Британците веќе почнаа да се кодошат едни со други за прекршувања на правилото на шестмина од мерките за социјално дистанцирање поради Ковид-19, а една жена ги пријавила дури и луѓето собрани на помен во градина на паб, пренесува „Мирор“.

Министрите неделава ја повикаа јавноста да ги пријавува своите соседи ако се сомневаат дека се собираат во групи поголеми од шестмина. Секретарот за внатрешни работи, Прити Пател, дури рече и дека две семејства што се сретнале на улица и застанале за разговор постапуваат спротивно на законот.

Една Британка сметала дека е нејзина граѓанска должност да пријави ужалена група од 30-ина луѓе на помен во градината на еден паб во Вигстон, Лестершир. Полициските службеници во средата ненајавено ја посетиле „Старата круна“ откако двапати ѝ се јавиле на сопственичката Сју Хамфрис во пабот за да проверат дали луѓето од групата држат социјална дистанца.

Полицијата побарала дел од групата да биде преместена од задниот дел кон предниот дел на пабот, но сепак рекле дека не се прекршени правила.

„Бев загрижена поради она што го видов. Се чинеше дека има голема група луѓе што пијат надвор од пабот и изгледаа прилично блиску еден до друг. Почувствував дека мора да ја известам полицијата во случај да се кршат правилата. Чувствував дека е моја граѓанска должност да го пријавам ова и повторно ќе го сторам тоа“, изјави сосетката кодош.

Таа исто така призна дека направила видеоснимки од ужалените.

Во средата премиерот Борис Џонсон се обиде да го повлече тврдиот став за пријавување на соседите, но се чини дека некои веќе ја добиле оригиналната порака. Премиерот рече:

„Јас никогаш не сум бил многу за кодошката култура. Она што луѓето треба да го сторат ако се загрижени е да го споделат тоа со своите пријатели и соседи“.

Тој, сепак, им даде поддршка на луѓето што се јавуваат во полиција велејќи: „ако мислат дека постои сериозна закана за јавното здравје како резултат на активностите на нивниот сосед, тогаш е разумно да ги информираат властите“.

Турција го повлече истражувачкиот брод „Орук Рајс“ од источен Медитеран поради дипломатски односи со Грција, изјави турскиот претседател, Реџеп Таип Ердоган.

Но, како што истакнува, тоа не значи дека турските операции во овој регион се завршени.

Обраќајќи им се на новинарите во Истанбул по молитвата, Ердоган исто така рече дека е подготвен да се сретне со грчкиот премиер, Кирјакос Мицотакис, во живо или преку видеоконференција, за да разговараат за тензиите во источен Медитеран, пренесува „Ројтерс“.

„Орук Рајс“ се врати во водите во близина на јужната турска провинција Анталија поради, како што објави Анкара, рутинско одржување.

Грција го оцени овој потег како прв позитивен чекор за намалување на тензиите за природните ресурси и поморската јурисдикција во источен Медитеран.

Универзитетот „Принстон“ би можел да биде принуден да врати милиони долари од федералното финансирање и да биде парично казнет поради неодамнешното признавање на неговиот претседател дека во оваа институција од „Ајви лигата“ расизмот сè уште опстојува, пренесува „Њујорк пост“.

Во писмото до претседателот на „Принстон“, Кристофер Ајзгрубер, Министерството за образование на САД вели дека отвора истрага за писмото од 2 септември, во кое тој ги истакнува „напорите на училиштето да се избори против системскиот расизам“.

„Меѓу другото, рековте дека расизмот и штетата што им ја нанесува на обоените луѓето продолжуваат на ‘Принстон’ , а расните претпоставки остануваат вкоренети во структурите на Универзитетот“, напиша помошник-секретарот Роберт Кинг од Канцеларијата за терцијарно образование.

„Признатиот“ расизам на „Принстон“ иницира прашања за точноста на гаранциите за недискриминација и еднакви можности што му се доставуваат на Министерството за образование во замена за повеќе од 75 милиони долари, пари од даночни обврзници, откако Ајзгрубер ја презеде функцијата во 2013 година, вели Кинг.

Официјалните лица се загрижени и дека многуте тврдења на „Принстон“ за недискриминација и еднакви можности дадени на учениците, родителите и потрошувачите на пазарот за сертификати за образование можеби биле лажни, погрешни и лажно прикажани.

Во писмото на Кинг се бара од „Принстон“ да даде мноштво досиеја и писмени одговори на прашања во рок од три недели, а Ајзгрубер и назначен корпоративен претставник да бидат достапни за транскрибирани интервјуа, под заклетва, во рок од четири недели.

„Врз основа на фактите, секретарот за образование, Бетси де Вос, може да разгледа мерки против ‘Принстон“’ за давање лажни гаранции за недискриминација во договорот за учество во програмата, вклучително и мерки за враќање на средствата. Исто така, таа може да разгледа мерки против ‘Принстон’ за дадени значителни погрешни прикази за природата на неговата образовна програма, вклучително и казнена постапка“, напиша Кинг.

Во писмото, за кое во четвртокот првин пишуваше „Вашингтон егзаминер“, Кинг истакна дека сојузните службеници биле свесни за предизвиците што ги носи Ковид-19 за високообразовните институции.

„Сепак, сериозната, дури и шокантна природа на признанијата од ‘Принстон’, го принудува Министерството да реагира со соодветна брзина“, додаде тој.

Истрагата ќе ја спроведе Канцеларијата на генералниот совет при Министерството за образование, а предметот е упатен и до Одделот за граѓански права при Министерството за правда на САД и Канцеларијата за граѓански права на Министерството за образование за какво било дополнително дејстое што тие го сметаат за соодветно, рече Кинг.

Портпаролот на „Принстон“, Бен Чанг, во писмената изјава рече дека Универзитетот ќе му одговори на Министерството за образование во догледно време.

„Жално е што Министерството навидум верува дека искрената борба со историјата на нацијата и сегашните ефекти на системскиот расизам е непочитување на постојниот закон. Универзитетот не се согласува и едвај чека да ја унапреди нашата образовна мисија со објаснување зошто нашите изјави и постапки се во согласност не само со законот туку и со највисоките идеали и стремежи на оваа земја“, напиша Чанг.