Украинскиот претседател Володимир Зеленски потпиша уредба со која се воведуваат санкции против компании што ѝ обезбедуваат услуги на руската танкерска флота и превезуваат нафта под санкции. Зеленски тоа го објави на социјалната мрежа X, нагласувајќи дека Украина продолжува со усогласување на своите санкции со Европската Унија, пренесе „Украинска правда“.

„Потпишав уредба со која се воведуваат санкции против компании што ја сервисираат руската танкерска флота и превезуваат санкционирана нафта“, стои во објавата.

Зеленски појасни дека новите санкции се насочени и кон пропагандисти на Кремљ, како и кон поединци вклучени во кибер-напади врз Украина и нејзините партнери. Тој потсети дека Европската Унија минатата недела ги усогласи своите мерки со украинските санкции против шест руски пропагандисти во рамки на својата јурисдикција.

Украинскиот претседател најави и понатамошни чекори во соработка со Европската Унија.

„Во тек е и работата на 20. пакет санкции на ЕУ. Очекуваме тој да биде усвоен до крајот на февруари. Веќе сега гледаме дека многу од нашите предлози се земени предвид“, изјави тој.

Во рамки на новиот пакет санкции, Европската Унија ја разгледува можноста горната граница на цената на руската нафта да биде заменета со целосна забрана на поморските услуги.

Овие мерки се дел од пошироките напори за спречување на руските обиди за заобиколување на санкциите. Украинската разузнавачка служба ја ажурираше својата база на податоци за таканаречената „флота во сенка“, објавувајќи детали за 66 пловила што превезуваат украдено украинско жито, како и санкционирана руска и венецуелска нафта.

Претходно стапија на сила украински санкции против речиси 700 пловила за кои Киев тврди дека Русија ги користи за финансирање на војната.

Со цел да се олесни спроведувањето на мерките, Државната царинска служба на Украина разви специјализиран софтвер „Санкции за поморски пловила“, кој им овозможува на царинските органи брза идентификација на санкционираните бродови.

Зеленски на 25 ноември минатата година потпиша уредба за санкции против 56 пловила кои во периодот од 2022 до 2025 година влегувале во пристаништа на привремено окупираните украински територии.

Во декември минатата година, Службата за безбедност на Украина во пристаништето Одеса задржа странски товарен брод кој бил дел од руската „флота во сенка“ и нелегално превезувал земјоделски производи од привремено окупираниот Крим.

Шефот на француската дипломатија, Жан-Ноел Баро, денес оцени дека рускиот претседател Владимир Путин не покажува знаци на вистинска волја за мир во Украина.

„Владимир Путин не покажува знаци на вистинска желба да се движи кон мир. Напротив, за прв пат минатата недела, неговите беспилотни летала намерно погодија патнички воз, при што загинаа 15 лица“, изјави Жан-Ноел Баро за парискиот весник „Либерасион“.

Баро рече дека тој напад го смета за „воен злостор“, додавајќи на тоа „силувања, депортации на деца, масакри и вонсудски егзекуции“.

„Четири години по нејзиното лансирање, јасно е дека таканаречената специјална операција на Кремљ е катастрофален неуспех за Русија – 1,25 милиони смртни случаи, што е повеќе од сите советски и руски човечки загуби од 1945 година, 1.000 смртни случаи секој ден на фронтот, како и рецесија во Русија предвидена за 2026 година“, додаде Баро.

Францускиот министер рече дека е крајно време Путин да се откаже од своите барања и конечно да прифати прекин на огнот.

Баро го осуди обидот на рускиот претседател да „предизвика хуманитарна криза“ со тоа што ќе продолжи да ја таргетира енергетската инфраструктура и покрај ниските температури во Украина.

Во врска со евентуалното продолжување на дијалогот со Русија, тој рече дека Франција никогаш не ја исклучила соработката со Русија, „со целосна транспарентност со Украина и нејзините европски партнери, и под услов таа да е корисна“.

Заменик-претседателот на Рускиот совет за безбедност, Дмитриј Медведев, изјави дека светот станува многу опасно место, но дека Русија не сака глобален конфликт. Руската инвазија на Украина во 2022 година предизвика најголема конфронтација меѓу Москва и Западот од врвот на Студената војна, иако претставниците на американскиот претседател Доналд Трамп во моментов се обидуваат да преговараат за крај на војната со Русија и Украина, објави Ројтерс.

Медведев, кој раководи со еден вид модерно политбиро од најмоќните руски функционери, го пофали Трамп и смета дека е охрабрувачки што контактите со Вашингтон продолжуваат. Сепак, Медведев, кој во минатото даваше остри изјави до Киев и западните сили и предупреди на ризикот од ескалација на војната во нуклеарна „апокалипса“, рече дека Западот постојано ги игнорирал руските интереси, анализираат медиумите.

„Ситуацијата е многу опасна“, рече Медведев во интервју за Ројтерс, ТАСС и рускиот воен блогер ВарГонзо во неговата резиденција надвор од Москва. „Се чини дека прагот на болка се намалува“.

„Не сме заинтересирани за глобален конфликт. Не сме луди“, рече Медведев, кој беше претседател на Русија од 2008 до 2012 година. „Но, глобален конфликт не може да се исклучи.“

Според написите, и Путин и Трамп ги покренаа ризиците од ескалација околу Украина, иако европските дипломати велат дека Москва вешто ја искористила картата за да ги заплаши сојузниците на Украина да не се вклучат премногу во војната.

„Ќе се залагаме за нашите интереси“
„Тие велат: „Нема шанси, Русите го измислуваат сето ова, шират паника и никогаш нема да направат ништо“, рече Медведев, додавајќи дека она што Кремљ го нарекува „специјална воена операција“ во Украина покажува дека Русија ќе се залага за своите интереси.

Запрашан за низа глобални настани во јануари, вклучувајќи ги и оние во Венецуела и околу Гренланд, Медведев рече дека сето тоа е едноставно „премногу“.

Коментирајќи го венецуелскиот претседател Николас Мадуро, руски сојузник, Медведев рече дека САД сигурно би го сметале за воен чин ако Трамп биде „киднапиран“ од странска сила.

Тој, исто така, ги отфрли западните тврдења за руска или кинеска закана кон Гренланд како лажни „хорор приказни“ измислени од западните лидери за да ги оправдаат сопствените постапки.