогласување меѓу двете институции околу овој клучен проект.

Двете страни имаат различна верзија на гледиштето за тоа како одлучиле вакцината да се дава во два наврата – првпат половина, а вторпат цела доза. Првично беше планирано да се даваат по две цели дози.

Студиите наводно покажале дека методот на половина доза е ефикасен 90 проценти во споредба со 62 проценти кога се даваат две цели дози.

Шефот на истражувањето на „Астразенека“ за „Ројтерс“ пред десетина дена изјави дека причината за половина доза е среќна случајност.

Истражувачите забележале дека очекуваните несакани ефекти како што се замор, главоболки и болка во рацете се послаби отколку што очекувале, а Мене Пангалос рече:

„Се вративме, проверивме и сфативме дека е дадена половина доза“, истакна тој, додавајќи дека компанијата потоа одлучила да продолжи со половина доза.

Водечки научник од „Оксфорд“ во понеделникот го отфрли тоа тврдење, велејќи дека половина доза е дадена намерно по темелна консултација.

Ваквите изјави од водечките институции предизвикаа загриженост во врска со веродостојноста на истражувањето, особено затоа што некои експерти сметаат дека се заобиколени некои прописи за да се одобри вакцината што е можно побрзо.

„Овие различни тврдења се загрижувачки“, рече Еленор Рајли, професорка по имунологија на Универзитетот во Единбург.

„Кога станува збор за вакцината, довербата е клучна и не смее да се прави нешто што ќе ја поткопа“, додаде таа.