Израелските знамиња, поставени на зградите на институциите во Австрија во знак на солидарност со Израел, беа отстранети поради жестоките реакции во јавноста.

Израелските знамиња, кои беа поставени на зградите на владата и Министерството за надворешни работи претходните денови, беа спуштени без никакво образложение.

Тврдејќи дека ваквата постапка е спротивна на принципот на неутралност, многубројни невладини организации, здруженија, академици и политичари реагираа силно на отворената поддршка на премиерот Себастијан Курц на една од завојуваните страни во регионот на Блискиот Исток со подигање на израелското знаме на зградата на владата.

На 14 мај Курц објави на „Твитер“ дека израелското знаме е поставено на зградата на владата во знак на солидарност со Израел.

Отворената поддршка на Курц за Израел, кој ги интензивира нападите врз Палестинците во Појасот Газа во последните денови, предизвика реакции кај голем број земји, особено од Турција, пишуваат австриските гласила.

И покрај реакциите од целиот свет, Израел продолжи со жестоките напади врз Газа, каде што живеат околу два милиона луѓе, анализираат медиумите.

Германија денеска вети 40 милиони евра со цел да се зголеми хуманитарната помош за цивилите во Газа, каде што според податоците на Обединетите нации, над 52.000 Палестинци се раселени поради последните израелски воздушни напади.

„Денес ќе лобирам за подобра хуманитарна помош во Газа“, рече германскиот министер за надворешни работи Хајко Мас пред состанокот со колегите од другите земји на Европската Унија на кој ќе разговараат за ситуацијата во Израел и Газа, пренесува „Ројтерс“.

Мас додаде дека Германија ќе обезбеди 40 милиони евра за тие цели.

Во исто време, тој ги осуди ракетните напади на Хамас врз Израел од Појасот Газа и истакна дека Израел има право на самоодбрана.

Министерството за надворешни работи на Австрија го повика на разговор турскиот амбасадор Озан Чејхун, бидејќи претседателот на Турција ја „проколна“ Австрија.

Реџеп Таип Ердоган реагираше на потегот на Австрија, која го постави израелското знаме на зградата на Владата во знак на солидарност поради конфликтот во Појасот Газа.

„По апсурдните изјави на Ердоган, турскиот амбасадор беше повикан на разговар во министерството со цел јасно да го пренесе ставот на Австрија“, се вели во соопштението на австриското министерство, пренесува „Спутник“.

Министерот за надворешни работи Александар Шаленберг истакна дека конфликтот на Блискиот Исток не може да се реши со пена во уста.

Ердоган реагираше луто на постапката на Австрија, сфаќајќи ја како поддршка на Израел.

„Ја проколнувам австриската држава. Тие веројатно сакаат муслиманите да ја платат цената на геноцидот врз Евреите”, рече Ердоган.