Свет
Рекордни 117 милиони луѓе беа принудно раселени минатата година
Агенцијата на Обединетите нации за бегалци денеска објави дека бројот на принудно раселени лица минатата година достигна рекордни 117,3 милиони луѓе, предупредувајќи дека оваа бројка може да се зголеми доколку не се случат големи политички промени на глобално ниво.
„Тоа се бегалци, баратели на азил, внатрешно раселени лица, луѓе кои се принудени да заминат поради конфликт, прогон, разни и сè покомплексни форми на насилство“, рече Филипо Гранди, Висок комесар на ОН за бегалци (УНХЦР).
„Конфликтот останува многу, многу длабок двигател на раселувањето“, објаснува тој.
Во извештајот за глобалните трендови во присилното раселување, УНХЦР наведува дека е забележан годишен пораст на бројот на присилно раселени лица во последните 12 години.
УНХЦР проценува дека присилното раселување продолжило да се зголемува во првите четири месеци од 2024 година и дека бројот на раселени лица најверојатно ќе надмине 120 милиони луѓе до крајот на април.
„Доколку не дојде до промена во меѓународната геополитика, за жал предвидувам дека оваа бројка ќе продолжи да расте“, рече Гранди, мислејќи на ризикот од нови конфликти.
Конфликтите што доведоа до раселување ја вклучуваат војната во Судан, која Гранди ја опиша како „една од најкатастрофалните“ и покрај тоа што привлекува помалку внимание од другите кризи. Повеќе од 9 милиони луѓе се внатрешно раселени, а други два милиони побегнаа во соседните земји, вклучувајќи ги Чад, Египет и Јужен Судан, рече Гранди.
„Луѓето пристигнуваат по стотици секој ден“, рече тој, мислејќи на приливот на луѓе кои бараат безбедност во Чад.
Во Појасот Газа, израелското бомбардирање и копнената кампања доведоа до внатрешно раселување на околу 1,7 милиони луѓе, или речиси 80 отсто од населението на таа палестинска енклава, а многу од нив се преселиле неколку пати.
Гранди предупредува дека евентуалното преминување на жителите на Газа во Египет од градот Рафа на јужната граница за да избегаат од израелската воена офанзива би било катастрофално.
„Уште една бегалска криза надвор од Газа би била катастрофална на сите нивоа, меѓу другото затоа што немаме гаранции дека луѓето ќе можат да се вратат во Газа еден ден“, рече Гранди.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Бебе застрелано од мало дете кое во паркиран автомобил посегнало по наполнет пиштол во САД
Бебе било застрелано и убиено од мало дете кое додека биле во паркиран автомобил посегнал0 по наполнет пиштол и го повлекло чкрапалото, соопшти полицијата.
Пукањето се случило на паркинг во близина на медицински центар во Сан Антонио, Тексас.
Во возилото имало три деца и една жена, изјави началникот на полицијата на Сан Антонио, Вилијам Мекманус.
„Деца на возраст од 3, 2 години и 10 или 11 месеци биле во задниот дел на возилото“, рече тој.
Едно од постарите деца се фатило за наполнет долг пиштол што бил во задниот дел на возилото и „случајно го повлекол чкрапалото“, пукајќи во најмалото дете, рече началникот.
„Ова што го имаме денес овде е ужасна, страшна трагедија“, рече Мекманус на брифинг со новинарите.
Свет
Бразилскиот претседател Лула е стабилен по повредата на главата
Бразилскиот претседател Луис Инасио Лула да Силва се чувствува добро денеска откако се здоби со повреда на главата во неговиот дом во текот на викендот, кога доживеа мало крварење на мозокот, изјави бразилскиот министер за институционални односи Александре Падиља.
Според лекарите Роберто Калил и Ана Хелена Гермољо, нов контролен преглед ќе биде извршен за 72 часа, пренесува Ројтерс.
Лекарите исто така потврдија дека бразилскиот претседател може да ја продолжи својата нормална работна рутина.
Свет
Ердоган: Турција сака да ја подобри соработката со БРИКС
Турција сака да ја подобри соработката со БРИКС и очекува дека претстојниот самит во Казан ќе даде поттик на овој потфат, изјави денеска турскиот претседател Реџеп Таип Ердоган.
„Искрено сакаме да ја продлабочиме нашата соработка со БРИКС. Верувам дека самитот во Казан значително ќе придонесе за овие напори“, рече Ердоган во Анкара.
Според турската телевизија ТРТ Хабер, Ердоган потврдил дека „на покана на рускиот претседател Владимир Путин утре ќе го посети Казан за да учествува на проширената средба на лидерите на БРИКС“.